Zakari 12 - Yálá laawoo hɛɓɛ (dc)

Ɉerusalɛmə ɓalo mɛ̨nį da ɲɛ̨i pɔ̨nɔ̨ mɛ̨nį

¹ Mɛ̨nįi Yai-Laa ə mo Israɛlə ɓa, 'mo a lolo. Yai-Laa woo ka; yai yələ kɔ́lɔn bɛli, ə lɔi laa, ə kili tɛɛ nu pɔ; yɛ:

² Gáá pai Ɉerusalɛmə kɛi a lɔɔ gbąmą, yɛ gwɛlɛ lɔiɠaa kəlee kɛlɛ. Ɉuda kaa lɔ pai kɛi tii, a ɓɛlɔwai di kaa pai kɛi kɔ́ pɛlɛi la Ɉerusalɛmə ɓa.

³ A tɛ̨ą, mąą yələ, ŋą́ Ɉerusalɛmə tɔɔ lɔi kəlee lííla, yɛ kwɛni kpuwulu, di hva pɛli muhəɠəi. Nui lɔpee pai kɛi bɔ ə mukpəŋə a ɲee kɔ́lɔɓo. Yili mąą mɛ̨nį ɓa, yɛnɛ̨ɛ̨ lɔiɠaa kəlee kaa pai kɔ́ pɛlɛi mą.

⁴ Mąą yələi tii, ŋą́ lɔi mɛ̨i hooɠaa kəlee yamąn, gɛ́ ɓowo too ɉoomɛ̨inuą kəlee nwun ɉu, kɛlaa, ɲɛ̨́i kwəleen gaa pai kɛi a ɉeɛ Ɉuda nwɔ pɛlɛ́i mɛ̨i. Yii ɓaa a lɔiɠaa di wɔ hooɠaai, ŋą́ gəlee ɲɛ̨i pu. Yai-Laa woo li.

⁵ Ɉuda ɲąąwooɓo nuą kaa pai kɛi moi di kwəi pələ, diɛ kɛ diɛ: Ɉerusalɛmə nuą di wɛi, di hvaŋą kaa Yai-Laa di wɔ Yálái yəi, yai a Mɛ̨nį Kəlee ŋą Hééɓomun.

⁶ Mąą yələi tii, ŋą́ Ɉuda ɲąąwooɓo nuą kɛ yɛ, da nwɔ̨n gɛnɛ̨ hee kpaɠa hu. Yɛ da kpalan dɔɔ, di nɔ dɛ̨ɛ̨ hu. Di kaa pai lɔiɠaa hukalai, di ɓa-mįi-yee hu pələ, da kɔ́ɓɛyee hu pələ, di kwɛlɛ kəlee ɓa. Kɛlaa, Ɉerusalɛmə a lɛɛ tɔɔni dɔɔi.

⁷ Yai-Laa a gbɛa Ɉuda pɛlɛ́ɠaa ɓalo, ə gɛ a Davidə nwɔ pɛlɛ́i ɲɛ̨i pɔ̨nɔ̨ mɛ̨nį, da Ɉerusalɛmə nuą ɲɛi pɔ̨nɔ̨ mɛ̨nį hva kɛ a Ɉuda ɲɛ̨i paa mɛ̨nį.

⁸ Mąą yələi tii, Yai-Laa a goon bɛlɛ Ɉerusalɛmə nuą mɛ̨i, nui kpɔ hvaŋą hvo ɲəi di lɔwai, gaa pai kɛi yɛ Davidə. Ɛlɛɛ, Davidə nwɔ pɛlɛ́i a kɛ yɛ Yálá, ə ɓo yɛ Yai-Laa nwɔ malaka, ə ɓo di ɲɛ̨i tɔwɔ.

⁹ Mąą yələi tii, nu huwuɠaa kpɔ pai kɔ́ pɛlɛi Ɉerusalɛmə ɓa, ŋą́ di ɲąą tɛ di paa mɛ̨nį mu.

¹⁰ Ɛlɛɛ, ŋą́ nɛ̨ɛ̨mąąhvə kili da lii nɛ̨ɛ̨gwəi kili tɛɛi Davidə nwɔ pɛlɛ́i pɔ, da Ɉerusalɛmə nuą kəlee. Nąąlɔwai di kaa pai di ɲɛ̨i tinɛ̨n ɉi bɔ́ pələ, a ɲą́ą́i di ɉɔ́ɔ́ a kpálá. Di kaa pai ɉáá wɔlɔ ɓoi, yɛ da kɛi lon gɔw tanɔ̨n haa wɔlɔ ɓo. Di kaa pai wɔlɔ pui mɛ̨́i a mąąwɛliɛ, yɛ da kɛi wɔlɔ pu lon doloo mɛ̨i.

¹¹ Mąą yələi tii, nwɔlɔi Ɉerusalɛmə kaa pai moi, ɉu a kɛnɛ̨ yɛ Hadadə-Rimɔn haa mɛ̨nį, Megido ɲɛɛkɔwɔ hu.

¹² Nɔi kaa pai ɉaa wɔlɔi tii ɓoi, kwəli kəlee da nwɔɔ. Davidə nwɔ pɛlɛ́i mu nuą da kɛ a di tee, nɛ̨ąą di ɓo a di tee. Natan nwɔ pɛlɛ́i mu nuą da kɛ a di tee, nɛ̨ąą di ɓo a di tee.

¹³ Levi nwɔ pɛlɛ́i mu nuą da kɛ a di tee, nɛ̨ąą di ɓo a di tee. Simei nwɔ pɛlɛ́i mu nuą da kɛ a di tee, nɛ̨ąą di ɓo a di tee.

¹⁴ Gwəli da kpɛli hu nuą da kɛ a di tee, nɛ̨ąą di ɓo a di tee.