Zasua 17 - Yálá laawoo hɛɓɛ (dc)Manase huwu nwɔ lɔi 1 Manase lonnii di wɔ lɔi ka: Ɉosɛfə lon dɔlɔɔ li kɛ. Manase lon dɔlɔɔ ɓaa kɛ a Makirə, Galaadə nąn, ə Galaadə lɔi hɔlɔɓo, da Basan, mąąhɔlɔɓo, ə kɛ a kɔ́kuláá. 2 Manase lonnii takpɛliɠaai tii di wɔ lɔi ka; a gwəliɠaa laa, Aviɛzɛrə lonnii, Helɛkə lonnii, Asriɛlə lonni, Sɛkɛmə lonni, Hefɛrə lonnii da, Semida lonni; yiliɠaai ɓaa, Ɉosɛfə lon Manase lon ɉinąą, yɛ bələi di huwu kaa la, di hee kpəlin na kɛɛ a di wɔ kwəliɠaa laa. 3 Selofehadə, yai kɛ a Hefɛrə lon, Galaadə lon, Makirə lon, Manase lon, hvo lon ɉulɔnu kaa; nɛ̨ąą lɔ ɓə ə di kaa, di laa ka: Mala, Noa, Hogla, Milka da Tirsa. 4 Di pa di həli ɉaláá laa həli mun gɛnɛ̨ Eleazarə ɓa, da Nun lon Ɉosue, da nɔi ɲɛ̨itɔwɔ nuą, diɛ diɛ: «Yai-Laa ə mo Moisə ɓa, yɛ di ku hee lɔi tɛɛ ku pɔ ku nąn nonnii lɔwai.» Di lɔi tɛɛ di pɔ di nąn gaayɔwɔɠaa lɔwai, yɛ bələi Yai-Laa ə mo la. 5 Lɔi pow ɓə lɛɛ Manase yəi; Galaadə da Basan di laa kulaa ɉu, Ɉurdɛn pulu pələ; 6 mąąhɔlɔɓo, Manase lonnii nɛ̨ą di lɔi hɔlɔɓo Manase lon ɉinąą lɔwai. Kɛlaa, Galaadə ə nɔi lɛɛ Manase lonnii takpɛliɠaai tii yəi. 7 Manase nwɔ lɔi ɲɛn ə kɛi həɠə Asɛrə, yə həli Mikmetatə, Sisɛmə tənən ma; ə kɛi ɉaŋąą Yamimə tənən ma pələ, Ein-Tapua pɔ pələ. 8 Tapua lɔi ə kɛ Manase yəi, kɛlaa Tapua taai yii kɛ Manase nwɔ ɲɛ̨n ɓa, ə kɛ Ɛfraimə yəi. 9 Nɔi ɲɛ̨n ə kɛi yɛɛ Kana yá ɓa ɉɛɠɛɛ pələ, daaɠaai tii di kɛ Ɛfraimə yəi Manase nwɔ taaɠaai lɔwai. Ɲá nwuɔ̨ pələ, Manase ɲɛ̨n ə kɛi həɠə ɲá ɓa, yɛ pu gboloyá ɓa. 10 Ɉɛɠɛɛ pələ ə kɛ Ɛfraimə yəi, ɲələi pələ ə ɓo Manase yəi. Gboloyá ɓə kɛ a di ɲɛ̨n. Di kɛi tunwɔ̨n Asɛrə ɓa ɲánwuɔ̨ pələ, diɛ tunwɔ̨n Isakarə ɓa voló ɓɛlai pələ. 11 Isakarə da Asɛrə di wɔ lɔi hu, Bɛtə-Sean da ɲeemu taaɠaa di kɛ Manase yəi, da Yivleamə ə mą kɛ ɲeemu taaɠaa, Dɔrə taa da ɲeemu taaɠaai, Ein-Dɔrə da ɲeemu taaɠaa, Taanakə da ɲeemu taaɠaa, Megido da ɲeemu taaɠaa. Ɲee lɔwai taa haaɓai diɛ kpɛli. 12 Kɛlaa, yɛ bələi Manase lonnii di yee hvo pɛli la daaɠaai tii kəlee diɛ, yili ɓə gɛ Kanaan nuą diɛ lɛɛ hee ni nɔi. 13 Kɛlaa, yii kɛa Israɛlə nuą hvaŋą ə kɛnɛ̨, Kanaan nuą di lɛɛ di yeemu a luwɔɠaa, diɛ pɔlɔtɛ koló kɛ diɛ; di hvo di kulɔ nɔi. 14 Ɉosɛfə lonnii diɛ Ɉosue ɓa: «Lə ɓə kɛ yai hvo kɛ ku hee lɔi kɛ li kɛnɛ̨, yaan ku ɓo a nu kpulu kɛnɛ̨ Yai-Laa nwɔ lúwɔ́ ə ɓo ku mɛ̨i?» 15 Ɉosue yɛ diɛ: «Akɛ ka kpulu kɛnɛ̨ɛi yɛ bələi ka ka moi la, ka li Perizi nuą da Refaitə nuą di wɔ lɔwɔi hu, ka nwɛlai tii mɛ̨i yali a ka wɔɔ; hvo gaai Ɛfraimə ɲee lɔi hvo kɛnɛ̨ li ka mąą mɛ̨nį ɓa.» 16 Ɉosɛfə lonnii diɛ mą: «Ɲee ɓa lɔi hva pɛli kuɔ, yili pulu nwɔ̨nɔ̨, kwɛli wotoloɠaa kaa, Kanaan nuąi kəlee yəi diɛ heeni nɛ̨ŋɛ̨ lɔi hu, da yiiɠaai di kaa Bɛtə-Sean da gwɛlɛ lɔiɠaa hu, ə mąkɛ yiiɠaai Izreɛlə nɛ̨ŋɛ̨ lɔi hu.» 17 Ɉosue yɛ Ɉosɛfə nwɔ pɛ́lɛ́i mu nuą diɛ, diɛ ɓaa: Ɛfraimə da Manase lonnii, yɛ diɛ: «Ka káá a nu kpulu kɛnɛ̨ɛ̨, yii hvaŋą kaa ɲəi kɛnɛ̨, ka wɔ lɔi hvo pai lɛɛi lɔ tanɔ̨n. 18 Kɛlaa, ɲee ɓa lɔwɔɠaai tii kəlee kaa a ka wɔɔ, ka gəlee mɛ̨i yali, ə lɛɛ ka yəi, ka Kanaan nuąi tii kpɛ laa nɔi, pələi mąn kwɛli wotolo kaa la di yəi, ə lɛɛ di hvaŋą kɛnɛ̨ɛ̨.» |