Zasua 11 - Yálá laawoo hɛɓɛ (dc)

Ɉosue ə ɲánwuɔ̨ pələ lɔiɠaa hon a kɔ́

¹ Yili bələ mɛ̨n Hasɔrə tɔɔmun Yavin ə mo, ə nuą tɔɔ Madɔn tɔɔmun Yovavə pɔɔli, da Simrɔn tɔɔmun, Aksafə tɔɔmun,

² ə lɛɛ, ɲánwuɔ̨ pələ ɲee lɔi hu: Ɉurdɛn ɲá-ɓoloon bɔ, Kinerotə kɔ́wɔ mu pələ; nɛ̨ŋɛ̨ lɔi hu da Dɔrə yeeɠaa, voló tooi pələ.

³ Kanaan nuą di kɛ voló ɓɛlai pələ, da voló tooi pələ. Amɔrə nuą, Hɛtə nuą, Perizi nuą, Ɉebusə nuą, di kɛ ɲee lɔiɠaa hu. Hivi nuą di ɓo Hɛrmɔn yee kɔ́wɔ mu Mispa lɔi hu.

⁴ Nuąi tii di kulɔ da di wɔ kɔlaɠaɠaa kəlee, nu kpulu hu kɛnɛ̨i kɛ yɛ gboloyá kwɛlɛ ɲɛ̨ą kɔ́w. Hoo kpulu kɛnɛ̨ da kɔ́ kɔ́ wotolo kpulu kɛnɛ̨ ə kɛ di yəi.

⁵ Dɔɔɓɛlaa tii di kuu hee di kee ɓa, di pa di pu di kee ɓa Meromə yá la, ə gɛ, di kɔ́ pɛlɛ Israɛlə ɓa.

⁶ Yai-Laa yɛ Ɉosue ɓa: «Hvo ɲɔw diɛ! Tinąą, kpɔlɔ a ɓɛlɔwai, ŋą́ di lɔ Israɛlə nuą yee ŋą a di powa. Ə́ kaa pai di wɔ hooɠaai kɔ́wɔ pulu laną teei, yɛ di wɔ kɔ́ kɔ́ wotoloɠaai kələn.»

⁷ Ɉosue da nwɔ kɔlaɠaɠaa kəlee di həɠə diɛ li, di həli diɛ di tɛɠii Meromə yá kwɛlɛ, di too di hu.

⁸ Yai-Laa ə di lɔ Israɛlə yee ŋą, di yee ə tɛɛ diɛ. Di hvilɛn di pulu, di lɛɛ di kpɛi, di həli Sidɔn kɛnɛ̨mun ma Misrefotə-Maimə, da Mispe ɲɛɛ kɔ́wɔ hu, voló ɓɛlai pələ. Ɉosue yee ə tɛɛ diɛ, di hvo kpɛli nu tɔ̨nɔ̨ kpɛli lɛɛ a vulú.

⁹ Ɉosue ə di hon yɛ bələi Yai-Laa ə mo la mą. Ə di wɔ hooɠaa kɔ́wɔ pulu lana tee, ə di wɔ kɔ́ kɔ́ wotoloɠaa kələn.

Ɉosue ə Hasɔrə hon a kɔ́

¹⁰ Nąąlɔwai, Ɉosue ə bulu pənə, ə Hasɔrə hon a kɔ́, ə ɉu tɔɔmun baa a ɓɔwa. Hasɔrə ɓə wɔlɔ kɛ tɔlɔɔ yələ a dɔɔ lɔiɠaa tii kɛ di wɔ taalee kɛnɛ̨.

¹¹ Ɉosue ə daai nuą kəlee kulɔ a haláá, di kɛ a kɔ́ kɔ́ ɓɔwa kɔ̨nɔ̨n, hvo nu ta lɛɛ laa a vulú, di nɛ̨ɛ̨ mą di Hasɔrə taa kələn.

¹² Ɉosue ə daaɠaa kəlee hon, da ɉu tɔɔɓɛlaa, ə di kɛ a kɔ́ kɔ́ ɓɔwa kɔ̨nɔ̨n da daai nuą kəlee, yɛ bələi Yai-Laa nwɔ tímun Moisə ə mo la.

¹³ Kɛlaa di wɔ taaɠaa kpɔ kɛ tɔɔni ɲeeɠaa nwuɔ̨, Israɛlə hvo da kələn; ə kulɔ lɔ Hasɔrə taa yaa tɔ̨nɔ̨ lɔ ɓə Ɉosue ə nąą kələn.

¹⁴ Israɛlə nuą di daaɠaa tii hu hɛnŋąą, da daatɛlɛɛɠaa kəlee həɠə a kɔ́ pulu hɛn. Kɛlaa, di nu kanŋaa kəlee paa kpɔ tɛ̨ɛ̨-tɛ̨ɛ̨, di hvo kpɛli nu ta lɛɛ a vulú.

¹⁵ Yili ɓə Yai-Laa ə mo nwɔ tímun Moisə ɓa, Moisə yaan, ə Ɉosue tí la. Bələ yaan nɔ ɓə Ɉosue ə gɛ la. Mɛ̨nįɠaa kpɔ Yai-Laa ə Moisə tí la, Ɉosue hvo dɔ̨nɔ̨ kpɛli lɛɛ pulu; ə gəlee kɛ.

Ɉosue ə nɔi kpəli hon

¹⁶ Bələ ɓə Ɉosue ə nɔi kəlee hon na: Ɲee lɔwai lɔi kəlee, ɉɛɠɛɛ pələ lɔi kəlee, Gosɛn lɔi kəlee, nɛ̨ŋɛ̨ hu lɔi kəlee, Ɉurdɛn ɲa-ɓoloon bɔ lɔi, Israɛlə yeeɠaa da nɔi kɛ gɔwɔ mu.

¹⁷ Ə həɠə Halakə yee ɓa, yaai tɔɔni Seirə pələ, ə həli la Baalə-Gadə ɓa, Liban yɛɛ kɔ́wɔ hu, Hɛrmɔn yee kɔ́wɔ mu. Ə nąą tɔɔɓɛlaa kəlee hon, ə di paa a ɓɔwa.

¹⁸ Ɉosue ə kɔ́ pɛlɛ dɔɔɓɛlaa tii diɛ hvóló tamąą yee mu.

¹⁹ Taa ta lɔpee da Israɛlə di hvo liilaa mįnɛ̨ həɠə, ə kulɔ lɔ Hivi nuą ŋɛ̨i heeni Gabaɔn. Nuą yiiɠaa tii, di gəlee hon a kɔ́.

²⁰ Mąąhɔlɔɓo, Yai-Laa aa kɛ mąą kili tee gwəi, yɛ di kili walawala diɛ kɔ́ pɛlɛ Israɛlə ɓa. Israɛlə ə di kaa a nuąi di hva pɛli di mąąwɛli kaai. Yili ɓə gɛ di gəlee di nwun na pili, yɛ bələi Yai-Laa ə mo la Moisə ɓa.

Ɉosue ə kɔ́ pɛlɛ Anakə nuą diɛ

²¹ Nąąlɔwai, Anakə nuąi kɛ heeni yeeɠaa ɓa, Ɉosue ə gəlee paa, diɛ kɛ a Hebrɔn nuą, Devirə da Anavə nuą, ə mą kɛ da yiiɠaai kɛ Ɉuda yeeɠaa ɓa, da Israɛlə yeeɠaa. Ɉosue ə gəlee nwun na pili da di wɔ taaɠaai.

²² Anakə mun da lɔpee hvo lɛɛ Israɛlə nuą di wɔ lɔi hu, ə kulɔ lɔ: Gaza, Gatə, da Asdɔdə taaɠaa di pulu.

²³ Ɉosue ə nɔi kəlee hon, yɛ bələi kpɔlɔ Yai-Laa ə mo la Moisə ɓa, ə dɛɛ Israɛlə pɔ a ɉee lɔi, ə ɲąąkwɛlɛ Israɛlə huwu hu nuą lɔwai; nɔi ə liilaa hɔlɔɓo, kɔ́ hvo kɛ laa.