Zakari 2 - Yálá laawoo hɛɓɛ (dc)Zakari nwɔ kwɛlɛɛn gɛɛ kaa veelɛnąą 1 Ŋą́ ɲɛ̨́i muhəɠə, ŋį́ huwɔ mįnɛ̨ nąąn gaa, 2 malakai kɛi mɛ̨nį ɓo mą́ą́, gɛ́ mą: «Yii mukulaa ɓaa lə?» Yɛ mą́ą́: «Mįnɛ̨ɠaai Ɉuda da Israɛlə ɛlɛɛ Ɉerusalɛmə di hu taɠa taɠa, diɛ li.» 3 Yili pulu, Yai-Laa ə kwɛliyɔw nuą nąąn nɛ mą́ą́. 4 Ŋą́ mąąnįn kɛ nwɔ̨nɔ̨ gɛ́ mą: «Yiiɠaai diɛn, lə ɓə di kaa pai gɛi?» Ə nwóó pulu pənə, yɛ mą́ą́: «Nɔiɠaai tii di wɔ huwalawalai gaa di yəi yɛ di mįnɛ̨, yai di Ɉuda lɔi hu taɠa la, nui lɔpee ta hvo pɛli tɔɔi di la, diɛ ɓə gwɛliyɔw nuąi ŋɛ̨i di pa di mąą kpɛlin ɉii.» 5 Ŋą́ nwun muhəɠə nwɔ̨nɔ̨, ŋį́ kɛɛ takpɛli kaa, ŋį́ hulɔnu ta kaa, lɔi kɔ́ɔn ɲɛli ə ɓo ɲəi. 6 Gɛ́ mą: «Ə́ kaa lii mįnɛ̨?» Yɛ mą́ą́: «Gáá lii Ɉerusalɛmə kɔ́ɔn ɉii; gɛ́ ɲąąkɛnɛ̨ pələ, da goloon gwɛa pələ kaa.» 7 Malakai tii kɛi bələ ɓo mą́ą́, ə kɛi li, malaka takpɛli yɛ pa naakwiɛn ɉii. 8 Ə mo malakai tii ɓa, yɛ mą: «'Li a gilɛ, yɛ́ ɉulɔnon tii lii mą: ‹Ɉerusalɛmə mąąnɛ̨ɛ̨ ə lɛɛ a taa yii hįį hva tɔɔ mą, nu kpulu da daatɛlɛɛɠaai tii pai kɛi laa, di mąą mɛ̨nį ɓa. 9 Ɛlɛɛ, ɲą́ą́n Gáá pai kɛi laa, ŋą́ ɓo a nwɔ̨n, gɛ́ daa mąąkpɛ. Yai-Laa woo li; ɛlɛɛ gɛ́ kɛ a Ɉerusalɛmə nįį.›» Yálá kaa gɔ́luwɔɠaa təlii diɛ pənə diɛ pa 10 'Ka li 'ka li! 'Ka ká kɔ́wɔ mąąhulɔ, ka kulɔ ɲələi pələ lɔi tii hu, Yai-Laa woo li, Yai-Laa yɛ diɛ: ŋį́ ka taɠa taɠa yələkɔlɔn mu nąą kəlee. 11 Siɔn, yɛ́i ŋɛ̨i heeni Babilonə, 'ə muhəɠə, 'pu. 12 Yai-Laa Mɛ̨nį Kəlee ŋą Hééɓomun woo li, Ya ɓə dɔ́ɔ́ a nwɔ heeɓolaa, nɔiɠaai tii too ka mɛ̨i di mąą mɛ̨nį ɓa. Nui lɔpee a tunwɔ̨n kaa, aa tunwɔ̨n ɲɛ̨́ilon ma. 13 Ɲąą gá, gáá pai ɲéé pilii di hu, diɛ too di kpɔwɔ luwɔɠaa yee mu. Yili akɛ tii, ka gɔlɔn gea kaa diɛ; Yai-Laa Mɛ̨nį Kəlee ŋą Hééɓomun ɓə dɔ́ɔ́. 14 'Tómą a kwəinɛ̨ɛ̨, 'kwəinɛ̨ɛ̨ kulɔ, Siɔn taa lɛlɛɛ; ɲą́ą́ gá, gáá pai, gɛ́ hee ə́ kwəi, Yai-Laa woo li. 15 Nu huwu tamąą kaa pai hvilɛn ɉii Yai-Laa pulu, a mąą yələi tii, diɛ kɛ a ɲą́ą́ gbį́nįi nwɔ́ nuą, ɛlɛɛ, gáá pai heei di lɔwai. Akɛ tii, ə́ kili a pu ɉu yɛ́ kɛ Yai-Laa Mɛ̨nį Kəlee ŋą Hééɓomun ɓə dɔ́ɔ́ ə́ pɔ. 16 Yai-Laa kaa pai Ɉuda lɔi həɠəi ɉu a nwɔɔ, a ɉɔlɔɓo hɛn, yai a nɔi mąąhəɠɛɛi; gaa pai pənəi ə Ɉerusalɛmə həɠə ɉu a nįnɛ̨. 17 Nɔ̨ɔ̨-nɔ̨ɔ̨ hɛn gəlee, 'ka ká mɛ̨i haa, Yai-Laa lííla, mąąhɔlɔɓo, aa muhəɠə, yɛ kulɔ nwɔ pɛlɛ́ mąąhəɠɛɛi mu. |