Zasua 22 - Yálá laawoo hɛɓɛ (dc)

¹ Nąąlɔwai, Ɉosue ə Rubɛn lonnii, Gadə lonnii, da Manase huwu bələ tɔ̨nɔ̨ lonnii təli,

² yɛ diɛ: «Mɛ̨nįi kpɔ Yai-Laa nwɔ tímun Moisə ə naa ka nwuɔ̨, kaa gəlee kɛ, ɛlɛɛ, kaa lɛɛ nwóó mu, mɛ̨nįɠaa kpɔ ŋį́ ka tí la, kaa gəlee kɛ.

³ Kwɛlan damąą yee mu, aa lɛɛ la ɉu háákələi hvólói aa həli, ka hvo ka nąnnii mąą mɛ̨nį too li lɔi ɓa. Kaa tɔɔ a ka nwąnąi, kaa Yai-Laa ka wɔ Yálá nwɔ tíɓoɠaa kəlee kɛ.

⁴ A kɛ tii kɛa, yii Yai-Laa ka wɔ Yálá aa liilaa tɛɛ ka nąn nonnii pɔ, yɛ bələi ə mo la diɛ, ka pɛli kɛa lii ka pɔ taaiɠaa ɓa, ka pɔ lɔi, yai Yai-Laa nwɔ tímun Moisə ə naa tɛɛ ka pɔ, ɓɛlɔwai gu hvo nii kɛ Ɉurdɛn yá teen ni la.

⁵ Yii lɔ kɛa ka káá gɛi, ya ɓaa: dɔ́nŋąą da bɔ liɛwooɠaa Yai-Laa nwɔ tímun Moisə ə dɛɛ ka pɔ, ka ɉon, ka bɔ mɛ̨nįɠaa kɛ. 'Ka kólo kɛ Yai-Laa ɓa a ka lii kəlee, da, ka yíi pələ kəlee hu, 'ka kanąn nwɔ tɔ́nŋąąi diɛ, 'ka naa hon mo a kwəi tɔ̨nɔ̨ laa.»

⁶ Yili pulu, Ɉosue ə lúwɔ́ too diɛ, ə di lɛɛ laa də li. Nu kəlee ə li ɲəi bɛlɛ́ laaləi.

⁷ Moisə ə wɔlɔ lɔi tɛɛ Manase huwu bələ tɔ̨nɔ̨ pɔ, Basan lɔi hu. Ɉosue ə lɔi tɛɛ Manase huwu bələ tɔ̨nɔ̨i tii lɛɛ bɔ, di nąn nonnii lɔwai Ɉurdɛn yá pulu voló tooi pələ. Diɛ kpɛli mąn, ɓɛlɔwai Ɉosue ə di tɔɔ la bələi, ə lúwɔ́ too diɛ.

⁸ Yɛ diɛ: «Ka káá pənəi ka li ka wɔ pɛlɛ́ɠaai mu a hɛn gɔw kɛnɛ̨, da taatɛlɛɛ kpulu kɛnɛ̨, a wali, hɛni, ɓala kwɛli, kwɛli leelee, da həɠəɠaa, kpɔ tamąą. Ɉɛnŋąąi ka ɉɔlɔɓo a kɔ́ pulu hɛn ka yowoɠaa yəi, ka ɲąąkwɛlɛ, ka ka nąn nonnii ka lɔwai, 'ka di kɔ́.»

Di haláá kulɔi pɛli Ɉurdɛn yá kwɛlɛ

⁹ Bələ ɓə Rubɛn huwu, Gadə huwu, da Manase huwu bələ tɔ̨nɔ̨ di di pulu pənə la, di Israɛlə lonnii lɛɛ Silo Kanaan lɔi hu, də li Galaadə lɔi hu di hee laa, yai di ɉɔlɔɓo a di wɔɔ Moisə yəi, yɛ bələi Yai-Laa ə mo la.

¹⁰ Di həli Gelilotə, Ɉurdɛn yá kwɛlɛ Kanaan lɔi hu; Rubɛn lonnii, Gadə lonnii da Manase huwu bələ tɔ̨nɔ̨i tii, di haláá kulɔi ta pɛli a kwɛni Ɉurdɛn yá kwɛlɛ, a haláá kulɔi kɛnɛ̨, mąąhəɠɛɛ kpɔ a neelee.

¹¹ Israɛlə lonnii di bələ mɛ̨n diɛ kɛ diɛ: «Rubɛn lonnii, Gadə lonnii, da Manase huwu bələ tɔ̨nɔ̨ daa haláá kulɔi ta pɛli a kwɛni Kanaan lɔi tənən ma Gelilotə daai Ɉurdɛn kwɛlɛ, Israɛlə lonnii di wɔ kahin ma pələ.»

¹² Israɛlə lonnii di yili bələ mąn nɔ-o, nu kpulu kəlee ə ɲąąkpɔn Silo daai diɛ li kɔ́ pɛlɛi diɛ.

¹³ Di ɉaláá laa həli mun Eleazarə lon Pinasə tɔɔ, Rubɛn lonnii, Gadə lonnii, da Manase huwu bələ tɔ̨nɔ̨i tii ni pɔɔli Galaadə lɔi hu;

¹⁴ da kalanɉon bow, yiiɠaa kulɔ nu huwu tɛitɛi kəlee lɔwai, gəlee di ɓo a pɛlɛ́ nąmįną Israɛlə kwəliɠaa hu.

¹⁵ Di həli Rubɛn lonnii diɛ, da Gadə lonnii, ə mą kɛ Manase huwu bələ tɔ̨nɔ̨ Galaadə lɔi hu, di nwooɠaa ŋɛ̨i ɓo diɛ,

¹⁶ diɛ kɛ diɛ: «Yai-Laa nwɔ nu huwui kəlee woo ka: Lə ɓə kɛ yaai, ka káá kulɔi Israɛlə Yálá pulu, kaa ka mąąkwɛa Yai-Laa ɓa háákələi? Kaa haláá kulɔi tɔɔ a kaa kpinįi ka wɔɔ, ɛlɛɛ, kaa ka kwɛli tee la tii Yai-Laa ɓa háákələi?

¹⁷ Nɛ̨ŋɛ̨n gu ɉəhə Peɔrə, yili hva pɛli kaa? Gu hvo kpɛli ni gu mąąhəɠə li nɛ̨ŋɛ̨n tii yəi, háákələi, bələi mąn mɔ̨nɔ̨ kɛnɛ̨ ə laa la Yai-Laa nwɔ nu kpului ɓa!

¹⁸ Ya ɓə kaa ŋɛ̨i ka káá həɠəi Yai-La nwɔ pələi mɛ̨i, kaa ka kwɛli tee Yai-Laa ɓa, yɛ pa nwɔ̨nɔ̨ tínąą niiholii Israɛlə nu kpulu kəlee pɔ.

¹⁹ Akɛ nɔi ŋɛ̨i a ka hee lɔi, nɛ̨ŋɛ̨n gaa mą, ka pənə kani ka pa Yai-Laa hee lɔi hu pələ ɓɛi Yai-Laa nwɔ pɛ́lɛ́i kaa laa, ka ka heei kulɔ ku lɔwai. Kɛlaa, ka hvo ka kwɛli tee Yai-Laa ɓa, ə mą kɛ kuɔ, kaa kɛ ka káá haláá kulɔi pɛli, yɛ ka kɛi tolo kulɔ a Yai-Laa gu wɔ Yálái nwɔ haláá kulɔi leelee.

²⁰ Ɲələi Zera lon Akan ə nɛ̨ŋɛ̨n ɉəɠə la ɉɛn kɛ nɛ̨ŋɛ̨n naa mąą mɛ̨nį hu, kɛlɛi Israɛlə lonnii kəlee ɓə níiholi ə yɛɛ di mɛ̨i-yee! Ɛlɛɛ, yaa tɔ̨nɔ̨ hvəi haa nwɔ nɛ̨ŋɛ̨n tii mąą mɛ̨nį hu.»

²¹ Rubɛn lonnii, Gadə huwu, da Manase huwu bələ tɔ̨nɔ̨i tii ni, di Israɛlə kɔlaɠa nwun nąmįną woo pulu pənə diɛ mą:

²² «Yáláɠaa di wɔ Yálá, yii gaa a Hɛn gəlee Nąmu Yálá, gbaɠala kaa mą, ɛlɛɛ, mąąnɛ̨ɛ̨ Israɛlə nuą kəlee di gbaɠala kaa, akɛ kwɛli tee laa ɓə ŋɛ̨i ku ka gulɔi, awala kɛ tii, akɛ ku kulɔ mɛ̨nį Yai-Laa pɔ ɓə ku yii kɛ la; ku nwun və kulɔ ɉu háákələi.

²³ Akɛ ku ɉaláá kulɔi ŋɛ̨i pɛli, ə gɛ ku ku pulu tɔɔ Yai-Laa ɓa, ɛlɛɛ, akɛ ku gɛ tii, ə gɛ, kuɔ haláá yii da gəlee kələn, da liilaa haláá kulɔ gɛɛnąą tii ɓa, Yai-Laa ə ku kiti tee háákələi.

²⁴ Liihɛlɛn mə gɛ kuɔ mɛ̨nįi tii kɛ, mɛ̨nįi tii gɛ nwun gaa mą; hvóló ta, ka lonnii da pɛli kɛi ku lonnii diɛ: ‹Lə mɛ̨nį ɓə ka Yai-Laa Israɛlə nwɔ Yálá ni ka kpɔnŋąąi mą?

²⁵ Yai-Laa ə gu ɲɛ̨n naa gwa gaani, ya ɓaa Ɉurdɛn yá. A kɛ tii, kaai ɓaa: Rubɛn huwu, Gadə huwu da Manase huwu bələ tɔ̨nɔ̨, ka mąą mɛ̨nį hvo hɛlɛn ni Yai-Laa ɓa!› Ka lonnii hvaa woo tii a pɛli ə gɛ, ku wɔ lonnii di hva kɛa ɲɔw Yai-Laa ɓa.

²⁶ Yili ɓə gɛ, kuɔ kɛ ku keeni diɛ: ‹Ka gu ɉaláá kulɔi ŋɛ̨i pɛli, kɛlaa, hvo ɓaa haláá hɛn yii da gəlee kələn, da liilaa haláá di kulɔi.›

²⁷ Kɛlaa, ɉaláá kulɔi ŋɛ̨i kaa a kɛla gwa gaani gu lɔwai, da gu wɔ lonnii, gu haa pulu. Gaa pai nɛ yɛ kɛ ku kaa Yai-Laa nwɔ tíɓo ɓa, a ku wɔ haláá hɛn da gəlee kələn da ku wɔ líílaa halááɠaai kwa gulɔ Yai-Laa ɓa.

²⁸ Ku mo ku kee ɓa kuɔ mą: ‹Da nwoo ŋɛ̨i ɓo tinąą, kwa ku lonnii kuɔ, kwa kɛ diɛ: «Ɉaláá kulɔi ŋɛ̨i wɔlɔ ku nąnnii di dɔɔ, gaa kpɔlɔɔ a Yai-Laa nwɔ haláá kulɔi mąąnįnįn, di hvo yili kɛ li a haláá hɛn yii da gəlee kələn da liilaa haláá kulɔi, kɛlaa, yili kaa a kɛla gwa gaani gu lɔwai.»›

²⁹ Yálá ə ku kihiɓo, kuɔ li ku kwɛli teei Yai-Laa ɓa, ɛlɛɛ, kuɔ ku pulu tɔɔ háákələi Yai-Laa ɓa, kuɔ haláá kulɔi takpɛli pɛli, ɓɛi da haláá yii da gəlee kələn da liilaa haláá kulɔ laa; ə kulɔ Yai-Laa gu wɔ Yálá nwɔ haláá kon mɛ̨i pulu, yaai gaa heeni nwɔ pɛ́lɛ́i laaləi.»

³⁰ Nwooɠaa tii Rubɛn huwu, Gadə huwu, da Manase huwu bələ tɔ̨nɔ̨ di mo, tooi ə mo ɉaláá laa həli mun Pinasə wəlii, da nu kpulu ɲɛ̨itɔwɔ nuą, ə mą kɛ, Israɛlə kɔlaɠa nwun nąmįną, nwoo tii ə nu kəlee lii hon.

³¹ Ɉaláá laa həli mun Eleazarə lon Pinasə, yɛ Rubɛn huwu, Gadə huwu, da Manase huwu bələ tɔ̨nɔ̨ ni diɛ: «Ku kili aa pu ɉu, kuɔ Yai-Laa kaa gu lɔwai, mąąhɔlɔɓo, ka hvo kɛ nɛ̨ŋɛ̨n daaləi tii həɠə li Yai-Laa ɓa, kaa Israɛlə lonnii kulɔ la tii Yai-Laa yəi.»

³² Ɉaláá laa həli mun Eleazarə lon Pinasə da Israɛlə ɲɛ̨itɔwɔ nuą, di yələwala too Rubɛn huwu, Gadə huwu da Manase huwu bələ tɔ̨nɔ̨ diɛ, di həɠə Galaadə lɔi hu, di pənə di pa Kanaan lɔi hu Israɛlə lonnii pɔ, di di woo hukulɔ diɛ.

³³ Yili ə Israɛlə lonnii lii hon, di mąąwiɛ tɛɛ Yai-Laa pɔ, ɛlɛɛ, di wɔ kiliŋąhiɛi tii kɛ diɛ, diɛ kɛ di wolo la Rubɛn huwu, Gadə huwu, da di wɔ lɔi ɓa, di di kili həɠə yili nąą.

³⁴ Rubɛn huwu da Gadə huwu di gɛɛnąą tii laa hee a: «Gaa a kɛla ku lɔwai. Yai-Laa kɛ mɛ̨nį a Yálá mąą kɛla.»