Zakari 3 - Yálá laawoo hɛɓɛ (dc)Gwɛlɛɛn gɛɛ kaa nąąn nąą: ɉaláá laa həli mun Ɉosue 1 Yili pulu, Yai-Laa ə Ɉosue lɛ mą́ą́, yai gaa a ɉaláá laa həli mun gɛnɛ̨; ə kɛ tɔɔni Yai-Laa nwɔ malakai lííla, ɛlɛɛ, ɓilihi ə kɛ tɔɔni mamįiyee hu pələ, yɛ lɛɛ pɛlɛ Ɉosue ɓa. 2 Yai-Laa nwɔ malakai yɛ ɓilihi ɓa: «Yai-Laa ə nwumɛ̨ tɛ a yɛ́ ɓilihi; a tɛ̨ą, Yai-Laa ə ə́ laa kpulu, Ya ɓə Ɉerusalɛmə həɠə ɉu a nwɔɔ. Yii ɓaa a ɉulɔnui ŋɛ̨i nwɛi, hvo mɔ̨ɔ̨ yɛ kwɛi kpuwɔ kulaa nwɔ̨n ɲəi?» 3 Ɉosue ə kɛ tɔɔni malaka lííla, həɠə mąąliɓɛɛ ə ɓo gwąną. 4 Nuąi kɛ tɔɔni niila, yɛ diɛ: 'Ka nwɔ həɠə mąąliɓɛɛ tii kulɔ gwąną. Yili pulu, yɛ Ɉosue ɓa: «Yáá gaa, ŋą́ą́ ə́ wɔ nɛ̨ŋɛ̨nŋaai kulɔ yɛ́, di kaa pai hɛli həɠə tooi ə́ kwąną.» 5 Yili pulu, yɛ mą; 'ka ɓɔlɔ mąąhəɠɛɛ lɔ nwuɔ̨. Di ɓɔlɔ lɛlɛɛ lɔ nwuɔ̨, di həɠə too gwąną, Yai-Laa nwɔ malakai ə kɛ laa tɔɔni. 6 Yai-Laa nwɔ malakai yɛ nwɔ̨nɔ̨ Ɉosue ɓa: 7 Yai-Laa Mɛ̨nį Kəlee ŋą Hééɓomun woo ka: «Yá hiɛ nwɔ́ pələɠaai mɛ̨i, ya nwɔ́ tíɓoɠaai kɛi, yɛ́ kpįnįi ə́ kaa pai nwɔ́ pɛlɛ́i ɲąąwooɓoi, yɛ́ ə́ ɲɛ̨i kɛ nwɔ́ kwəlii ɓa, ɛlɛɛ, nuąi tɔɔni ɓɛ, ŋą́ ə́ too di pɔ.» Nwun mąąɓo tɔɔmun pa mɛ̨nį 8 «'Ə́ wəli tɔɔ Ɉosue, yɛ́i a ɉaláá laa həli mun gɛnɛ̨ɛ̨, yɛ́ ka ə́ ɓɛlaai heeni ə́ líílai; nuąi tii kaa a mɛ̨nį ta kɔlɔn ɉɛn; mąąhɔlɔɓo, gáá pai a nwɔ́ tímun, yii gaa yɛ wulu ɓɔn. 9 Gwɛnii gáá dɛɛi Ɉosue pɔ, ka gaa, ɲɛ̨ikɔw mɛ̨ihveelɛ ɓə gwɛni tɔ̨nɔ̨i tii ɓa, ɲą́ą́ gbínii gáá pai mąą pɛ̨ɛ̨i, Yai-Laa Mɛ̨nį Kəlee ŋą Hééɓomun woo li; ɛlɛɛ, gáá pai nɔi nwɔ nɛ̨ŋɛ̨n gulɔi mą a hvoló tɔ̨nɔ̨. 10 Yai-Laa Mɛ̨nį Kəlee ŋą Hééɓomun yɛi, Mąą yələ, ka káá pai ka keeni təlii dowələ wulu mu, da nwiɛ mu.» |