Zasua 3 - Yálá laawoo hɛɓɛ (dc)

Ɉurdɛn teen mɛ̨nį

¹ Ɉosue da Israɛlə lonnii kəlee di di muhəɠə yələwala pɔ, di həɠə Sitimə lɔi hu, di həli Ɉurdɛn ɓa. Di həliɛ laa, di yii laa, gɛɛ di hvo kɛ ɲá teen ɉii.

² Yaan, hvóló haaɓa yee mu, ɲɛ̨itɔwɔ nuą di kɛi hiɛ Israɛlə lonnii lɔwai,

³ diɛ di liɛwoo ɓo, diɛ kɛ diɛ: «Ɓɛlɔwai ka káá pai Yai-Laa gu wɔ Yálá nwɔ mįnɛ̨ kəhi kaai la, ɉaláá laa həli nuą a Levi lonnii di nwuɔ̨, ka ka muhəɠə nąąlɔwai ka hvilɛn di pulu.

⁴ Kɛlaa ka kɛi hiɛ, yee laa mą waa hveelɛ ɲɔ̨nwɔ̨mą ə kɛ ka lɔwai; yili ɓə a gɛ, bələi mąąnɛ̨ɛ̨ ka ɉon na, ka kɛ a gɔlɔnŋąą, mąąhɔlɔɓo, ka hvo ta pa li ɓɛ pələ.»

⁵ Ɉosue ə mo Israɛlə lonnii diɛ, yɛ diɛ: «Ka ka mąąhəɠə, mąąhɔlɔɓo, Yai-Laa a tinąą mɛ̨nį kpɛa-kpɛa kɛ ka lɔwai.»

⁶ Ɉosue ə mo ɉaláá laa həli nuą diɛ, yɛ diɛ: «Ka mįnɛ̨ kəhi həɠə, ka tɛɛ la nuą tɔwɔ. Di mįnɛ̨ kəhi həɠə, di tɛɛ la nuą tɔwɔ.»

⁷ Yai-Laa yɛ Ɉosue ɓa: «Ə həɠə háákələi ɓa, gáá pai ə́ kɛnɛ̨i Israɛlə nuą kəlee ɲɛ̨i ɓa; əgɛ, di gɔlɔn diɛ, gáá ə́ pɔ, yɛ bələi ŋį́ kɛ la Moisə pɔ.

⁸ Yii mąąnɛ̨ɛ̨ ə́ mo ɉaláá laa həli nuą diɛ, diɛi gəhi kaa di yəi; ya ka: ‹Ɓɛlɔwai ka káá pai həlii la Ɉurdɛn yá kwɛlɛ, ka tɔɔ ɲái.›»

⁹ Ɉosue yɛ Israɛlə lonnii diɛ: «'Ka lɛɠɛ ɓɛ, mɛ̨nįi Yai-Laa ka wɔ Yálái kaa moi, ka mɛ̨n.»

¹⁰ Yili pulu, Ɉosue yɛ diɛ: «Ka káá pai gɔlɔn ɉii kaa diɛ, Yálá húlu kaa ka lɔwai. Ɛlɛɛ, Kanaan nuąi a: Hɛtə nuą, Hivi nuą, Perizi nuą, Girgasə nuą, Amɔrə da Ɉebusə nuą, gaa pai di kpɛi ka tɔwɔ.

¹¹ Lɔi kəlee Nąmu nwɔ mįnɛ̨ kəhi kaa pai tɛɛi ka tɔwɔ Ɉurdɛn yá hu.

¹² Ka nu pow kɔ́w hveelɛ həɠə Israɛlə nuą lɔwai, Israɛlə lonnii tɛi tɛi kəlee nwɔ nu tɔ̨nɔ̨.

¹³ Ɓɛlɔwai lɔi kəlee Nąmu Yai-Laa nwɔ mįnɛ̨ kəhi həɠə nuą kɔ́wɔ kaa pai hvilɛn ɉii la ɲái, nąąlɔwai Ɉurdɛn yá a tee ɲələi pələ, ɉu a tee ɉu di tɔwɔ.»

¹⁴ Ɓɛlɔwai Israɛlə lonnii di kulɔ la di wɔ həɠə pɛlɛ́ɠaa mu, əgɛ di ɲá teen, ɉaláá laa həli nuąi ŋɛ̨i mįnɛ̨ kəhi ə kɛ di yəi, di kɛ nuą tɔwɔ.

¹⁵ Ə kɛ a di wɔ hihɛnŋąą ɓá kulɔi lɔwai, yaan, nąąlɔwai Ɉurdɛn ə kɛ a vɛɛ naŋin ŋąą gahin mɛ̨i; kɛlaa, ɓɛlɔwai mįnɛ̨ kəhi həɠə nuą kɔ́wɔ ə hvilɛn na ɲái,

¹⁶ nąąlɔwai kpɔlɔɔ, ɲá ə tɔɔ ɲələi pələ yɛ hįi, kpɔ a gwɛa, Adamə taai ŋɛ̨i Sartan gwɛlɛ pələ; yii ŋɛ̨i a kɛ yɛɛi Ɉurdɛn ɲá-ɓoloon bɔ gboloyá ɓa pələ, gboloyá kponąi tii hu ə tee kpɔ tɛ̨ɛ̨ tɛ̨ɛ̨, nuą di Ɉurdɛn teen Ɉeriko tənən ma pələ.

¹⁷ Ɉaláá laa həli nuą ŋɛ̨i Yai-Laa nwɔ mįnɛ̨ kəhi ə kɛ di yəi, di kɛ tɔɔni ɲá kɔ́w ɓa, Ɉurdɛn hąąi, ɲá hvo kɛa kɛ laa. Nąąlɔwai, Israɛlə nuą kəlee di ɲá teen kpɔ tɛ̨ɛ̨tɛ̨ɛ̨? Di kɔ́wɔ mąą kpalaa. Yili pulu ɓə ɉaláá laa həli nuą di ɲa teen na.