Zasua 13 - Yálá laawoo hɛɓɛ (dc)

Nɔiɠaai di hvo nii kɛ di hon ni

¹ Ɉosue pɔlɔɔ kɛa kɛ, kpɔ yɛɠɛ-yɛɠɛ, Yai-Laa yɛ mą: «Yɛ́ ka yaa pɔlɔ kɛa, ya pa, nɔi kpəli yii ka hvo nii ɉon ni gɛnɛ̨i nii.

² Nɔiɠaai daa lɛɛ diɛ ka: Filisti lɔi kəlee, da Gesurə nuą di wɛi.

³ Ə həɠə Sihɔrə yá ɓa Eziptə lɔi tənən ma, ə həli la Ɛkrɔn lɔi ɓa ɲánwuɔ̨ pələ; yili kpɛli mąn, Kanaan lɔi ta li. Filisti tɔɔɓɛlaa lɔɔlii laa ka: Gaza nwɛi, Asdɔdə nwɛi, Askelɔn nwɛi, Gatə nwɛi, da Ɛkrɔn nwɛi; yili pulu, Avi nuą kaa laa ɉɛɠɛɛ pələ;

⁴ Kanaan lɔi kəlee da Meara lɔi, yii gaa a Sidɔn nuą di wɔ lɔi, ə həli la Afeka, ə həli la Amɔrə nuą ɲɛn ma.

⁵ Gevalə nuą di wɔ lɔi, da Liban lɔi kəlee voló ɓɛlai pələ. Ə həɠə Baalə-Gadə ɓa, Hɛrmɔn yee koomu, ə həli la Lebo-Hamatə ɓa.

⁶ Nuą kpɔ di kaa heeni ɲee hu, ə həɠə Liban ɓa, ə həli la Misrefotə-Maimə da Sidɔn nuą kəlee. Ɲą́ą́ gbinį lee ɓə pai di wɔ lɔi kulɔi di yəi, gɛ́ dɛɛ Israɛlə pɔ. Nɔi ɲąąkwɛlɛ Israɛlə lonnii diɛ yɛ bələi ŋį́ mo la yɛ́. Ə kɛ a di hee lɔi.

⁷ Yii hu kɛa, nɔi ŋɛ̨i ɲąąkwɛlɛ yɛ pɛli kɛi a nu huwu mɛ̨inąąn ŋɛ̨i da Manase bələ tɔ̨nɔ̨ di hee lɔi.»

Di Ɉurdɛn pulu pələ lɔiɠaa ɲąąkwɛlɛ

⁸ Manase huwu bələ tɔ̨nɔ̨ da Rubɛn huwu, da Gadə huwu daa di hee lɔi hɔlɔɓo; a yaai Moisə ə dɛɛ di pɔ voló ɓɛlai pələ ka hvo nii kɛ Ɉurdɛn teen ni, Yai-Laa nwɔ tímun Moisə ə di wɛi tɛɛ di pɔ.

⁹ Ə həɠə Aroɛrə ɓa, Arnɔn yee lɔwai lɔi kwɛlɛ, ə həli daai tii heeni nɛ̨ŋɛ̨ lɔi hu, Madaba ɓa ə həli la Divɔn ɓa.

¹⁰ Amɔrə tɔɔmun Sihɔn, yaai kɛ heeni Hɛsbɔn, nwɔ taaɠaa kəlee ə həli la Amɔn lonnii di wɔ lɔi ɲɛ̨n ma.

¹¹ Galaadə nuą, Gesurə nuą da Maaka nuą di wɔ lɔi. Ɛlɛɛ, Hɛrmɔn yee kəlee, Basan kəlee, ə həli la Salka.

¹² Basan lɔi hu, Ogə nwɔ lɔi kəlee, Ogə ə kɛ a tɔɔmun Astarotə da Ɛdrɛi mɛ̨i, ə kɛ a Refaitə huwu, yiiɠaa kɛ daa lɛɛ yɛnɛ̨ɛ̨ di ta. Moisə ə di hon kɔ́ hu ə́ nɔi kulɔ di yəi.

¹³ Kɛlaa Israɛlə lonnii di hvo Gesurə nuą da Maaka nuą di wɔ lɔi kulɔ di yəi. Gesurə da Maaka di lɛɛ heeni Israɛlə nuą lɔwai ə mą kɛ háákələi.

¹⁴ Levi huwu yaa tɔ̨nɔ̨ lɔ ɓə Moisə hvo lɔi tɛɛ bɔ, di hɔlɔɓo hɛn nɔ ɓaa Yai-Laa Israɛlə nwɔ Yálá kɔ́ haláá hɛnŋąą, yɛ bələi ə mo la.

¹⁵ Moisə ə lɔi tɛɛ Rubɛn huwu pɔ a gwəliɠaa laa.

¹⁶ Ə həɠə Aroɛrə ɓa, Arnɔn ɓoloon gwɛlɛ lɔi, da daai tii heeni nɛ̨ŋɛ̨ lɔi hu, da ɲee lɔi tii Madaba kwɛlɛ gəlee.

¹⁷ Hɛsbɔn da nwɔ taaɠaa kəlee di kaa ɲee tona; diɛ ɓaa: Divɔn, Bamotə-Baalə, Bɛtə-Baalə-Meɔn,

¹⁸ Yasa, Kedemotə, Mefaatə,

¹⁹ Kiriataimə, Sivna, Sɛrɛtə-Saharə ɓa ɲee tii laa nɛ̨ŋɛ̨ lɔi hu;

²⁰ Bɛtə-Peɔrə Pisga yee hɛŋɛ̨lɛn ma kəlee, da Bɛtə-Yesimotə,

²¹ Ɲee hu taaɠaa kəlee, Amɔrə nuą di wɔ tɔɔmun Sihɔn nwɔ lɔi kəlee, Sihɔn ə kɛ heeni Hɛsbɔn. Moisə ə di hon a kɔ́, da Madian nu kpɛa-kpɛaa, di laa ka: Ewi, Rɛkɛmə, Surə, Hurə, da Rɛva. Di kɛ heeni nɔi Sihɔn yee mu.

²² Nuąi di di paa, Beɔrə lon Balaamə ə kɛ di lɔwai, yai kɛ a dɔli-kpɛmun, yii Israɛlə lonnii di baa a ɓɔwa.

²³ Rubɛn huwu hu nuą di wɔ lɔi ɲɛ̨n maa kɛ a: Ɉurdɛn yá kwɛlɛ lɔiɠaa. Rubɛn huwu hu nuą hee lɔi ka tii. Di heekpəlin na kɛɛi kɛ a gwəliɠaa laa, a daa kpɛa-kpɛaa, da daa pɛlɛɛ-pɛlɛɛ.

²⁴ Moisə ə lɔi tɛɛ Gadə huwu pɔ. Gadə lonnii di hee a gwəliɠaa laa.

²⁵ Di wɔ lɔi ka: Yazerə, Galaadə taaɠaa kəlee, Amɔn lonnii di wɔ lɔi bələ tɔ̨nɔ̨ ə həli Aroɛrə ɓa, yii gaa Raba tənən ma.

²⁶ Yili pulu, ə həɠə Hɛsbɔn ɓa, ə həli la Ramatə-Mispe da Betonimə diɛ, ə həɠə Mahanaimə, ə həli la Lodevarə ɲɛ̨n ma.

²⁷ Nɛ̨ŋɛ̨ hu pələ, Bɛtə-Haramə, Bɛtə-Nimra, Sukotə, Safɔn, Hɛsbɔn tɔɔmun Sihɔn nwɔ lɔi gbəli, ɛlɛɛ, ə pɛlɛ la Ɉurdɛn da gwɛlɛ lɔiɠaa diɛ, Kinerɛtə gboloyá gbɛlai pələ, Ɉurdɛn pulu voló ɓɛlai pələ.

²⁸ Gadə huwu hee lɔi ka tii. Di heekpəlin na kɛɛ a kwəliɠaa, a taa kpɛa-kpɛaa, da bɛlɛɛɠaa.

²⁹ Manase huwu bələ tɔ̨nɔ̨, Moisə ə lɔi tɛɛ di pɔ, a gwəliɠaa laa.

³⁰ Nɔi di ɉɔlɔɓo, ya ka: Ə həɠə Mahanaimə, Basan lɔi kəlee, Basan tɔɔmun Ogə nwɔ lɔi kəlee, da Yairə taa pɛlɛɛɠaa kəlee Basan lɔi hu, di kɛ a taa pow mɛ̨ida.

³¹ Galaadə lɔi bələ tɔ̨nɔ̨ Astarotə da Ɛdrɛi, diɛi kɛ a Ogə nwɔ lɔi hu taaɠaa, yii kɛ Basan lɔi hu, di lɛɛ Manase lon Makirə nwɔɔ lonnii yəi. Makirə lonnii bələ tɔ̨nɔ̨ a gwəli laa.

³² Nɔi tii ɓə Moisə ə dɛɛ a di kwɛlin nɔi Moabə nɛ̨ŋɛ̨ hu Ɉurdɛn lííla, Ɉeriko nwun mɛ̨i vóló ɓɛlai pələ.

³³ Kɛlaa, Levi huwu hu nuą di wɛi, Moisə hvo lɔi tɛɛ di pɔ, Yai-Laa Israɛlə nwɔ Yálá ɓaa di wɛi; yɛ bələi ə mo la diɛ.