Zasua 2 - Yálá laawoo hɛɓɛ (dc)

Ɉosue ə́ kɔ́ nɛ̨lɛ̨ɛ̨n naa kɛ nuą tɔɔ Ɉeriko

¹ Di lɛɛ Sitimə lɔi hu, Nun lon ɉulɔnu Ɉosue, ə nu hveelɛ tɔɔ, diɛ li kɔ́ nɛ̨lɛ̨ɛ̨n naa kɛi; yɛ diɛ: «Ka li, ka Ɉeriko lɔi hu kaa.» Di li di lɔ wɛlikɛ nɛ̨ɛ̨nu ta yəi bɛlɛ́n, yii di kɛi kɛ naa ɓaa Rahabə, di lɛɛ laa.

² Nuą di li di ɉukulɔ Ɉeriko tɔɔmun ma, diɛ mą: «Israɛlə nuą di háá pa ɓɛ a kpinį, nɔi hu kaai.»

³ Tɔɔmun ə nu ta tɔɔ Rahabə pɔɔli, diɛ mą: «Nuąi ŋɛ̨i háá pa ɓɛ, di kulɔ ku di kaa; mąąhɔlɔɓo di pa nɔi ŋɛ̨i pulu kwɛli mɛ̨nį ɓa.»

⁴ Kɛlaa, Rahabə ə nu hveelɛi tii həɠə, ə di loo, yili pulu ə nuąi tii woo pulu pənə yɛ diɛ: «Teą li, nuąi tii di pa ɓɛ, kɛlaa, və́ kɛ di həɠəi kɔ́lɔn.

⁵ Yii kɛa hvitili ə kɛi pu, diɛ pa ɉį́i laa kpului, nuąi tii di kulɔ, ɓɛ pələi də li la, və́ nąą pələ kɔ́lɔn, ka hvilɛn di pulu, ka káá pai di hon ɉii.»

⁶ Kɛlaa, aa kɛ di tɛ ɲəi gbaan ɉu, aa di mɛ̨ikpulu a yee konŋąą.

⁷ Nuą di hvilɛn bələ ɓa diɛ li Ɉurdɛn kwɛlɛ pələ, ɓɛɠaai ŋɛ̨i da ɲa teen nąą di kɔ́ɔn ŋą. Di ɉį́i laa kpulu di pulu pələ.

⁸ Ɉosue nwɔ nu hveelɛi tii, di hvo kɛi yii, Rahabə ə tɛ di pɔ gbaan ɉu.

⁹ Yɛ diɛ: «Ŋį́ gɔlɔn gɛ́ diɛ Yai-Laa aa nɔi ŋɛ̨i tɛɛ ka pɔ, ka pa mɛ̨nį ɓɛ, mąą tín aa too, kpɛlin aa too nɔi nuą kəlee hu.

¹⁰ Ɛlɛɛ, pələi Yai-Laa ə gboloyá kpala la ka tɔwɔ, kwaa yili bələ mɛ̨n, ɓɛlɔwai ŋɛ̨i ə ka kulɔ la Eziptə lɔi hu; ə mą kɛ, mɛ̨nįi ka naa Amɔrə tɔɔɓɛlaa hveelɛi ɓa Ɉurdɛn pulu pələ. Diɛi a Sihɔn da Ogə, diɛi ka di paa.

¹¹ Kwaa bələ mɛ̨n, ɛlɛɛ hvaŋą aa kpɛɛ ku yəi. Tín aa nu kəlee hon ka tɔwɔ, mąąhɔlɔɓo Yai-Laa ŋɛ̨i gaa a ka wɔ Yálá, ya ɓə gaa a yələkɔlɔn ɉu Yálá yɛ ɓo a lɔi mɛ̨i Yálá.

¹² A kɛ tii kɛa, ka ka kwɛla a Yai-Laa laa, kaa diɛ; bələi ŋɛ̨i ŋį́ ka hon na a nɛlɛɛ, ka káá lɔ pai ɲą́ą́ kwa ɲə́i bɛlɛ́n nuą ku hon ɉii tii a nɛlɛɛ. Ka kɔ́lɔn ɉɛn da tɛɛ bɔ́,

¹³ yii a nɛ yɛ diɛ ka káá pai ną́n, néé, néé lonnii hinąą da néé lonnii nɛ̨ą lɛɛi a di húlu, da di yəi hɛnŋąą kəlee.»

¹⁴ Ɉinąąi tii di mo mą, diɛ mą: «Akɛ ya wala ku pulu kulɔ, kwa lɛɛ a ku húlu, yɛ́, ka ə́ yəi bɛlɛ́n nuą ka lɛɛ a ka húlu, ɓɛlɔwai Yai-Laa kaa pai nɔi ŋɛ̨i tɛɛ la ku pɔ; kwa ə́ wɔ túwɔ́ pələ lɛlɛi ŋɛ̨i gwələ kulɔ yɛ́.»

¹⁵ Nɛ̨ɛ̨nui tii, ə di kulɔ ɲəi vinɛtɛlɛ la, ə di yɛɛ a yɛli ɉį́i pulu pələ. Mąąhɔlɔɓo, nwɔ pɛ́lɛ́i ə kɛ tɔɔ ni daa mąą kpɛ hį́i hu.

¹⁶ Yɛ diɛ: «'Ka li, ka ka loo ɲee koo mu, ka lɛɛ laa hvóló haaɓa yee mu, ə lɛɛ ɉu nuąi li ka kwɛlii di di pulu pənə, ka pɛli kɛa kulɔi ka li.»

¹⁷ Ɉinąą tii diɛ mą: «Ku wooi tii ku gwɛlɛ yɛ́, ku ka pai lɛɛi bulu.

¹⁸ Ɓɛlɔwai ku kaa pai lɔi la nɔi ŋɛ̨i hu, ɲee kali kpɔlui ŋɛ̨i ə́ gbulɔn ə́ wɔ finɛɛtɛlɛ ɓa, ɓɛi ə́ ku yɛɛ laa. Yili pulu, ə́ nąn, ə́ lee, ə́ lee lonnii ɉinąą mąn da nɛ̨ąą mąn, ə́ di lɔ ɓɛ ə́ yəi bɛlɛ́n.

¹⁹ Ɓɛlɔwai kwa pa pai la ɓɛ, ə́ wɔ nui lɔpee a kulɔ ɓɛ ə́ yəi bɛlɛ́n, ɲąmą wulu a lɛɛ gbɔwɔ nwuɔ̨, ku hɔn va kɛ ɉu. Kɛlaa, nui lɔpee gaa ɓɛ ə́ yəi bɛlɛ́n, mɛ̨nį ta a kɛ a da, nwulu a lɛɛ ku nwuɔ̨.

²⁰ Kɛlaa ya ku pulu kulɔ, ku wooi tii ku gwɛlɛ yɛ́, a lɛɛ a kpɛli.»

²¹ Yɛ diɛ: «Bələi tii ka mo la, bələ ɓə gaa pai gɛi la.» Yili pulu, ə di tɔɔ bələi, di li. Nąąlɔwai, ə ɲee kpɔlui tii hɛlɛn ɲəi vinɛtɛlɛ la.

²² Nuąi tii di tɛɛ diɛ li, di li ɲee ɓa pələ, di di loo ɛlɛɛ ɉu hvóló haaɓa, di lɛɛ la nuąi li di kwɛlii, di pənə di pa, daa kɛ di kwɛli, di hvo di kaa.

²³ Nu hveelɛi tii di kulɔ kɛa di loo pələi, di Ɉurdɛn ya teen, di li Nun lon ɉulɔnu Ɉosue pɔɔli, mɛ̨nįɠaai tɛɛ, di gəlee nwoo hukulɔ kɛ.

²⁴ Di mo Ɉosue ɓa, diɛ mą: «Kwaa gaa kpɔ kuɔ diɛ Yai-Laa aa nɔi tii tɛɛ gu pɔ, mąąhɔlɔɓo, gu mąą mɛ̨nį aa kpɛlin doo nɔi nuą kəlee hu.»