Zakari 5 - Yálá laawoo hɛɓɛ (dc)Gwɛlɛɛn gɛɛ kaa mɛ̨idanąą: Ɉɛɓɛ́i kɛi koon 1 Ŋą pənə ŋą nwun muhəɠə, ŋą kwɛlɛɛn gɛɛ takpɛli kaa: ŋį́ hɛɓɛ́ ta kaa, yɛ koon. 2 Malaka yɛ mą́ą́: «Lə ɓə ə́ kaa gaai?» Gɛ́ mą: «Gáá hɛɓɛ́ ta kaai yɛ koon. Dɔɔɉu kaa a yee laamą pow hveelɛ, ɲąą kɛ̨nɛ̨ a yee laamą pow.» 3 Ya ɓə a kɛ mą́ą́: «Nɛ̨ŋɛ̨n naa ka tii taɠai nɔi kɔ́lɔ kəlee. «Mɛ̨nįi bɛ̨ɛ̨ bələ tɔ̨nɔ̨, ya ɓaa, di nwuɔ̨mun nɔpee, gəlee kulɔ nɔi hu. Ɛlɛɛ, bələ tɔ̨nɔ̨ yɛ mą: Nui lɔpee a gwɛla a lɛɛ, di gulɔ nɔi hu.» 4 Yai-Laa Mɛ̨nį Kəlee ŋą Hééɓomun woo ka, yɛ: Gáá nɛ̨ŋɛ̨n naa kɛi, yɛ nwuɔ̨mun nwɔ pɛlɛ́i hon, da nui a gwɛla a lɛɛ, nwɔ pɛlɛ́i. Yɛ hee kpɔ bɛlɛ́ hɛ̨ąi, yɛ nwuluɠaa, da gwɛniɠaa, di kələn. Gwɛlɛɛn gɛɛ kaa mɛ̨ihveelɛnąą: Mɔ̨nun gɔwɔn gəgən 5 Malakai tii kɛi mɛ̨nį ɓo mą́ą́, ə lɛɠɛ mą́ą́, yɛ mą́ą́: «'Ə́ nwun muhəɠə tai, ɉɛn tii pai, ə́ gaa.» 6 Ŋį́ mąąnįn kɛ, gɛ́ mą: «Yili mukulaa ɓaa a lə?» Yɛ mą́ą́: «Mɔ̨nun gɔwɔn gəgən ga tii pai. Ɛlɛɛ, nɔi kəlee hu nuą di wɔ nɛ̨ŋɛ̨nŋaai ka tii.» 7 Ya ɓə ŋį́ kwɛli ɓɛla kɛlɛɠɛlɛn-gɛɛ kaa, yɛ tɛ yələi: nɛ̨ɛ̨nu ta ə kɛ heeni mɔ̨nun gɔɔn gəgən tii hu. 8 Ya ɓə a kɛ mą́ą́: «Mɛ̨ni ɲɔ̨n gɛ kili ka tii.» Yili pulu, ə ɲee hee mą, ə nɔ gəgən ɉu pələ, ə gwɛli ɓɛla kɛlɛɠɛlɛn-gɛɛ tii pɛlɛ na. 9 Yili pulu, ŋį́ nwún muhəɠə, ŋį́ mɛ̨nį ta kpɛli kaa nwɔ̨nɔ̨: Nɛ̨ąą hveelɛ diɛ pa. Hvaŋą ə kɛi di koon muhəɠə. Di koonŋaa kulaa kɛ gwąą-gwąą koon ma. Nɛ̨ąąi tii, di mɔ̨nun gɔɔn gəgən gbəŋə, di dɛ yələ kɔ́lɔn da lɔi di lɔwai. 10 Malakai tii kɛi mɛ̨nįɠaa ɓo mą́ą́, ŋą́ mąąni kɛ, gɛ́ mą: «Di kaa lii mįnɛ̨ a mɔ̨nun gɔɔn gəgən tii?» 11 Ə nwóó pulu pənə, yɛ mą́ą́: «Di kaa lííla Sinearə lɔi hu, nąą ɓə di kaa lii mąąwiɛ pɛlɛ́ tɔɔi laa. Di kaa lii vilɛn ɉii laa, di gąnąn naa kpan-kpan.» |