Zakari 8 - Yálá laawoo hɛɓɛ (dc)Líilaa yɛnɛ̨ɛ̨ pa mɛ̨nį 1 Yai-Laa Mɛ̨nį Kəlee ŋą Hééɓomun, ə pə́lə́ ɓo mą́ą́, yɛ mą́ą́: 2 Ɲą́ą́, Yai-Laa, tolo kɛnɛ̨ aa lɔ ɉú, Siɔn mąą mɛ̨nį ɓa. Nwɔ wɛlikɛmąąlaa a gə́lən yɛ nwɔ̨n dɛŋą. 3 Yai-Laa yɛ diɛ: Gáá pai pənəi ŋį́ pa Siɔn pɔ pələ, gɛ́ hee Ɉerusalɛmə daa kwəi. Di kaa pai Ɉerusalɛmə laa heei, a «Kulɔ nwoo ɓa taa.» Ɛlɛɛ, diɛ Yai-Laa nwɔ yeei laa hee a, «Yee Mąąhəɠɛɛ.» 4 Yai-Laa, Yai-Laa Mɛ̨nį Kəlee ŋą Hééɓomun, woo ka, yɛ diɛ: Hulɔgoloɠaa da nɛ̨ɛ̨goloɠaa kaa nwɔ̨nɔ̨ pai pənəi diɛ hee Ɉerusalɛmə gwəli hɛ̨ąiɠaa, tunwɔ̨n ə ɓo di kəlee di yəi, di pɔlɔ pələ ɓa. 5 Lɛapɛlɛɛ diɛ gɛ lɔ daa kwəi ɉuwu-ɉuwu, hilɛlɛa, da nɛ̨ɛ̨lɛa, diɛ pələ kɛ gwəli hɛ̨ąiɠaa. 6 Yai-Laa, Yai-Laa Mɛ̨nį Kəlee ŋą Hééɓomun woo ka, yɛ diɛ: Akɛ, nɔi lonnii yiiɠaai daa lɛɛ, da wala kɛ mɛ̨nįɠaai tii kaai a pɛli mɛ̨nį, ɲələ a pa həlii, a kɛ tii ɲą́ą́n gbɛli mąn, vá mɔ̨ɔ̨ gaa a mɛ̨nį a pɛli kɛi? Yai-Laa Mɛ̨nį Kəlee ŋą Hééɓomun woo li. 7 Yai-Laa Mɛ̨nį Kəlee ŋą Hééɓomun nwoo ka, yɛ diɛ: A tɛ̨ą, gáá pai nwɔ́ nu huwui nwun mąąɓoi, yiiɠaai hvoló ɓɛlai bələ, da yiiɠaai hvóló tooi bələ. 8 Gɛ́ pənə gɛ́ pa a diɛ, diɛ hee Ɉerusalɛmə daa kwəi, di kaa pai kɛi a nwɔ́ nu huwu, ɛlɛɛ ɲą́ą́n, ŋį́ ɓo a di wɔ Yálá, kulɔ nwoo ɓa laa hu, da tələnmolaa hu. 9 Yai-Laa Mɛ̨nį Kəlee ŋą Hééɓomun nwoo ka, yɛ diɛ: 'Ka ká lii kpələ, kaai nwooɠaai ɲɛ̨i mɛ̨n ɉi, yɛ kulɔ gwə́i mɛ̨nį hu kulɔ nuą la, a volóɠaai ɲɛ̨i di Yai-Laa hee pɛlɛ́ gólo kpala tɔɔi la. Diɛ pənə diɛ nwɔ pɛlɛ́i tɔɔ a nįnɛ̨. 10 Gbala ə tɔɔ, volóɠaai tii tɔwɔ, gólo kɛ nuą hvɛla hvo kɛli kulɔ, ɛlɛɛ daatɛlɛɛɠaa hɔ̨nwɔ̨ hvo kɛ mą. Nuąi kɛi tɛ, diɛ yɛɛ, bələɠaa hu hvo kɛ laɠi li di tɔwɔ, toomɛ̨i kɛ nuą di kɛ bələɠaa hu, mąąhɔlɔɓo, ŋą́ą́ kɛ nuą ɲąątɔɔ di kee ɓa. 11 Kɛlaa, yiihu, nɔi lonnii gbəliɠaai ɲɛ̨i daa lɛɛ, və́ kɛa pai di hon ɉi yɛ bələi ŋį́ kɛi gɛ la. Yai-Laa Mɛ̨nį Kəlee ŋą Hééɓomun, woo li. 12 Yili ɓa, gáá pai liilaa hį́n ɉi lɔi mɛ̨i, viɲə yɛ ɓa, híhɛn yɛ lɛlɛ nɔi hu, yələkɔ́lɔn yɛ tulɔ pu; Ŋą́ ɉɛnŋąąi tii kəlee tɛɛ, nɔi lonnii gbəliɠaai da lɛɛ, di pɔ a di wɔɔ. 13 Mąą yələi tii, bələi lɔ ka kɛ la, a nɛ̨ŋɛ̨n naa hɛn lɔi lɔwai, kaai a Ɉuda nwɔ pɛlɛ́i mu nuą, da Israɛlə nwɔ pɛlɛ́i, bələ lɔ ɓə gáá pai ka ɓaloi la, gɛ́ lúwɔ́ too kaa. 'Ka hvo ɲɔw, 'ka ká lii kpələ! 14 Hvo gaai, mɛ̨nįi Yai-Laa Mɛ̨nį Kəlee ŋą Hééɓomun, kaa moi, ya ka: Ŋį́ ta naa gwə́i, gɛ́ kɛ ŋį́ ka hon a ɲɔ̨nwɔ̨ɔ̨, mąąhɔlɔɓo, ka nąnni di nííholi. Və́ gili mąą hvalin. Yai-Laa Mɛ̨nį Kəlee ŋą Hééɓomun woo li. 15 Kɛlaa yiihu kɛa, ŋą́ą́ gíli mąą hvalin. Ŋą́ą́ naa gwə́i, gɛ́: Gáá Ɉerusalɛmə, da Ɉuda di hon ɉi a nɛlɛɛ. 16 Dɔnŋaai mąąnɛ̨ɛ̨ ka di kɛ, diɛ ka: 'Ka tɛ̨ą ɓo ka kee ɓa, ka kɛi kiti tee, 'ka dee a ɉąŋąą, ə́ gɛ, diɛ pɛli pənəi diɛ pa a liilaa. 17 'Ka hvo mɛ̨nį ɲɔ̨nwɔ̨ɔ̨ mąą kili tee ka kwəi ka keeni diɛ, nu kwɛlaa a lɛɛ mɛ̨nį, yili wɛli hvo kɛ kaa. Mąąhɔlɔɓo, mɛ̨nįɠaai tii kəlee wɛli kpɛɛi mą́ą́. Yai-Laa woo li. Hin nɔ mɛ̨nį 18 Yai-Laa Mɛ̨nį Kəlee ŋą Hééɓomun, ə mɛ̨nį ɲɛ̨i ɓo nwɔ̨nɔ̨ mą́ą́, yɛ mą́ą́: 19 Nwooi Yai-Laa Mɛ̨nį Kəlee ŋą Hééɓomun ə mo mą́ą́, ya ka, yɛ mą́ą́: Ɲąnin nąąn nąą nwɔ hin nɔ kuu, ɲąnin nɔɔli nąą nwɔ hin nɔ kuu, ɲąnin mɛ̨ihveelɛnąą nwɛi, da ɲąnin bow nąą nwɛi, gəlee kaa pai kɛi a Ɉuda nwɔ pɛlɛ́i mu nuą di wɔ kwəinɛ̨ɛ̨ kulɔ hvóló, di wɔ mąną kaa hvólóɠaa, da di wɔ hɛli pu hvólóɠaa. Kɛlaa, tɛ̨ą da liilaa, di wɛli ə kɛ kaa. 20 Yai-Laa Mɛ̨nį Kəlee ŋą Hééɓomun ə mo, ya ka, yɛ: Di kaa nwɔ̨nɔ̨ pai nu kpulu kaai diɛ pa, da taa kpɛa-kpɛa hu nuą. 21 Ɛlɛɛ, taa tɔ̨nɔ̨ hu nuą kaa pai lii, diɛ kɛ taa ta kpɛli hu nuą diɛ: «'Ka gwə li, 'ka gwə li, gu Yai-Laa líi laa, 'ka gu Yai-Laa Mɛ̨nį Kəlee ŋą Hééɓomun kwɛli, ɲą́ą́ gbɛli mąn, gáá lii.» 22 Nu huwu tamąą, da lɔi kpɛa-kpɛaɠaa, di kaa pai pai Ɉerusalɛmə, diɛ Yai-Laa Mɛ̨nį Kəlee ŋą Hééɓomun kwɛli, diɛ Yai-Laa líi laa. 23 Yai-Laa Mɛ̨nį Kəlee ŋą Hééɓomun, woo ka, yɛ diɛ: Mąą yələɠaai tii, hį́i wooi kpɔ nu kanŋaa da mo, ɉu hinąą pow, da yili Ɉuifə tɔ̨nɔ̨ ɓa, di ɉon a ɉəɠə wəli, diɛ kɛ mą: «Ku kaa bɔ gwa kaani gwə li, mąąhɔlɔɓo, kwaa bələ mąn, diɛ Yálá kaa ka pɔ.» |