Zakari 4 - Yálá laawoo hɛɓɛ (dc)Gwɛlɛɛn gɛɛ kaa nɔɔli nąą 1 Malakai tii kɛi bələ ɓo mą́ą́, ə pənə ə pa, ə mą́ą́ kɛlɛ, yɛ da kɛi yíimun nwun. 2 Ə mą́ą́ni kɛ, yɛ mą́ą́: «Lə ɓə ə́ kaa gaai?» Gɛ́ mą: «Gáá hɛn da kaai, nwɔ̨n ɉee hɛn da li, nąą kəlee kaa a hɛni; nwulɔ pui kaa ɲələi pələ. Nwɔ̨n gbowo mɛ̨ihveelɛ ə ɓo mɛ̨i, da ɉaláá mɛ̨ihveelɛ. 3 Olivə wulu hveelɛ kaa tɔɔni gwɛlɛ, dɔ̨nɔ̨ ə ɓo mamįiyee hu pələ, dɔ̨nɔ̨ ə ɓo gɔɓɛyee hu pələ.» 4 Yili pulu, ɲą́ą́ gbɛli ŋą́ malakai tii mąąnįn kɛ, gɛ́ mą: «Nwɔ́ mɛ̨nį nąmu, mɛ̨nįi ŋɛ̨i mukulaa ɓaa a lə?» 5 Malakai tii yɛ mą́ą́: «Hvó mɛ̨nįi ŋɛ̨i mukulaa kɔ́lɔn?» Gɛ́ mą: «Kpaa-o, nwɔ́ mɛ̨nį nąmu, və́ mukulaa kɔlɔn.» 6 Ə pənə, yɛ mą́ą́: «Mɛ̨nii Yai-Laa ə mo Zorobabɛlə ɓa, ya ka, yɛ: Yee walawala mɛ̨nį hvə li, huwalawala mɛ̨nį hvə li, kɛlaa nwɔ́ Nį́į ɓə. Yai-Laa Mɛ̨nį Kəlee ŋą Hééɓomun woo li! 7 «Yɛ́i ŋɛ̨i a ɲee tɔɔi, ə́ kaa kpɔ a lə? Yáá lɛɛ kpɔ a nɛ̨ɲɛ̨ lɔi Zorobabɛlə ɲɛ̨i tɔwɔ, nąą ɓə gwɛni kɛnɛ̨ɛ̨ kaa pai kulɔi laa nuą diɛ mąątɛ̨nɛ̨.» 8 Yai-Laa ə mɛ̨nį ɓo mą́ą́, yɛ mą́ą́: 9 «Zorobabɛlə yee ɓə bɛlɛ́i ŋɛ̨i hvilɛn ɉii, yaa lɔ ɓə pai naakulɔi. Ɛlɛɛ, ka káá pai ɉu kɔ́lɔn ɉii kaa kɛ Yai-Laa Mɛ̨nį Kəlee ŋą Hééɓomun ɓə dɔ́ɔ́ ka pɔ. 10 Gbɛɛ ɓə kɛi tɛɠɛɓo volói ku mɛ̨nįɠaa kpala tɔɔ la a viikpɛɛ, di hu? 'Di kwəinɛ̨ɛ̨ kulɔ kani, bɛlɛ́ tɔɔ kinɛ̨ kɔ́w kaa Zorobabɛlə yəi. Nwulɔ nwɔ̨n mɛ̨ihveelɛi, di kaa a Yai-Laa ɲɛ̨i kɔ́w mąą nįnįn, yai a lɔi mɛ̨i kəlee kaa la.» 11 Ŋą́ mąąnįn kɛ, gɛ́ mą: «Olivə wulu hveelɛi ŋɛ̨i nwɔ̨n ɉee hɛn mamįiyee hu pələ da gɔɓɛyee hu pələi, yili mukulaa ɓaa a lə?» 12 Ŋą́ pənə ŋį́ mąąnįn kɛ a veelɛnąą, gɛ́ mą: «Olivə kpaɠa hveelɛi ŋɛ̨i a hɛni, nwulɔ yɛ kulɔ ɉu, yili mukulaa ɓaa a lə?» 13 Yɛ mą́ą́: «Ɉɛnŋąą di mąą nįnįn ni ə́ di kɔ́lɔn?» Gɛ́ mą: «nwɔ́ mɛ̨nį nąmu, kpaa-o, və́ di kɔlɔn.» 14 Yɛ mą́ą́: «Nu hveelɛi nwulɔ mɛ̨nį nwun na, di ɓo tɔɔni lɔi pilɛɛ gee mɛ̨i Nąmu lííla, diɛ li.» |