Zakari 7 - Yálá laawoo hɛɓɛ (dc)Hin nɔ mɛ̨nį 1 Dariusə nwɔ tɔɔlaa gwɛlan nąąn nąą, Yai-Laa ə mɛ̨nį ɓo Zakari ɓa, Kislɛwə ŋɛ̨i a ɲąnin mɛ̨inąąn nąą nwɔ hvoló nąąn. 2 Betɛlə ə Sarɛsɛrə tɔɔ, da tɔɔmun nwɔ kalanɉon gɛnɛ̨ɛ̨, ə mą kɛ, nɔi hu nuą taɠaa, Yai-Laa líi laa mɛ̨nį ɓa; 3 diɛ Yai-Laa Mɛ̨nį Kəlee ŋą Hééɓomun yəi bɛlɛ́n ɉaláá laa həli nuą mąąnįn kɛ, da Yálá kwəi mɛ̨nį hukulɔ nuą, diɛ kɛ diɛ: «Mąąnɛ̨ɛ̨ ŋį́ wɔ́lɔ́ ɲąnin nɔɔli nąą yeemu, gɛ́ hįn nɔ, yɛ bələi ŋą́ kɛ gɛi la a bɔlɔ?» 4 Nąąlɔwai, Yai-Laa Mɛ̨nį Kəlee ŋą Hééɓomun ə mo mą́ą́, yɛ mą́ą́: 5 'Kɛ nɔi lonnii kəlee da ɉaláá laa həli nuą diɛ: «Ɉin ka kɛi nɔ kaa wɔlɔ la, ɲąnįn nɔɔli yələ da ɲąnįn mɛ̨ihveelɛ yələ, kwɛlan bow mɛ̨ihveelɛ yeemu, ɉin tii, ka kɛi mɔ̨ɔ̨ nɔ mą́ą́ mɛ̨nį ɓa? 6 Ɓɛlɔwai ka kɛi ka laa mįi la, káá ka kpələ, káá kpįnįi ka mąą mɛ̨nį hvəi ka kɛi ka laa mįi la, káá ka kpələ!» 7 Mɛ̨nįi Yai-Laa ə kɛi bu gwəi mɛ̨nį hukulɔ nuąi wɔlɔ kɛ laa di la, diɛ mo, ya hvə tii? A ɓɛlɔwai Ɉerusalɛmə ə kɛ la liilaa yɛnɛ̨ɛ̨ hui, nwəli pulu laɠiɛ, mąą tinɛ̨n ŋąą a ɲee pɔ taaɠaa; nu kan ə ɓo Negɛvə da ɲee kpukpu lɔi hu. 8 Yai-Laa ə kɛ Zakari ɓa: 9 «'Mo nɔi lonnii kəlee diɛ, yɛ́ diɛ: Yai-Laa Mɛ̨nį Kəlee ŋą Hééɓomun woo ka, yɛ: 'Ka kiti tee a tɛ̨ą, nu kəlee ə nąn non ɉon a kwəi kwələ laa, da wɛlikɛmąąlaa. 10 'Ka hvo ka yee pənə kalanin da təlilon di hu, ə mą kɛ, nwɛ̨ą, da yeehvowolomu. Nu ta hvo mɛ̨nį ɲɔ̨nwɔ̨ɔ̨ mąą kili tee gwəi yɛ hvilɛn na mɛlan gaalon ma.» 11 Kɛlaa, di hvo gɛ di hvo di wəli tɔɔ, di di nwun dinɛ̨n, di di wəli walawala, ə gɛ di hvo pa nəi mɛ̨nį mɛ̨n. 12 Di di kili walawala yɛ Kúwɔ́-kwɛni, di hvo pa nəi di mąąkwɛli woo mɛ̨n, di Yai-Laa Mɛ̨nį Kəlee ŋą Hééɓomun wooɠaa pili, yai gwəi mɛ̨nį hukulɔ nuą di naa həli diɛ. Yai-Laa Mɛ̨nį Kəlee ŋą Hééɓomun lii ə holi kpɔ di pɔ kɛnɛ̨. 13 Yili mąą mɛ̨nį ɓa, Yai-Laa Mɛ̨nį Kəlee ŋą Hééɓomun yɛ diɛ: «Bələi lɔ ŋį́ di təli la di hvo gɛ di hvo mɛ̨n, bələ lɔ ɓə diɛ kpɛli di də́li la, ɛlɛɛ, ɲą́ą́n gbɛ́li mąn, və́ nwə́li tɔɔ di woo ɓa. 14 Ŋą́ di pili lɔi huwui lɔpee gəlee hu, a ɓɛi di hvo kpɛli kɛ nąą kɔ́lɔn, nɔi hu ə kala di pulu, nu hvo kɛi tɔɔ laa, nu hvo kpɛli kɛi tɛɛ laa, nɔi lɛlɛɛi tii, di mąą pənə a lɔi pun.» |