Zasua 14 - Yálá laawoo hɛɓɛ (dc)

Kanaan lɔi ɲąąkwɛlɛ mɛ̨nį

¹ Nɔiɠaai Israɛlə lonnii di ɉɔlɔɓo a di wɔ Kanaan lɔi hu, diɛ ka: diɛ kɛ a nɔiɠaai ɉaláá laa həli mun Eleazarə, Nun lon Ɉosue da Israɛlə lonnii ɲɛ̨itɔwɔ nuą, di dɛɛ di pɔ a di hee lɔi.

² Di nɔi ɲąąkwɛlɛ a kpɛɛn bilɛɛ, nu huwu mɛ̨inąąn tii lɔwai, yɛ bələi Yai-Laa ə gbɛa mo la Moisə ɓa.

³ Moisə aa kɛ lɔi tɛɛ huwu hveelɛ da gbulɔ pɔ, ɓɛlɔwai di hvo ni kɛ Ɉurdɛn teen ni la; kɛlaa, Moisə hvo lɔi tɛɛ Levi huwu hu nuą pɔ di ɓɛlaa lɔwai.

⁴ Ɉosɛfə lonnii di kɛ a nu huwu hveelɛ, Manase da Ɛfraimə; ə lɛɛ, di hvo hɛn da tɛɛ Levi huwuhu nuą pɔ nɔi hu, ə kulɔ lɔ di hee taɠaa pulu, da daaɠaai tii kwɛlɛ yɛɛ kɔwɔɠaa, di wɔ taatɛlɛɛɠaa da di yəi hɛnŋąą mąą mɛ̨nį ɓa.

⁵ Israɛlə lonnii di gɛ yɛ bələi Yai-Laa ə mo la Moisə ɓa, di nɔi ɲąąkwɛlɛ.

⁶ Ɉuda nu huwu di pa di Ɉosue kaa Gilgalə, Yefune lon Kalɛbə, yii kulɔ Kenizi pɛ́lɛ́i mu, yɛ Ɉosue ɓa: «Mɛ̨nįi Yai-Laa ə mo Yálá nwɔ nu Moisə ɓa Kadɛsə-Barnea, yɛ hvilɛn na gwa yɛ́ guɔ, gbaɠala kaa yɛ́.

⁷ Gu kɛɛ Kadɛsə-Barnea gáá kwɛlan ə kɛ pow nąąn ɓɛlɔwai Yai-Laa nwɔ tímun Moisə ə dɔ́ɔ́ la, gɛ́ gɔ́ nɛ̨lɛ̨ɛ̨n naa kɛ nɔi hu, ŋį́ nwóó hu kulɔ mą, yɛ bələi ŋį́ mɛ̨nįɠaa kaa la.

⁸ Nán nonnii tii kwa diɛ ni kwəli, di yá laa nuą kɔ́lɔi, kɛlaa nwɛ́i, vílɛn ŋąą kɛ Yai-Laa pulu, nwɔ́ Yálá, və́ tɔɔ takpa-takpa.

⁹ Volói tii, Moisə ə gwɛla a nwooi ŋɛ̨i, yɛ mą: ‹A tɛ̨ą, nɔi tii ə́ kɔ́wɔ ə tɛɛ ɉu, gaa pai kɛi a ə́ hɔlɔɓo lɔi a yələ kəlee da nwɔɔ, yɛ́ ka ə́ lonnii, mąąhɔlɔɓo ə́ hvilɛn Yai-Laa ə́ wɔ Yálá pulu, ɲinɛ̨-ɲinɛ̨n və kɛ ə́ hu.›

¹⁰ Ya ka tii yiihu, Yai-Laa a yɛnɛ̨ɛ̨ kpɛɛ hvo mą tɛɛ bɔ́, yɛ bələi ə mo la ə həɠə ɲələi Yai-Laa ə nwooi tii ɓo la Moisə ɓa, ɓɛlɔwai Israɛlə ə kɛ la hiɛ hu, nɔi pun ɉu. Gwɛlan bow nąąn gɔw lɔɔli ka, gáá kwɛlan aa həli pow mɛ̨ihaaɓa gɔw lɔɔli hu, yiihui ŋɛ̨i kɛa.

¹¹ Yii laa hu, váŋą kɛnɛ̨i lɔ ni yɛ ɓɛlɔwai Moisə ə dɔ́ɔ́ la ɉiɛ ɓa. Váŋą kaa lɔ yiihu yɛ yii kɛ ɲə́i, gɛ́ pɛli kɔ́ kɔ́i la, gɛ́ dɔ́ɔ́i mąąkɔ̨nwɔ̨.

¹² Ɲee ŋɛ̨i tɛɛ kɛa bɔ́, ya ɓə Yai-Laa ə vaa ɓo a volói tii. Kɛlɛi ə́ bələ mɛ̨n a yələ ta diɛ kɛ Anakə nu huwu kaa laa da taa kpɛa-kpɛa, di mąą tínɛ̨n ŋąą a hįi. Kɛlaa, Yai-Laa a tɔɔ búlu, gáá pai di kpɛi laa, gɛ́ hee laa, yɛ bələi Yai-Laa ə mo la.»

¹³ Ɉosue ə lúwɔ́ too Yefunɛ lon Kalɛbə ɓa, ə Hebrɔn tɛɛ bɔ a ɉee lɔi.

¹⁴ Hebrɔn lɛɛ mɛ̨nį Yefunɛ lon Kalɛbə yəi, yai kɛ a Kenizi pɛlɛ́ mu mun, yɛ kɛ a ɉee lɔi, nwun ga tii; lɛɛ ɓə ə mo Yai-Laa, Israɛlə nwɔ Yálá pulu kwəi tɔ̨nɔ̨ laa hu.

¹⁵ Hebrɔn laa ɓaa kɛ nąąlɔwai a: Kiriatə-Arba. Arba ɓə kɛ Anakə nu huwu lɔwai, a nu kɛnɛ̨. Nɔi ə lɛɛ líílaa hu, kɔ́ hvo kɛa kɛ laa.