Zakari 6 - Yálá laawoo hɛɓɛ (dc)

Gwɛlɛɛn gɛɛ kaa mɛ̨ihaaɓa nąą: Nwotolo nąąn

¹ Ŋą́ kwɛlɛɛn gɛɛ takpɛli kaa nwɔ̨nɔ̨, ŋą́ wotolo nąąn gaa, diɛ li yee hveelɛ lɔwai, ɲeeɠaai tii di kɛ a ɓala kwɛli.

² Nwotolo dɔlɔɔ yiliɛ kɛ hoo kpɔluɠaa diɛ, veelɛnąą yiliɛ hoo tɛɠiɠaa diɛ;

³ ɉaaɓa nąą nwɛi ə ɓo a hoo kwɛlɛɛɠaa, nąąn nąą nwɔ hooɠaai pɛ̨ɛ̨ mu kpɔluɔ.

⁴ Malakai ti kɛi mɛ̨nį ɓo mą́ą́, ŋą́ pənə ŋą́ mąąni kɛ, gɛ́ mą: «Nwɔ́ mɛ̨nį nąmu, nwotoloɠaai ŋɛ̨i mąą mɛ̨nį mukulaa ɓaa a lə?»

⁵ Yɛ mą́ą́: «Hvaŋą nąąn ga tii, di kɛ tɔɔni lɔi kəlee Nąmu kwɛlɛ, di kɛɛ kɛa lii ka tii.»

⁶ Nwotoloi tii kɛ ɲiliɛ ɉootɛɠiɠaa diɛ, ə li ɲələi pələ, ɉoo kwələɠaa də li voló tooi pələ, ɉoo pɛ̨ɛ̨ɠaa di li ɉɛɠɛɛ pələ.

⁷ Ɛlɛɛ, ɉoo kpɔliɠaa di kɛi ɉu hvɛli, ə gɛ də li di lɔi hu hiɛ. Nąąlɔwai, Yai-Laa yɛ diɛ: «'Ka li ká nɔi hu hiɛ.» Diɛn dəli di ɉu hiɛ.

⁸ Nąąlɔwai, Yai-Laa ə də́li, yɛ mą́ą́: «Ɓɛ kaa li, yiiɠaai tii lii ɲələi pələ, di kaa lii di nwɔ́ Kilii tɛɛi ɲələi pələ lɔi pɔ.»

Ɉosue nwɔ ɲąąwooɓo ɓɔlɔ

⁹ Yai-Laa ə mo mą́ą́, yɛ mą́ą́:

¹⁰ «Ɉɛnŋąąi Hɛldai, Tovia da Yedaya gɔ́honŋaa; di paa la, ə́ yee hee mu. 'Li háákələi yɛ́ kpįnįi, ə́ lɔ Sefania lon Yosiya yəi bɛlɛ́n, həɠəi di mo Babilonə, nąą ɓə daa lɔ laa.

¹¹ Nwali ta həɠə da ɉɛni ta, ə́ bɛli a kálán, ə́ ɉee Yehosadakə lon Ɉosue nwun ma, yai a ɉaláá laa həli mun gɛnɛ̨.

¹² 'Yɛ́ mą: ‹Yai-Laa Mɛ̨nį Kəlee ŋą Hééɓomun woo ka, yɛ: «‹Nu ta ka ŋɛ̨i, naa ɓaa wulu ɓɔn, yɛnɛ̨ɛ̨ kaa pai ɓɔn ɉii gɔwɔ pɔɔ hu. Gaa pai Yai-Laa hvɛli pɛlɛ́ tɔɔi.

¹³ A tɛ̨ą, ya ɓə pai Yai-Laa hvɛli pɛlɛ́ tɔɔi, mąąwiɛ kaa pai kɛi mą, gaa pai heei nwɔ tɔɔkpəlin hu, yɛ nuą ɲąąwooɓo. Haláá laa həli mun dakpɛli kaa lɔ pai kɛi heeni yaakpɛli, nwɔ ɲąąwooɓo kpəlin hu, ɛlɛɛ, woo laa mąą kɛnɛ̨ɛ̨ kaa pai kɛi di nu hveelɛi di lɔwai.›

¹⁴ «Ɲąąwooɓo kálán nwɛi, gaa lɔ pai kɛi Yai-Laa hvɛli pɛlɛ́ mu, a yii a Hɛldai, Tovia, Yedaya di kili too hɛn nuą ŋą, ɛlɛɛ yɛ Sefania lon nwɔ mɛ̨nį lɛlɛ pələ kili too nuą ŋą.»

¹⁵ Nuą kaa pai həɠəi kwɛaa la, diɛ kólo kɛ Yai-Laa hvɛli pɛlɛ́ mu. Yili ɓə ka gbaɠala kaa la, káá kɛ, Yai-Laa Mɛ̨nį Kəlee ŋą Hééɓomun ɓə dɔ́ɔ́ ka pɔɔli. Akɛ ká lɛɛ Yai-Laa ka wɔ Yálá woo mu, mɛ̨nį kəlee hu, mɛ̨nįi tii kaa pai kɛi.