Zasua 21 - Yálá laawoo hɛɓɛ (dc)

Levi lonnii di wɔ taaɠaai

¹ Levi huwu nwɔ pɛlɛ́ nąmįną di pa di həli ɉaláá laa həli mun Eleazarə, Nun lon Ɉosue, da Israɛlə pɛlɛ́ nąmįną kəlee diɛ,

² Kanaan lɔi hu Silo daai, diɛ diɛ: «Yai-Laa ə mo Moisə ɓa, yɛ di taa tɛɛ ku pɔ, da taatɛlɛɛ laa mįi kpomóɠaa, ku wɔ taatɛlɛɛɠaa mąą mɛ̨nį ɓa.»

³ Israɛlə lonnii kwɛlinŋąą lɔwai, di taaɠaa həɠə di dɛɛ Levi huwu pɔ da gwɛlɛ lɔiɠaa, yɛ bələi Yai-Laa ə mo la. Mąą taaɠaa tii laa ka:

⁴ Di gbɛɛn bili, gbɛɛn ə Kehatə lonnii lɛ, ə pənə ə Ɉuda huwu, Simeɔn huwu, da Bɛnɉamɛn huwu, di wɔ taa pow kɔ́w haaɓa tɛɛ Levi huwu taɠaa pɔ, ɉaláá laa həli mun Aarɔn lonnii.

⁵ Di bili nwɔ̨nɔ̨, ə Ɛfraimə huwu, Dan huwu, da Manase huwu bələ tɔ̨nɔ̨, di wɔ taa pow kɔ́w haaɓa tɛɛ Kehatə lonnii pɔ.

⁶ Di pənə di bili, ə Isakarə huwu, Asɛrə huwu, Nɛftali huwu, da Manase huwu bələ tɔ̨nɔ̨, di wɔ taa pow kɔ́w haaɓa tɛɛ Gɛrsɔn lonnii pɔ Basan lɔi hu.

⁷ Rubɛn huwu, da Gadə huwu, da Zabulɔn huwu di taa pow kɔ́w hveelɛ tɛɛ Merari lonnii pɔ a di wɔɔ a gwəliɠaa laa.

⁸ Israɛlə lonnii di daaɠaa tii, da di kwɛlɛ lɔiɠaa tɛɛ Levi huwu hu nuą pɔ, yɛ bələi Yai-Laa ə mo la Moisə ɓa; di daaɠaa tii ɲąąkwɛlɛ a kpɛɛn biliɛ.

⁹ Ɉuda huwu da Simeɔn huwu di wɔ taaɠaai gbɛɛn ə di lɛ, diɛ ka:

¹⁰ Aarɔn lonnii tii a Kehatə yəi gwəlii nuą, diɛi di kaa a Levi huwu, diɛ ɓə gbɛɛn ə di laa kulɔ tɔwɔ.

¹¹ Daaɠaai di dɛɛ di pɔ, diɛ ka: Kiriatə-Arba, Hebrɔn laa ta li kɛ, yii gaa Ɉuda nwɔ yeei ɓa, da gwɛlɛ kpomóɠaa. Arba ə kɛ a Anakə nąn.

¹² Kɛlaa, di daa nwɔ tíi kɛ lɔwɔ tɛɛ Yefunɛ lon Kalɛbə pɔ, da ɲee pɔ taa pɛlɛɛɠaa.

¹³ Di Hebrɔn da nwɔ kpomóɠaa, ɛlɛɛ, Livna da nwɔ kpomóɠaa tɛɛ ɉaláá laa həli mun Aarɔn lonnii pɔ, a nu paa mun mąąkilɛ taaɠaa.

¹⁴ Yatirə da nwɔ kpomóɠaa, Ɛstemoa da nwɔ kpomóɠaa,

¹⁵ Holɔn da nwɔ kpomóɠaa, Devirə da nwɔ kpomóɠaa,

¹⁶ Asan da nwɔ kpomóɠaa, Yuta da nwɔ kpomóɠaa, Bɛtə-Sɛmɛsə da nwɔ kpomóɠaa. Gəlee pɛlɛɛ gee ɓa, gaa a taa mɛ̨inąąn, di daaɠaa tii həɠə nu huwu hveelɛi tii di wɔ taaɠaai hu.

¹⁷ Yii di ɉəɠə Bɛnɉamɛn huwu yəi ya ka: Gabaɔn da nwɔ kpomóɠaa, Gɛva da nwɔ kpomóɠaa,

¹⁸ Anatotə da nwɔ kpomóɠaa, Almɔn da nwɔ kpomóɠaa, taa nąąn.

¹⁹ Aarɔn lonnii ŋɛ̨i a ɉaláá laa həli nuą, daai di ɉɔlɔɓo, ə kɛ a taa pow kɔ́w haaɓa, da di wɔ kpomóɠaa, a daatɛlɛɛɠaa laa mįi.

²⁰ Levi huwu takpɛliɠaa tii lɔ nwɔ̨nɔ̨ a Kehatə lonnii, di taaɠaa hɔlɔɓo Ɛfraimə yəi, kpɛɛn mə di bili diɛ nąą tɛɛ di pɔ.

²¹ Daaɠaai di dɛɛ di pɔ a nu mąąkilɛ taaɠaa, diɛ ka: Sisɛmə, da nwɔ kpomóɠaa, Ɛfraimə yee ɓa, Gɛzɛrə da nwɔ kpomóɠaa,

²² Kivsaimə da nwɔ kpomóɠaa, Bɛtə-Horɔn da nwɔ kpomóɠaa, ə kɛ a taatɛlɛɛ laa mįi taa nąąn.

²³ Yii di ɉəɠə Dan huwu yəi, ya ka: Ɛlteke da nwɔ kpomóɠaa, Gibetɔn da nwɔ kpomóɠaa,

²⁴ Ayalɔn da nwɔ kpomóɠaa, Gatə-Rimɔn da nwɔ kpomóɠaa, taa nąąn.

²⁵ Yii di ɉəɠə Manase huwu bələ tɔ̨nɔ̨ yəi, ya ka: Taanakə da nwɔ kpomóɠaa, Gatə-Rimɔn da nwɔ kpomóɠaa, taa hveelɛ.

²⁶ Kehatə lonnii takpɛliɠaai tii di wɔ taaɠaai ka tii a gwəliɠaa laa, di kɛ a taa pow da di wɔ kpomóɠaa.

²⁷ Daaɠaai di dɛɛ Gɛrsɔn lonnii pɔ, diɛ ɓaa a Levi huwu hu nuą ta, a mąąkilɛ taa, yii di ɉəɠə Manase huwu bələ tɔ̨nɔ̨ yəi, diɛ ɓaa: Golan taa da nwɔ kpomóɠaa, yii gaa Basan lɔi hu, ɛlɛɛ, Beɛstera da nwɔ kpomóɠaa, taa hveelɛ.

²⁸ Isakarə lonnii di wɔ lɔi hu pələ, Kisiɔn da nwɔ kpomóɠaa, Daveratə da nwɔ kpomóɠaa,

²⁹ Yarmutə da nwɔ kpomóɠaa, Ein-Ganimə da nwɔ kpomóɠaa, taa nąąn.

³⁰ Asɛrə lonnii di wɔ lɔi hu, Misealə da nwɔ kpomóɠaa, Avdɔn da nwɔ kpomóɠaa,

³¹ Hɛlkatə da nwɔ kpomóɠaa, Rehɔvə da nwɔ kpomóɠaa, taa nąąn.

³² Nɛftali lonnii di wɔ lɔi hu, daaɠaa di dɛɛ dɔ̨nɔ̨ ɓaa: Kɛdɛsə, ə kɛ a mąąkilɛ taa ta, da nwɔ kpomóɠaa, yii kɛ Galile lɔi hu. Yili pulu, Hamotə-Dɔrə da nwɔ kpomóɠaa, Kartan da nwɔ kpomóɠaa, taa haaɓa.

³³ Gɛrsɔn lonnii di wɔ taaɠaa kəlee pɛlɛɛ gee ɓa, ə kɛ a: taa pow kɔ́w haaɓa, da di wɔ kpomóɠaa.

³⁴ Levi lonnii takpɛliɠaa tii a Merari yəi gwəlii nuą, yii di ɉəɠə Zabulɔn lonnii yəi diɛ dɛɛ di pɔ, ya ka: Yokneamə da nwɔ kpomóɠaa, Karta da nwɔ kpomóɠaa,

³⁵ Rimona da nwɔ kpomóɠaa, Nahalalə da nwɔ kpomóɠaa; taa nąąn.

³⁶ Ɉurdɛn yá pulu Ɉeriko tənən ma, Rubɛn lonnii di wɔ lɔi hu, Bɛsɛrə, nuąi kɛ da nu paa di mąą kilɛ taa li, da nwɔ kpomóɠaa, nɔi pun ɉu, gɛɛ nąą heɛ ɓa, Yasa da nwɔ kpomóɠaa,

³⁷ Kedemotə da nwɔ kpomóɠaa, Mefaatə da nwɔ kpomóɠaa; taa nąąn.

³⁸ Gadə lonnii di wɔ lɔi hu, daaɠaai di di tɛɛ, dɔ̨nɔ̨ ə kɛ a mąąkilɛ taa, ya ɓaa: Ramotə, yii kɛ Galaadə lɔi hu, da nwɔ kpomóɠaa, Mahanaimə da nwɔ kpomóɠaa,

³⁹ Hɛsbɔn da nwɔ kpomóɠaa, Yazerə da nwɔ kpomóɠaa; taa nąąn.

⁴⁰ Levi lonnii takpɛliɠaa tii a Merari yəi gwəlii nuą, daaɠaai lɛɛ di yəi, gəlee pɛlɛɛ gee ɓa, di kɛ a taa pow kɔ́w hveelɛ. Di di kɔ́ a kpɛɛn.

⁴¹ Levi lonnii di wɔ taaɠaai kɛ di yəi Israɛlə lɔi hu, di kɛ a taa pow nąąn gɔw mɛ̨ihaaɓa, da di wɔ kpomóɠaa ɓɛi daatɛlɛɛɠaa da di laa mįi laa.

⁴² Daaɠaa kpɔ tii di di hvaa ɓo, di kɛ pələ ə kɛ lɔ tii.

⁴³ Nɔi Yai-Laa ə naakwɛlanmo yɛ gaa dɛɛi Israɛlə galaɓɔlɔni pɔ, ə gəlee tɛɛ Israɛlə lonnii pɔ, di hee laa.

⁴⁴ Bələi lɔ Yai-Laa ə naakwɛlanmo la di nąnni diɛ, bələ ɓə ə gɛ la; a liilaa lɔi, ɲee kəlee hu. Di yowo ta hvo pɛli tɔɔi di la. Yai-Laa ə di yowoɠaa kəlee lɔ di yee ŋą.

⁴⁵ Nwoo lɛlɛɛɠaa kpɔ Yai-Laa ə mo Israɛlə nwɔ pɛ́lɛ́i ɓa, da lɔpee hvo lɛɛ a kpɛli, gəlee pɔ mɛ̨nį ə kɛ.