Zasua 4 - Yálá laawoo hɛɓɛ (dc)

¹ Ɓɛlɔwai nuą kəlee di Ɉurdɛn teen na, Yai-Laa ə mo Ɉosue ɓa yɛ mą:

² «Nu pow kɔ́w hveelɛ həɠə nuą lɔwai, Israɛlə lonnii tɛi tɛi kəlee nwɔ nu tɔ̨nɔ̨.

³ Ə́ mo diɛ di kwɛni kpuwulu tɛi tɛi həɠə ɓɛi ɉaláá laa həli nuą kɔ́wɔ ə kɛ laa hvilɛn ni ɲá lii ɓa; di lɛɛ ka yəi, ɓɛi ka yíi laa, ka di laa laa.»

⁴ Nu pow kɔ́w hveelɛi tii tɔlɔɔ Ɉosue ə di həɠə ɉui, ə di təli,

⁵ yɛ diɛ: «Ka tɛɛ Yai-Laa ka wɔ Yálá nwɔ mįnɛ̨ kəhi tɔwɔ, ka li Ɉurdɛn hąąi, nu tɛi tɛi ə kwɛni kpuwulu tɛi tɛi həɠə ə naa galan ŋą, yɛ bələi Israɛlə huwu tɛi tɛi lonɔɔ kaa la.

⁶ Mɛ̨nįi tɛɛ ɓɛ, gwɛniɠaai tii ɓə pai kɛi a nąą kili too ŋą hɛn. Akɛ ka lonnii da ka mąąni kɛ tinąą, diɛ kaa; yii mukulaa ɓaa a lə?

⁷ Ka di woo ɲąąpənə, kaa diɛ: ‹Ɉurdɛn yá ə tɔɔ, ɓɛlɔwai Yai-Laa nwɔ mįnɛ̨ kəhi ə kɛi tɛɛ la ɓɛ Ɉurdɛn yá hu, gwɛniɠaai ŋɛ̨i kaa a gbalo mɛ̨nį tii gili lɛɛ ɉu hɛn.›»

⁸ Mɛ̨nįɠaai tii Ɉosue ə mo Israɛlə lonnii diɛ, bələ ɓə di gəlee kɛ la. Di kwɛni pow kɔ́w hveelɛ həɠə Ɉurdɛn hu, yɛ bələi Yai-Laa ə mo la Ɉosue ɓa, yɛ bələi Israɛlə lonnii lonɔɔ kaa la, di lɛɛ di yəi ɓɛi di yíi laa, di di laa laa.

⁹ Ɉosue ə kwɛni kpuwulu pow kɔ́w hveelɛ kpɔn gee ɓa Ɉurdɛn hąąi ɓɛi tii mįnɛ̨ kəhi həɠə nuą kɔ́wɔ ə kɛ laa hvilɛn ni, háá ɓaa háá, di kaa ni laa.

¹⁰ Ɉaláá laa həli nuąi ŋɛ̨i mįnɛ̨ kəhi ə kɛ di yəi, di tɔɔ Ɉurdɛn yá hąą, mɛ̨nį ŋɛ̨i Yai-Laa ə mo Ɉosue ɓa, yɛ mo Israɛlə nuą diɛ, di nąą hvɛɛ. Yɛ bələi Moisə ə mo la Ɉosue ɓa; Israɛlə nuą kəlee di di mąąhulɔ, di ɲá teen.

¹¹ Ɓɛlɔwai nuą kəlee di ɲá teen na, ɉaláá laa həli nuą di tɛɛ nuą tɔwɔ a mįnɛ̨ kəhi.

¹² Yili pulu, Gadə nu huwu, Rubɛn da Manase huwu bələ tɔ̨nɔ̨ nuą, yiiɠaai kɛ a kɔ́ kɔ́ nuą, di tɛɛ Israɛlə nuą yiiɠaai tii tɔwɔ, yɛ bələi Moisə ə mo la diɛ.

¹³ Kɔ kɔ́ nuą nu waa pow nąąn ɲɔ̨nwɔ̨mąn ə tɛɛ Yai-Laa lííla, di Ɉurdɛn teen, diɛ li Ɉeriko nɛ̨ŋɛ̨i pələ.

¹⁴ Nąąlɔwai, Yai-Laa ə Ɉosue kɛnɛ̨ nuą ɲɛ̨i ɓa, nuą diɛ ɲɔw mą, yɛ bələi di kɛi ɲɔw la Moisə ɓa ɲíi hvóló kəlee hu.

¹⁵ Yai-Laa ə mo Ɉosue ɓa, yɛ mą:

¹⁶ «Mo ɉaláá laa həli nuąi ŋɛ̨i mįnɛ̨ kəhi kaa di yəi, di kulɔ ɲái.»

¹⁷ Ɉosue ə mo diɛ di kulɔ ɲái.

¹⁸ Ɓɛlɔwai ɉaláá laa həli nuąi ŋɛ̨i kɛi Yai-Laa nwɔ mįnɛ̨ kəhi həɠə di kulɔ la ɲái, Ɉurdɛn ə pənə ə laa naai. Ɛlɛɛ yɛ tɛɛ, yɛ bələi ə kɛi tɛɛ la a bɔlɔ.

¹⁹ Ɲąnįn dɔlɔɔ nwɔ hvóló pow yələ ɓə Israɛlə lonnii di Ɉurdɛn teen na, di muwu pu Gilgalə, Ɉeriko voló həɠəi pələ.

²⁰ Gwɛni pow kɔ́w hveelɛi ŋɛ̨i di di həɠə Ɉurdɛn hu, Ɉosue ə nąą gee mɛ̨i Gilgalə.

²¹ Yili pulu ə mo Israɛlə lonnii diɛ yɛ diɛ: «Ka lonnii da ka mąąni kɛ tinąą diɛ kɛ kaa gwɛnii ŋɛ̨i mąą mɛ̨nį mukulaa ɓaa a lə?

²² Bələi Israɛlə lonnii di Ɉurdɛn yá teen na a di kɔ́wɔ mąą kpalaa, ka bələ hukulɔ diɛ.

²³ Yai-Laa ka wɔ Yálá ə Ɉurdɛn yá kpala ka tɔwɔ, ə gɛ ka deen, yɛ bələi Yai-Laa ə gboloyá kpala la ku tɔwɔ kuɔ deen a ku kɔ́wɔ mąą kpalaa.

²⁴ Ə yili kɛ tii, ə gɛ, nu kəlee di gɔlɔn diɛ Yai-Laa ɓə ɲee wala-walaa, ə lɛɛ ka ɲɔw mą, yai gaa a Yai-Laa ka wɔ Yálá a yələ kəlee.»