Zasua 24 - Yálá laawoo hɛɓɛ (dc)

Di ɲąąkpɔn gɛnɛ̨ too Sisɛmə

¹ Ɉosue ə Israɛlə lonnii kəlee təli, di di ɲąąkpɔn Sisɛmə daai, ə mą kɛ, Israɛlə kalanɉonŋąą, da nɔi ɲąąwooɓo nuą, bɛlɛɛ, giti tee nuą diɛ, da ɉɛɓɛ́ kɛ nuą. Di pa di tɔɔ Yálá lííla.

² Ɉosue yɛ Israɛlə lonnii diɛ: «Mɛ̨nįi Yai-Laa Israɛlə nwɔ Yálái kaa moi, ya ka: Ɲá lee kɛnɛ̨i tii pulu pələ ɓə wɔlɔ ka nąnnii di kɛ la heeni; Abrahamə da Nahɔrə di nąn Tɛra, diɛ haliɠaa kɔ́.

³ Ŋį́ ka nąn Abrahamə həɠə ɲá lee pulu pələ, ŋį́ li ŋį́ ɉee Kanaan lɔi nąą kəlee, ŋį́ ɉuwuhu ɓɛɛlɛ, ŋį́ Isaakə tɛɛ bɔ.

⁴ Ŋį́ Ɉakɔbə da Esau di tɛɛ Isaakə pɔ. Ŋį́ Seirə yee tɛɛ Esau pɔ a ɉee lɔi, Ɉakɔbə nwɛi, da nonnii də li Eziptə lɔi hu.

⁵ Yili pulu, ŋį́ Moisə da Aarɔn di tɔɔ. Ŋį́ Eziptə lɔi kɛlɛ a mɛ̨nįɠaai ŋį́ gɛ laa. Yili pulu, ŋį́ ka kulɔ laa.

⁶ Ŋį́ ka nąnni kulɔ Eziptə lɔi hu, ka həli gboloyá ɓa, Eziptə nuą di hvilɛn ka nąnni pulu diɛ di kpɛ, a wotoloɠaa da hoo gilɛ həɠə nuą, ə lɛɛ ɉu di həli la veegbɔnɔ gboloyá ɓa.

⁷ Nąąlɔwai, ka nąnni di tomą Yai-Laa pɔ pələ, yili ə nąląąn ɉu kpinɛ̨ɛ̨ pɛlɛ ka lɔwai ka Eziptə nuą, əgɛ, gboloyá ə hiɛ di mɛ̨i, ə di mɛ̨i kpulu. Mɛ̨niɠaai ŋį́ naa Eziptə ɓa, ka nąą kaa. Ka lamun nɔi pun ɉu a ɉu kwɛa.

⁸ Yili pulu, ŋį́ pa a kaa Amɔrə nuą di wɔ lɔi hu, diɛi tii hee ni Ɉurdɛn pulu pələ; kɛlaa, di kɔ́ pɛlɛ kaa, ŋį́ di lɔ ka yee ŋą, ka nwɔ lɔi hɔlɔɓo a ka wɔɔ. Ŋį́ di huwu pu ka ɲɛ̨itɔwɔ.

⁹ Moabə tɔɔmun Balakə Sipɔrə lon, ə muhəɠə yɛ kɔ́ pɛlɛ Israɛlə ɓa. Ə Beɔrə lon Balaamə wɛlɛɛ tɔɔ, ka nɛ̨ŋɛ̨n naa mɛ̨nį ɓa.

¹⁰ Kɛlaa, və́ gɛ və́ nwə́li tɔɔ Balaamə woo ɓa, yaamun ə kpaan yɛ lúwɔ́ too kaa, ŋį́ ka kulɔ ɲee ŋą.

¹¹ Ka Ɉurdɛn teen, ka həli Ɉeriko, Ɉeriko tɔɔɓɛlaa di kɔ́ pɛlɛ kaa, diɛ ɓaa: Amɔrə nuą, Perizi nuą, Kanaan nuą, Hɛtə nuą, Girgasə nuą, Hivi nuą, da Ɉebusə nuą. Kɛlaa, ŋį́ di lɔ ka yee ŋą.

¹² Ŋį́ gbeapili kpulu tɛɛ ka ɲɛ̨i tɔwɔ, di Amɔrə tɔɔɓɛlaa hveelɛi kpɛ ka ɲɛ̨i tɔwɔ; ka wɔ kɔ́ kɔ́ ɓɔwaɠaa, da ka wɔ kilɛŋąąi hvəi yili kɛ.

¹³ Ŋį́ lɔi tɛɛ ka pɔ, yii ka hvo mɔ̨nɔ̨ lɔpee ta mįi li mąą mɛ̨nį hu. Taa yiiɠaa ka hvo dɔɔ li, diɛ ka tii ka káá heeni di hu, ŋį́ viɲə yɛaɠaa, da olivə yɛaɠaa tɛɛ ka pɔ, yii kaa hvəi di hin ni. Di ɓáɠaa ka ŋɛ̨i ka káá mįi.»

¹⁴ Ɉosue yɛ diɛ: «Ə həli kɛa kaa! Ka ɲɔw Yai-Laa ɓa, ka tí mą a ka kwəi kwɛlɛɛ, ka lɛɛ nwoo mu. Ɉaliɠaai ka nąnni di kɛi mąąwiɛ Efratə yá pulu pələ, da Eziptə lɔi hu, ka di kulɔ ka lɔwai, ɛlɛɛ, ka tí Yai-Laa ɓa.

¹⁵ Akɛ awala laa a ka lii, ka hvo tí Yai-Laa ɓa, ka ka liiɓa həɠə háákələi! Akɛ ɉaliɠaa ŋɛ̨i wɔlɔ ka nąnni di kɛi kwɛli hvilɛn mą ɲá lee pulu pələ ya ɓə, awala kɛ tii, Amɔrə nuą di wɔ lɔi ŋɛ̨i ka káá heeni ɉu, di wɔ haliɠaa. Nwɛ́i, ɲą́ą́ kwa ɲə́ bɛlɛ́n nuą, ku kaa tíi Yai-Laa ɓa.»

¹⁶ Israɛlə lonnii di Ɉosue woo pulu pənə, diɛ mą: «Ə hvóló kuɔ, kuɔ kɛ ku kaa həɠəi Yai-Laa pulu, kuɔ tí haliɠaa diɛ!

¹⁷ Mąąhɔlɔɓo, Yai-Laa ɓə a ku wɔ Yálá, Yai kwa ku nąnni ku kulɔ Eziptə lɔi hu nuwɔ pɛ́lɛ́i tii mu. Yaa tii, ə mɛ̨nį ɲɛ̨i kɛnɛ̨ kpɛa-kpɛaa kɛ ku ɲɛ̨i ɓa; yaa tii ɓə ɲɛ̨i ə kɛ kuɔ bələ pɔ ɓɛi kpɔ ku kɛi tɛɛ laa, gəlee mą kɛ, nɔiɠaai kpɔ ku tɛɛ ɉu.

¹⁸ Yai-Laa ə nu huwu kəlee kpɛ ku ɲɛ̨i tɔwɔ, gəlee ə mą kɛ, Amɔrə nuą, diɛi a nɔi ŋɛ̨i hu nuą. Kuɔ kpɛli mąn, kwa Yai-Laa ni ɓə ku tɔɔ, ku wɔ Yálá li.»

¹⁹ Ɉosue yɛ Israɛlə lonnii diɛ: «Ka hvo pai pɛli tíi Yai-Laa ɓa, mąąhɔɓo, gaa a Yálá Mąąhəɠɛɛ, Yálá tólɔɔ li, hvo pai niilaai ka wɔ kulɔ nwoo mu laa, da ka wɔ nɛ̨ŋɛ̨nŋąą mu.

²⁰ Ɲələi ka káá pai lənəi la Yai-Laa ɓa, kaa haliɠaa kɔ́, gaa pai heei ka hu, yɛ mɛ̨nį nwąnąąɠaa laa kaa, yɛ ka nwun na pili, ya pa ə gbɛa mɛ̨inɛ̨ɛ̨ kɛ kaa.»

²¹ Israɛlə lonnii diɛ Ɉosue ɓa: «Kpələ! Ku kaa pai lɛɛ a ku kanąn ŋąą Yai-Laa ɓa.»

²² Ɉosue yɛ nuą diɛ: «Kaa kpinįi ɓə a ka kpɔɔ mąą kɛla, kaa kpinįi ɓə hvaa mą kaa lɛɛ Yai-Laa pɔ, ə gɛ, ka tí mą.» Nuą diɛ Ɉosue ɓa: «Ee! Gəla ɓaa kuɔ!»

²³ Ɉosue ə mo kɛa diɛ, yɛ diɛ: «Yii hui ŋɛ̨i, ɉaliɠaa tii gaa ka yəi, ka ka yee kulɔ ɉu, ka gulɔ ka lɔwai, ɛlɛɛ, ka ka lii tínɛ̨n Yai-Laa Israɛlə nwɔ Yálá pɔ pələ.»

²⁴ Nuą diɛ Ɉosue ɓa: «Ku kaa pai tíi Yai-Laa ɓa, Yaai gaa a ku wɔ Yálá, ku lɛɛ nwoo mu.»

²⁵ Ɉosue da Israɛlə lonnii di mįnɛ̨ həɠə a volói tii. Ɉosue ə dɔ́nŋąą, da nɔi yii ɓo pələ lɛ diɛ Sisɛmə daai.

²⁶ Ɉosue ə nwooɠaa tii pɛ̨ɛ̨ Yálá nwɔ tɔ́n ɉɛɓɛ́i hu, yili pulu, ə kwɛni kpuwulu kɛnɛ̨ həɠə, ə dɔɔ gɛɛnąą tii ɓa, nwulu kɛnɛ̨i tii di kɛi Yai-Laa mąąwiɛ gɔwɔ la, mu.

²⁷ Ɉosue yɛ Israɛlə nuą kəlee diɛ: «Kaa gwɛnii ŋɛ̨i kaa, ya ɓə pai kɛi a gu mąą kɛla. Mąąhɔlɔɓo, ə Yai-Laa woo mɛ̨n, ɓɛlɔwai gwa diɛni gu kɛi mɛ̨nį ɓo la. Gaa pai kɛi a ka mąą kɛla, yɛ kpəɲan ka tɔwɔ, ka hvo nee pa ka wɔ Yálá ɓowo.»

²⁸ Yili pulu, Ɉosue ə nu kəlee lɛɛ laa, də li, ɓɛi di həɠə laa di wɔ lɔiɠaa hu.

Ɉosue haa mɛ̨nį

²⁹ Mɛ̨nįɠaa tii tɛɛ pulu, Ɉosue Yálá nwɔ tímun, yai kɛ a Nun lon ɉulɔnu, ə haa; gaa kwɛlan ə kɛ a: kwɛlan nwundɔ̨nɔ̨ kwɛlan bow.

³⁰ Di bowa loo nwɔ lɔi hu, yai kɛ a gwɛlin Timnatə-Sera Ɛfraimə yee ɓa, Gaasə yee ɲánwuɔ̨ pələ.

³¹ Ɉosue yíi hvóló kəlee hu, da galanɉonŋąą ŋɛ̨i lɛɛ Ɉosue pulu, Israɛlə ə lɛɛ Yai-Laa woo mu, mɛ̨nįɠaa kpɔ Yai-Laa ə gɛ Israɛlə mąą mɛ̨nį hu, di kɛ a gəlee kɔ́lɔn ŋąą.

³² Ɉosɛfə kɔ́wɠaa tii Israɛlə lonnii di həɠə la Eziptə lɔi hu, di gɔwɠaa tii loo, díi tii wɔlɔ Ɉakɔbə ə ɲa Hamɔrə lonnii yəi a wali kwələ nwundɔ̨nɔ̨, nąą ɓə di noo laa. Hamɔrə ə kɛ a Sisɛmə nąn. Ɉosɛfə lonnii di gɛɛnąą tii hɔlɔɓo, a di kwɛlin da.

³³ Aarɔn lon Eleazarə ə haa di noo Givea daai, non Pinasə hee taa li kɛ. Di tá gɛɛnąą tii tɛɛ bɔ Ɛfraimə yee ɓa.