Zasua 18 - Yálá laawoo hɛɓɛ (dc)

Di nɔi kpəli kɔ́ a kpɛɛn nu kpəliɠaa lɔwai

¹ Israɛlə lonnii kəlee di di ɲąąkpɔn Silo, di gee kaa kələ tɔɔ laa. Nɔi nąą kəlee ə ɓo di yee mu.

² Kɛlaa, Israɛlə lonnii lɔwai, nu huwu mɛ̨ihveelɛ ɓə lɛɛ, di hvo ni kɛ di hee lɔi hɔlɔɓo li.

³ Ɉosue yɛ Israɛlə lonnii diɛ: «Ka káá pai lɛɛi heeni hvo kɛ li mįnɛ̨ lɔwai, nɔi ŋɛ̨i Yai-Laa ka nąnni di wɔ Yálái ə dɛɛ ka pɔ, kaa gbəli nąą həɠə mɛ̨nį viikpɛɛ kulɔ?

⁴ Ka hinąą haaɓa haaɓa həɠə ɉį́iɠaa kəlee lɔwai, ə gɛ ŋį́ di tɔɔ, di li di nɔi hu hiɛ; da pa, pələi di gaa la, di ɉukulɔ guɔ.

⁵ Yili pulu, diɛ tii ɓə pai nɔi ɲąąkwɛlɛi ɉu mɛ̨ihveelɛ, Ɉuda huwu ə lɛɛ nwɔ lɔi hu ɉɛɠɛ pələ, Ɉosɛfə yəi bɛlɛ́n nuą di lɛɛ di wɛi ɓa ɲánwuɔ̨ pələ.

⁶ Kaa kpinįi ka nɔi hee pələ kaa, ka ɲąąkwɛlɛ ɉu mɛ̨ihveelɛ, ka kəlee ka pa nííla, ə gɛ, ŋį́ gɔ́ a kpɛɛn, ɓɛ Yai-Laa gu wɔ Yálá lííla.

⁷ Yii hvilɛn na Levi lonnii diɛ, di wɔɔ nąą hvo nɔi mɛ̨nį hu, Yai-Laa nwɔ haláá kulɔi ɓə gaa a di wɔɔ nąą. Yii ɓaa Gadə lonnii, Rubɛn lonnii, da Manase huwu bələ tɔ̨nɔ̨, daa di heei hɔlɔɓo Ɉurdɛn yá pulu, voló həɠəi pələ, ɓɛi Yai-Laa nwɔ tímun Moisə ə nąą tɛɛ di pɔ.»

⁸ Nuąi tii di həɠə di li. Nuąi tii kɛi li nɔi mąą kpɛɛi, di kɛi lii, Ɉosue yɛ diɛ: «'Ka li ka nɔi hu hiɛ, ka pa ka gwɛlan mo too mą́ą́, ə gɛ, gu ɲąąkwɛlɛ a kpɛɛn ɓɛ Silo Yai-Laa lííla.»

⁹ Nuą tii di li, di nɔi hu hiɛ nąą kəlee, di gɛ pələ pɛ̨ɛ̨ a daaɠaa laa, a ɉeei mɛ̨ihveelɛ, yili pulu, di pa kɛa Ɉosue pɔ Silo daai.

¹⁰ Ɉosue ə gbɛɛn bili di lɔwai Yai-Laa ɲɛ̨i ɓa Silo daai. Ɉosue ə nɔi ɲąąkwɛlɛ Israɛlə lonnii lɔwai yɛ bələi lɔ wɔlɔ di nɔi ɲąąkwɛlɛ la.

Bɛnɉamɛn nwɔ lɔi

¹¹ Gbɛɛn bilii di mo, Bɛnɉamɛn huwu laa ə kulɔ a gwəliɠaa laa; nɔi lɛɛ di yəi a di hee lɔi, ə kɛ Ɉuda lonnii da Ɉosɛfə lonnii di wɔ lɔi lɔwai.

¹² Di ɲɛ̨n ə kɛi həɠə Ɉurdɛn ya ɓa ɲələi pələ, yɛ laa a Ɉeriko koo, yɛ tɛ ɲələi pələ, yɛ tɛ ɲee ɓa, voló ɓɛlai pələ, yɛ pu nɔi pun ma Bɛtə-Awɛn daai.

¹³ Di ɲɛ̨n ə kɛi həɠə laa yɛ li Luzə, yɛ laa Luzə yee koo ɓa ɉɛɠɛɛ pələ, ya ka tii Betɛlə pələ. Di ɲɛn ə kɛi yɛɛ Atrotə-Adarə, ɲeei tii Bɛtə-Horɔn ɉɛɠɛɛ, gɔwɔ mu.

¹⁴ Di ɲɛn ɉu ə kɛi hee, yɛ tínɛ̨n voló tooi ɉɛɠɛɛ pələ, ə kɛi həɠə Bɛtə-Horɔn ɉɛɠɛɛ pələ yee tənən ma, yɛ hvilɛn Kiriatə-Baalə ɓa, gɛɛnąą tii laa ta ɓaa nwɔ̨nɔ̨ kɛ a: Kiriatə-Yearimə, Ɉuda lonnii di wɔ taa ta li kɛ. Bələ ɓə di ɲɛn ə kɛ la voló tooi pələ.

¹⁵ Ɉɛɠɛɛ pələ ɲɛ̨n kpala ə kɛi tɔɔ Kiriatə-Yearimə ɓa, yɛ ɉaŋą Iyimə daai pələ, yɛ həli la Nɛftoa ya nwun gulɔi.

¹⁶ Ə kɛi yɛɛ ɲee kpɛlai, Bɛn-Hinɔmə ɓoloon tənən ma, Refaitə nuą di wɔ yɛɛ kɔwɔ ɲánwuɔ̨ pələ, ə kɛi laa a Hinɔmə ɓoloon, yɛ hee Ɉebusə nuą di wɔ lɔi ɓa ɉɛɠɛɛ pələ, yɛ hee Ein-Rogɛlə ɓa.

¹⁷ Ɉu ə kɛi hee ɲələi pələ, yɛ hvilɛn Ein-Sɛmɛsə da Gelilotə diɛ, Adumin yee tənən ma, yili pulu, yɛ yɛɛ Rubɛn lon Bohan nwɔ kwɛnii ɓa.

¹⁸ Ə kɛi tɛ Kɛtɛfə daai, Ɉurdɛn ɲá-ɓoloon bɔ lɔi pɔ pələ.

¹⁹ Nɔi ɲɛ̨n ə kɛi laa a Bɛtə-Hɔgla koo ɲələi pələ, yɛ hvilɛn ɓɛi tii gboloyá kpɔlu ɓa ɲələi pələ, ɓɛi tii Ɉurdɛn a pu laa gboloyá ɓa ɉɛɠɛɛ pələ. Yili ɓə kɛ a di ɲɛ̨n ɉɛɠɛɛ pələ.

²⁰ Voló həɠəi pələ, di ɲɛ̨n ma kɛ a Ɉurdɛn. Bɛnɉamɛn lonnii hee lɔi ka tii a gwəliɠaa laa.

²¹ Bɛnɉamɛn huwu nwɔ taaɠaai heekpəlin na kɛɛ kɛ a gwəliɠaa laa: Ɉeriko, Bɛtə-Hɔgla, Emɛkə-Kesisə,

²² Bɛtə-Araba, Semaraimə, Betɛlə,

²³ Avimə, Para, Ɔfra,

²⁴ Kefarə-Amona, Ofni, Gɛva: gəlee pɛlɛɛ gee ɓa, taa kpɛa-kpɛaa pow kɔ́w hveelɛ, da di yee mu taa pɛlɛɛɠaa.

²⁵ Gabaɔn, Rama, Beerotə,

²⁶ Mispe, Kefira, Mosa,

²⁷ Rɛkɛmə, Yirpeɛlə, Tareala,

²⁸ Sela, Elɛfə, Ɉebusə, Ɉerusalɛmə laa ta li kɛ, Givea, Kiriatə-Yearimə: gəlee pɛlɛɛ gee ɓa, taa kpɛa-kpɛaa pow kɔ́w nąąn, da di yee mu taa pɛlɛɛɠaa. Bɛnɉamɛn lonnii hee lɔi ka tii a gwəliɠaa laa.