Zasua 10 - Yálá laawoo hɛɓɛ (dc)

Amɔrə tɔɔɓɛlaa di kɔ́ pɛlɛ Gabaɔn ɓa

¹ Ɉerusalɛmə tɔɔmun Adoni-Sedɛkə ə bələ mɛ̨n, diɛ Ɉosue aa kɛ Ai hon, ə lɛɛ aa nąą kala; diɛ kɛ ə Ai da nwɔ tɔɔmun di hon nɔ yɛ bələi di Ɉeriko da nwɔ tɔɔmun di hon na, diɛ nwɔ̨nɔ̨ kɛ mą Gabaɔn nuą da Israɛlə nuą daa kɛ too líílaa yɛnɛ̨ɛ̨ hu, ɛlɛɛ, Gabaɔn nuą kaa heeni Israɛlə lonnii lɔwai.

² Nuą di ɲɔw kpɔ mɛ̨nįi tii hu kɛnɛ̨, mąąhɔlɔɓo Gabaɔn ə kɛ a taa kɛnɛ̨, da dɔɔɓɛlaa hee taa di pɛliɛ; gɛnɛ̨ɛ kɛ Ai ɓa, ə lɛɛ ɉu nuą kəlee di kɛ a huwalawala nuą.

³ Ɉerusalɛmə tɔɔmun Adoni-Sedɛkə ə nuą tɔɔ Hebrɔn tɔɔmun Hohamə pɔɔli, da Yarmutə tɔɔmun Pireamə, da Lakisə tɔɔmun Yafia, da Ɛglɔn tɔɔmun Devirə, yɛ diɛ:

⁴ «Ka pa mą́ą́, ka kpɔn mąą tɛɛ bɔ́, ka gu Gabaɔn hon, hvo gaai, da Ɉosue ɛlɛɛ Israɛlə nuą di kaa liilaa yɛnɛ̨ɛ̨ hu di kee ɓa.»

⁵ Amɔrə tɔɔɓɛlaa lɔɔlii tii diɛi a Ɉerusalɛmə tɔɔmun, Hebrɔn tɔɔmun, Yarmutə tɔɔmun, Lakisə tɔɔmun da Ɛglɔn tɔɔmun, di di ɲąąkpɔn, diɛ li da di wɔ kɔ́kulááɠaai kəlee, di Gabaɔn mąą tínɛ̨n a kɔ́, di kɔ́ pɛlɛ mą.

⁶ Gabaɔn nuą di nuą tɔɔ Ɉosue pɔɔli Gilgalə daai, diɛ kɛ mą: «Hvo kulɔ ə́ wɔ luwɔɠaai pulu, di hvo pa too, pa ɉa-ɉa ku pɔ, ə́ ku ɓalo ə́ ku mąą kɔ̨nwɔ̨ Amɔrə tɔɔɓɛlaai tii ɲee lɔiɠaa hu, daa di ɲąąkpɔn diɛ pa woloi kuɔ, di yəi.»

⁷ Ɉosue da gɔ́ kɔ́ nuą di həɠə Gilgalə da gɔ́kulááɠaa kəlee.

⁸ Yai-Laa yɛ Ɉosue ɓa: «Hvo ɲɔw, mąąhɔlɔɓo ŋą́ą́ nɔ ə́ yee ŋą, di ta lɔpee hvo pai tɔɔi ə́ tɔwɔ.»

⁹ Həɠəi Ɉosue ə mo Gilgalə, ə yíi hiɛi pili-pili, ə wolo diɛ di tɛɠii.

¹⁰ Yai-Laa ə gɛ, di pu Israɛlə nuą ɲɛ̨i tɔwɔ, ə gɔ́ kala diɛ kpɔ hɔwɔ-hɔwɔ, Gabaɔn daai, ə hvilɛn di pulu Bɛtə-Horɔn yee ɓa pələ, ə hee di hu, ə lɛɛ kpɔ ɉu di həli Azeka di həli kpɔ la Makeda.

¹¹ Di kɛɛ pui Israɛlə tɔwɔ diɛ Bɛtə-Horɔn yee yɛɛ, Yai-Laa ə hanwon gbuwulu kpɛa-kpɛa kulɔ yələi pələ yɛ bu diɛ, di həli kpɔ Azeka, di haa. Yiiɠaai haa ɉanwon gbuwuluɠaa yəi, di tamąą di tɛɛ yiiɠaai Israɛlə nuą di di paa a ɓɔwa diɛ.

¹² Ɲələi tii Yai-Laa ə Amɔrə nuą too la Israɛlə lonnii yee ŋą, Ɉosue ə mɛ̨nį ɓo Yai-Laa ɓa Israɛlə lonnii kəlee ɲɛ̨i ɓa, yɛ mą: «Hvóló tɔɔ Gabaɔn taa mɛ̨i! Ɲąnin tɔɔ Ayalɔn nɛ̨ŋɛ̨ hu.»

¹³ Ɛlɛɛ, hvóló ə kpəla ə tɔɔ, ɲąnin ə lɛɛ tɔɔni, ə lɛɛ ɉu, nuą di di nwąną kulɔ di yowoɠaa diɛ. Kɛlɛi yili pɛ̨ɛ̨ tələnmomun nwɔ hɛɓɛ́i hu-ee? Diɛ kɛ mą: Hvoló ə kpəla ə tɔɔ yələ kɔ́lɔn ɉąąi, hvo gɔwɔ mąąhulɔ hvo laa hvóló tɔ̨nɔ̨ ɲąą kpalaa yee mu.

¹⁴ Ə həɠə volói tii ɓa, hvóló ta hvo ta tɔɔli tii aa lɛɛ ɉu yiihu aa həli, a volói Yai-Laa ə lɛɛ la nu woo mu, mąąhɔlɔɓo, dɔɔi kɛ Israɛlə pulu.

¹⁵ Ɉosue da Israɛlə nuą kəlee di pənə di pa Gilgalə daai.

Ɉosue ə dɔɔɓɛlaa lɔɔli tii paa

¹⁶ Dɔɔɓɛlaa lɔɔlii tii di pu, di di loo kwɛni wolo hu Makeda.

¹⁷ Di mo Ɉosue ɓa diɛ mą daa dɔɔɓɛlaa lɔɔlii kaa di loo pələi Makeda.

¹⁸ Ɉosue ə mo, yɛ mą: «Ka gwɛni kpuwuluɠaa kiliɠilin, ka di laa gwɛni wolo laaləi, ka nuą tɔɔ gwɛlɛ diɛ di ɲɛ̨i kɛ laa.

¹⁹ Ka wɛi, ka hvo kpəla ka hvo tɔɔ, 'ka hvilɛn ka yowoɠaa pulu, 'ka laa di tɔwɔ, ka hvo di lɛɛ laa di hvo lɔ di wɔ taaɠaai hu, Yai-Laa gu wɔ Yálá aa di lɔ gu yee ŋą.»

²⁰ Kpɛɛi Ɉosue da Israɛlə lonnii di mo a gɔ́ kalaa diɛ kpɔ hɔwɔ-hɔwɔ, diɛ di kəlee di paa; nu taɠaa nwun ə kulɔ ɉu, di pu, di lɔ daa kpɛa kpɛaɠaa hu, di mąą tínɛ̨n ŋąą a hįį kpoloon.

²¹ Nuą di pənə di pa liilaa hu Ɉosue pɔ Makeda, nu ta hvo pɛli mɛ̨nį ta kɛi Israɛlə lonnii diɛ.

²² Yili pulu, Ɉosue yɛ diɛ ka gwɛni wolo laa ɓo, ka dɔɔɓɛlaa lɔɔlii tii kulɔ gwɛni wolo hu.

²³ Di dɔɔɓɛlaa lɔɔlii tii kulɔ gwɛni wolo hu, də li a diɛ Ɉosue pɔ: Ɉerusalɛmə tɔɔmun, Hebrɔn tɔɔmun, Yarmutə tɔɔmun, Lakisə tɔɔmun da Ɛglɔn tɔɔmun.

²⁴ Dɔɔɓɛlaa lɔɔlii tii kulɔi di mo di pa a diɛ Ɉosue pɔ, yili ə Israɛlə lonnii təli, yɛ gɔ́laɠa ɲɛ̨itɔwɔ nuą diɛ: «Ka lɛɠɛ ɓɛ, ka ka kɔ́wɔ hvilɛn dɔɔɓɛlaai ŋɛ̨i kɔ́n bulu.» Di lɛɠɛ laa, di di kɔ́wɔ hvilɛn dɔɔɓɛlaa kɔ́n bulu.

²⁵ Ɉosue yɛ diɛ: «Ka hvo ɲɔw, ka mąą hvo kpɛlin, ka tɔɔ a hinąą tɔɔ pələ; ka yowoɠaai kpɔ ka diɛni ka káá pai gɔi, bələ ɓə Yai-La kaa pai di hon ɉii la.»

²⁶ Yili pulu, Ɉosue ə dɔɔɓɛlaai tii paa, ə di hɛlɛn wulu lɔɔli ɓa, di lɛɛ hɛlɛn ni nwuluɠaa ɓa, ə lɛɛ ɉu yələ ə wulu.

²⁷ Hvóló kɛɛ laai kpɔlɔ ŋą, Ɉosue ə mo di di kulɔ nwuluɠaa diɛ, ɛlɛɛ, di di pili gwɛni woloi tii di di loo laa, ɉu. Di kwɛni kpuwulu kpɛa kpɛa laa gwɛni wolo laaləi, di kaa ni laa yiihu.

Ɉosue ə Kanaan lɔi ɉɛɠɛɛ pələ taaɠaa hon

²⁸ Voló tɔ̨nɔ̨i tii yeemu, Ɉosue ə lɔ Makeda daai, ə ɉu nuą kɛ a kɔ́ kɔ́ ɓɔwa kɔ̨nɔ̨n, ə mą kɛ nąą tɔɔmun; ə di kəlee di paa kpɔ tɛ̨ɛ̨tɛ̨ɛ̨, hvo hɛn da lɔpee lɛɛ a vulúmąą, ə mą kɛ nu tɔ̨nɔ̨ ɓə, hvo nɛɛ laa a vulú; ə Makeda tɔɔmun ɉon, yɛ bələi ə Ɉeriko tɔɔmun ɉon na.

²⁹ Ɉosue da Israɛlə nuą kəlee di həɠə Makeda, də li Livna, da nąą nuą di kɔ́ kɛ.

³⁰ Yai-Laa ə daai tii da ɉu tɔɔmun di lɔ Israɛlə yee ŋą. Yili ə di kɛ a kɔ́ kɔ́ ɓɔwa kɔ̨nɔ̨n, da nuąi kpɔ kɛ laa, hvo nu ta lɛɛ laa a vulú; di naa lɔ tɔɔmun ma, yɛ bələi di naa la Ɉeriko tɔɔmun ma.

³¹ Ɉosue da Israɛlə nuą kəlee di həɠə Livna, də li Lakisə, di nąą mąą tínɛ̨n, di kɔ́ pɛlɛ mą.

³² Yai-Laa ə Lakisə lɔ Israɛlə yee ŋą, Israɛlə ə ɉon a kɔ́ voló veelɛ yələ, ə nɛɛ a kɔ́ kɔ́ ɓɔwa kɔ̨nɔ̨n; da nuąi kpɔ kɛ laa, yɛ bələi ə naa la Livna ɓa.

³³ Nąąlɔwai, Gɛzɛrə tɔɔmun Horamə ə pa yɛ kɛ ə kpɔonmąą tɛɛ Lakisə pɔ, kɛlaa Ɉosue da nwɔ nuąi di yee ə tɛɛ mą. Hvo nu tɔ̨nɔ̨ kpɛli lɛɛ ɲəi a vulú.

³⁴ Ɉosue da Israɛlə nuą kəlee di tɛɛ Lakisə, di pa Ɛglɔn. Di mąą tínɛ̨n, di kɔ́ pɛlɛ mą.

³⁵ Di ɉon nɔ a mąą yələ, di nɛɛ a kɔ́ kɔ́ ɓɔwa kɔ̨nɔ̨n; nuąi kpɔ kɛ laa, ə di kɛ a haláá hɛn a volói tii lɔ, yɛ bələi ə gɛ la a Lakisə.

³⁶ Ɉosue da Israɛlə nuą kəlee di həɠə Ɛglɔn, də li Hebrɔn, di kɔ́ pɛlɛ mą.

³⁷ Di ɉon, di gɛ a kɔ́ kɔ́ ɓɔwa kɔ̨nɔ̨n, yaa, da ɉu tɔɔmun, da nwɔ taaɠaa kəlee, da nuąi kpɔ kɛ laa, hvo nu tɔ̨nɔ̨ kpɛli lɛɛ a vulú. Ə di kulɔ a haláá Yálá ɓa.

³⁸ Ɉosue da Israɛlə nuą di tínɛ̨n Devirə taa pɔ pələ, di kɔ́ pɛlɛ mą.

³⁹ Di daa hon da ɉu tɔɔmun, da gwɛlɛ taaɠaa kəlee. Di nu kəlee kɛ a kɔ́ kɔ́ ɓɔwa kɔ̨nɔ̨n; nuąi kpɔ kɛ laa di di kɛ a haláá Yálá ɓa, Ɉosue hvo nu ta lɛɛ a vulú. Di Devirə taa da ɉu tɔɔmun di hon bələ kɛ yɛ bələi di gɛ la a Hebrɔn taa, yɛ Livna taa da ɉu tɔɔmun.

⁴⁰ Ɉosue yee ə tɛɛ ɲee hu lɔi kəlee ɓa, nɛ̨ŋɛ̨ lɔi da ɲá kwɛlɛ lɔi, da di wɔ tɔɔɓɛlaa kəlee, hvo da lɛɛ a vulú; hɛn nɔpee nɔ̨ɔ̨ kaa ɉu, ə gəlee kulɔ a haláá Yálá ɓa. Yɛ bələi Yai-Laa Israɛlə nwɔ Yálá ə mo la.

⁴¹ Ɉosue yee ə tɛɛ diɛ, ə həɠə Kadɛsə-Barnea, ə həli la Gaza, ə həli Gosɛn lɔi ɓa, ə həli la Gabaɔn.

⁴² Ɉosue ə dɔɔɓɛlaa tii kəlee hon da di wɔ tɔɔ lɔiɠaa, kɔ́ tɔ̨nɔ̨ hu. Mąąhɔlɔɓo, Yai-Laa Israɛlə nwɔ Yálá tɔɔi kɛ Israɛlə pulu gɔi tii hu.

⁴³ Yili pulu, Ɉosue da Israɛlə nuą kəlee di pənə di pa Gilgalə daai.