Zasua 23 - Yálá laawoo hɛɓɛ (dc)

Ɉosue ə vɛli nuą diɛ

¹ Yai-Laa ə liilaa yɛnɛ̨ɛ̨ tɛɛ Israɛlə lonnii pɔ ɲowoɠaa kəlee lɔwai, ɉu kwɛa, Ɉosue ə pɔlɔ. Gɛɛ kɛa a hulɔgolo,

² nąąlɔwai ɓə ə Israɛlə lonnii kəlee ɲąąkpɔn na; nwɔ kalanɉonŋąą, ɲɛ̨itɔwɔ nuą, nwɔ kiti tee nuą, ə mą kɛ, nwɔ hɛɓɛ́ kɛ nuą, yɛ diɛ: «Ŋą́ą́ pɔlɔ kɛa,

³ mɛ̨nįi Yai-Laa ka wɔ Yálá ə naa nu huwuɠaa ŋɛ̨i diɛ, kaa kpinįi kaa nąą kaa! Yai-Laa ka wɔ Yálá ɓə kɛi gɔɠaa tii kɔ́ a ka wɔ kɔ́.

⁴ Kaa kpinįi ka ɲɛ̨i ɓa mɛ̨nį li, kaa diɛ, nu huwuɠaa ŋɛ̨i kɛ heeni ɓɛ, ŋą́ą́ di heeiɠaa ɲąąkwɛlɛ ka huwuɠaa diɛ, diɛi ŋį́ di huwolo a kɔ́, ə həɠə Ɉurdɛn ɓa, ə həli la gboloyá kɛnɛ̨ ɓa, voló tooi pələ.

⁵ Yai-Laa ka wɔ Yálái yaa kpinįi gaa pai heei di hu ka mąą mɛ̨nį ɓa, yɛ di kpɛ ka ɲɛ̨itɔwɔ; ka káá pai di wɔ lɔi hɔlɔɓoi a ka kwɛlin, yɛ bələi Yai-Laa ka wɔ Yálái ə mo la.

⁶ Yili ɓa tii, ka tɔɔ kɛa a ka nwąnąi! 'Ka ka ɲąąwala, 'ka túwɔ́ yɛlɛ-tɛtɛ; yɛ bələi bɛ̨ɛ̨i la Moisə nwɔ tɔ́n ɉɛɓɛ́i hu! 'Ka hvo ka mąą kwɛa mą! Ka hvo li ŋɛ̨i, ka hvo li ŋɛ̨i!

⁷ Nu huwuɠaa ŋɛ̨i daa lɛɛ ka kwɛlɛ, 'ka hvo humun a di túwɔ́ pələ, 'ka hvo di wɔ haliɠaa hvɛli; 'ka hvo ka kwɛla a di wɔ haliɠaa ta laa, 'ka hvo mąąwiɛ tɛɛ di pɔ, 'ka hvo pɛlɛ di kɔ́wɔ mu.

⁸ Kɛlaa, 'ka kanąn Yai-Laa ka wɔ Yálái ɓa, yɛ bələi kaa gɛ la, aa lɛɛ ɉu háákələi yələ aa həli.

⁹ Ka gɛ tii, nu huwu kpɛa-kpɛaa ŋɛ̨i di hvaŋą kɛnɛ̨ɛ̨, Yai-Laa aa di kpɛ ka tɔwɔ; ka hvo gaai, nu ta hvo pɛli li tɔɔi ka la aa lɛɛ ɉu háákələi aa həli.

¹⁰ Ka tɔ̨nɔ̨ ə kɛi nu waa tɔ̨nɔ̨ kpɛ, mąąhɔlɔɓo, Yai-Laa ka wɔ Yálá ɓə gɔ́ kɔ́ ka yəi, yɛ bələi ə mo la kaa.

¹¹ Ka gɛ kani a nɛlɛɛ ka mąą mɛ̨nį hu, ka Yai-Laa ka wɔ Yálá wɛli la kɛ.

¹² Kɛlaa, ka ka pulu tɔɔ Yai-Laa ɓa, kaa humo a nu huwuɠaai ŋɛ̨i ka kwɛlɛ a diɛ, kaa nɛ̨ą həɠə di pɔɔli, kaa li di pɔɔli; diɛn diɛ pa ka pɔɔli,

¹³ mąąnɛ̨ɛ̨ ka kili ə pu ɉu kaa diɛ Yai-Laa ka wɔ Yálá kaa pai kpɛlai nu huwuɠaai tii kpɛɛ ɓa ka ɲɛ̨itɔwɔ. Di kaa pai kɛi ka tɔwɔ a hɛlɛn, di ɓo a hvaɠa ka kpanaŋą; diɛ yali ka ɲɛ̨i yɛ ɲąąlən, ə lɛɛ ɉu, nɔi lɛlɛɛ ŋɛ̨i Yai-Laa ka wɔ Yálá ə dɛɛ ka pɔ, ka kpɛɛ ɉu.

¹⁴ Ya ka ŋɛ̨i, gáá pai lii háákələi, yɛ bələi yɛnɛ̨ɛ̨ hɛnŋąą kəlee da li la. Kɛlaa, ka gɔlɔn gbɔ a ka lii kəlee, da ka wɔ yɛnɛ̨ɛ̨ kɛ pələ kəlee, kaa kpinįi, kaa diɛ, mɛ̨nįi kpɔ Yai-Laa ka wɔ Yálái ə mo, yɛ hvilɛn na kaa, dɔ̨nɔ̨ kpɛli hvo lɛɛ li pulu, yii naa hvo hvɛɛ li.

¹⁵ Ə həli kɛa kaa! Mɛ̨nį lɛlɛɛɠaai Yai-Laa ka wɔ Yálái ə mo ka laa mɛ̨i, bələi lɔ ə naa hvɛɛ la, bələ lɔ ɓə, mɛ̨nį nwąnąąɠaai ə mo yɛ hvilɛn na kaa, gəlee pɔ mɛ̨nį kaa pai kɛi la, ə lɛɛ la ɉu, nɔi lɛlɛɛ ŋɛ̨i Yai-Laa ka wɔ Yálái ə dɛɛ ka pɔ, ə ka kpɛ ɉu.

¹⁶ Mįnɛ̨i Yai-Laa ka wɔ Yálái da ka nąnnii di ɉəɠə, yai ə naa ka nwuɔ̨, ka ɉukala, kaa hvilɛn haliɠaa pulu, kaa kwɛli hvilɛn diɛ; Yai-Laa nwɔ liiɲąnwąną a ɓɛla ka mɛ̨i, ka kpɛɛ kpɔ a ɉu kpua nɔi lɛlɛɛ ŋɛ̨i ə dɛɛ ka pɔ ɉu.»