Zakari 13 - Yálá laawoo hɛɓɛ (dc)1 Mąą yələi tii, yá nwun gulɔi ta a kulɔ, Davidə nwɔ pɛlɛ́i mąą mɛ̨nį ɓa, da Ɉerusalɛmə nuą; yɛ kɛ a di wɔ nɛ̨ŋɛ̨nŋaai, da di mąąliɓi mɛ̨nį kəlee hali. Yálá kaa pai hali mɛ̨nį da mɛ̨nį ɲɔ̨n gəlee kulɔi nɔi 2 Yai-Laa Mɛ̨nį Kəlee ŋą Hééɓomun, woo ka, yɛ: ɲələi tii, gáá pai hali mɛ̨nį kpɛɛi nɔi hu, nuąi da Yálá kwəi mɛ̨nį hu kulɔ a lɛɛ, ŋį́ di kpɛ, da di wɔ kili ɲɔ̨nwɔ̨ɔ̨i, di hva kɛa da laa ɓo nɔi. 3 Nąąlɔwai nui a tɔɔ, yɛ kɛ gaa Yálá kwəi mɛ̨nį hu kulɔi, gaa nuą kpįnįi kpɔ-kpɔɔ da kɛ mą: «Mąą hvo kɛa nɛ̨ɛ̨li hvó lɛɛ yɛnɛ̨ɛ̨, lɛɛ ka tii ə́ kaa gɛi a Yai-Laa laa!» Ɛlɛɛ, gaa nąn gbinįi kpɔ-kpɔɔ da gaa lee kpįnįi kpɔ-kpɔɔ, di kaa pai ɓɔi ɉu a kpala, ɓɛlɔwai gaa pai kɛi nwɔ lɛɛ hvaa tii ɓoi la. 4 Mąą yələi tii, Yálá kwəi mɛ̨nį hu kulɔ nuą, mɛ̨nįi da gaa diɛ mo, diɛ kɛ di kaa ɉəɠəi Yálá kwəi, da nwumɛ̨ ɉu; di hva kɛa biliɉu pili di kalan ɉu diɛ nuą ɓowo. 5 Di kaa pai kɛi di hɛai mą, diɛ kɛ mą: «Yálá kwəi mɛ̨nį hukulɔ mun vaa a ɲą́ą́, tíi kɛmun maa a ɲą́ą́. Tíi kɛ lɔi kaa ɲə́i, ə həɠə muhəɠə yələ ɓa.» 6 Ɛlɛɛ, di kaa pai mąąnįn kɛi diɛ kɛ mą: «Lə pala kpɔlɔɔn mə ŋɛ̨i kan ə́ kəŋə hui?» Gaa pai kɛ diɛ: «Di gɛ mą́ą́ nwɔ́ wɛliɠaa yəi bɛlɛ́n.» Daa mįnɛ̨ pu nįnɛ̨ kɔ́lɔi 7 Yai-Laa Mɛ̨nį Kəlee ŋą Hééɓomun woo ka, yɛ: Kɔ-kɔ ɓɔwa, 'ə́ muhəɠə nwɔ́ ɓɛlaa pulumun pɔ, a mɛ́lanmun nwalaai tii. Daatɛlɛɛ pulu mun, 'gɛlɛ, mɛlaahaaɠaa di taɠa. Ɲéé kaa pai yálii bulu, yɛ bɛlɛɛ pɛlɛɛɠaa kɛlɛ. 8 Yai-Laa yɛ diɛ: Mąą yələi tii, nɔi lonnii da kɛ haaɓa, veelɛ a haa, diɛ di kulɔ yɛnɛ̨ɛ̨ nuą lɔwai, Kɛlaa, ɉaaɓanąą tii, a lɛɛ yɛnɛ̨ɛ̨. 9 Gáá pai ɉaaɓanąą tii tɛɛ nwɔ̨n ɉu, ŋį́ ɉu waa, yɛ bələi da wali hu waa la, ŋį́ ɉu həɠeen, yɛ bələi da hɛni hu həɠeen na. Gaa pai kɛi vɛ́lii, ɛlɛɛ, ɲą́ą́n, gɛ́ nwoo mu hon. Gáá pai kɛi diɛ: «Nwɔ́ nu huwu li.» Yaan gaa pai kɛi diɛ: «Nwɔ́ Yálá ɓaa a Yai-Laa.» |