Zasua 20 - Yálá laawoo hɛɓɛ (dc)

Nu mąąkilɛ taaɠaa

¹ Yai-Laa yɛ Ɉosue ɓa:

² «Mo Israɛlə lonnii diɛ, yɛ́ diɛ: Nu mąąkilɛ taaɠaa ŋɛ̨i ŋį́ di mąą mɛ̨nį ɓo Moisə ɓa, yɛ mo kaa, ka di həɠə ɉu.

³ Nui a nu paa dɛɠii pələ, hvo naa li gwəi, daaɠaa tii ta hu ɓə mɛ̨nį kalamun tii a pɛli mąąkilɛi laa. Bələ ɓə, ka pɛli mąą nu kulɔi la ɲąmą kwələ kulɔmun ɲəi.

⁴ Nu paamun tii a pu, a li daaɠaa tii ta hu, a tɔɔ daa mąąkpɛ hįį gbon na, bələi mɛ̨nį ə tɛɛ la, ə ɉukulɔ daa kalanɉonŋąą diɛ. Yiliɠaa di di yee hee nui tii mu di wɔ taai hu, di kɛɛnąą ta tɛɛ bɔ ə hee laa da diɛni.

⁵ Ɲąmą kwələ kulɔmun a hvilɛn bulu, a pa laa daai, di hva nu paamun tii tɛɛ bɔ. Mąąhɔlɔɓo, hvo gili hvo mɛlan gaalon tii paa, hvo kɛli yowolaa kulɔ la a bɔlɔ pɔlɔ.

⁶ Nu paamun tii a lɛɛ laa daai tii hu, ɛlɛɛ, di giti tee nɔi lonnii ɲɛ̨i ɓa. Nu paamun tii, a lɛɛ mąąkilɛ taa hu, ə lɛɛ ɉu ɉaláá laa həli mun tii a kɛ laa nąąlɔwai, ə haa. A kɛ tii, nu paamun tii a pɛli mą kɛa ə pənə ə li bɔ taai, ə hee ɲəi bɛlɛ́ laaləi, ɓɛi ə kɛ laa a bɔlɔ yɛ pu.»

⁷ Israɛlə lonnii di Kɛdɛsə taa həɠə ɉu, Galile lɔi hu, Nɛftali yee ɓa, da Sisɛmə, Ɛfraimə yee ɓa, da Kiriatə-Arba yai a Hebrɔn laa ta, Ɉuda yee ɓa.

⁸ Ɉurdɛn pulu pələ, Ɉeriko voló həɠəi pələ, di Bɛsɛrə kɛ a nu mąąkilɛ taa ta nɔi pun ɉu, Rubɛn nwɔ yeei ɓa, da Ramotə-Galaadə, Gadə nwɔ lɔi hu, ɛlɛɛ, Golan, Basan lɔi hu, Manase huwu nwɔ taai ta li kɛ.

⁹ Daaɠaa tii ɓə di gɛ a mąąkilɛ taa; yɛi kɛ a Israɛlə lon da, awala kɛ tii nwɛ̨ą yii ɉeɛɛ kaa di kɔ́wɔ mɛ̨i, nui lɔpee kɛ a nu paa yii hvo gili ɓo li, daaɠaa tii ta hu ɓə a li ə mąąkilɛ laa. Bələ ɓə kɛ ɲąmą kwələ kulɔmun hva pɛli kɛ ɲąmą pumun baai la, yai nu kpulu hvo ni giti tee li.