Zakari 11 - Yálá laawoo hɛɓɛ (dc)Nɔi hvąŋą kɛnɛ̨ɠaai hu wolo mɛ̨nį 1 Liban, ə́ wɔ pɛlɛ́ɠaai laaɓo, ɛlɛɛ, nwɔ̨n ə́ ə́ wɔ kpitiliɠaai kələn. 2 Siprə wulu, 'ɲiŋɛ̨, mąąhɔlɔɓo, ə́ wɔ kpitiliɠaai daa too, mąąhɔlɔɓo, daa walawalanuą too. Basan hɛanŋąą, 'ka ɲiŋɛ̨, mąąhɔlɔɓo, daa nwɛla hu wiyɛɠaa mɛ̨i yali. 3 'Ə́ wəli tɔɔ daatɛlɛɛ pulu nuą ɲiŋɛ̨ woo ɓa, mąąhɔlɔɓo, daa di ɲɛ̨i pɔ̨nɔ̨ hɛn ɉukala, ɲala gbɔnŋaa tómą woo kaa tɔɔi, mąąhɔlɔɓo, daa Ɉurdɛn nwɔ kpɔwɔ ɲąąkɛnɛi nwun ɲɛɛ, Daatɛlɛɛ pulu nuą hveelɛi mąą mɛ̨nį 4 Yai-Laa nwɔ́ Yálái woo ka; yɛ diɛ: «'Kɔ̨nɔ̨n dɛɛ mɛlaa haaɠaai ŋɛ̨i pɔ, diɛi di paai lɔwai mąąkpɔn ɉii. 5 Di ɲąąkɔnmun hva di ɲɛ̨imąąwɛli lɔpee kaa. Di yamun a di paa hva di mąąliihɛlɛn ɉee, di lɔwɔtɔɔmun, a di lɔwɔ́tɔɔ yɛ kɛ diɛ: Yai-Laa mąmą, ŋą́ą́ kɛ a hɛn nąmu! 6 A tɛ̨ą, vá kɛa yɛnɛ̨ɛ̨ nuą ɲɛ̨imąąwɛli kaa, Yai-Laa woo li. Yɛ diɛ: gáá pai nu tɛi tɛi tooi mɛlan ɲee ŋą, da nwɔ tɔɔmun ɲee ŋą. Tɔɔɓɛlaa kaa pai tooi lɔi mɛ̨i, kɛlaa, və́ pai nuą kulɔi di yei.» 7 Yili ɓə gɛi, daatɛlɛɛɠaai tii yɔw ɓɛlaa di kɛi pa di paai, ŋą́ li a diɛ kala tiliin nɛlɛɛ kɛɛnąą. Tunwɔ̨n veelɛ ɓə kɛ ɲə́i, ŋą́ dɔlɔɔ laa hee a: Mɛ̨inɛ̨ɛ̨, gɛ́ veelɛnąą ɓa: woolaamąą. Ɛlɛɛ, gɛ́ ɲɛ̨́i kɛ daatɛlɛɛɠaa diɛ. 8 Yili pulu, ŋį́ daatɛlɛɛ pulu nuą haaɓai yee kulɔ ɲąnin dɔ̨nɔ̨ yeemu. Ɛlɛɛ, níí hvo kɛa lɛɛ a naa daatɛlɛɛɠaa pɔ, diɛ kpɛli mąn, di hvii ə kpɛɛ mą́ą́ mɛ̨nį hu. 9 Ya ɓə ŋį́ kɛ diɛ: «Vá kɛa li a kaa kala tiliin ɉu. Yii yɛ ə haa, ə haa, yii yɛ ə pili, ə pili, yiiɠaai da lɛɛ, di di keeni mįi.» 10 Ŋą́ nwɔ́ wɛlikɛmąą tunwɔ̨n həɠə, ŋą́ ɉu yali, mįnɛ̨i Yai-Laa da nɔi nuą kəlee di ɉəɠə, ŋį́ ɉəɠə mą. 11 Di gala a mąą yələ, daatɛlɛɛ lɔwɔ́tɔɔ nuą ɲɛ̨i heɛ lɔ kɛ mą́ą́, di gbaɠala kaa diɛ kɛ, Yai-Laa woo pɔ mɛ̨nį ka tii kɛi. 12 Yili ɓə gɛ, gɛ́ diɛ: «A nɛ̨ɛ̨ kaa, ka vɛ́la kulɔ; ka wala kɛ bɔ, ka nɛɛlaa.» Kɛlaa, di vɛ́la kulɔ a wali kwələ pow haaɓa. 13 Yai-Laa yɛ mą́ą́: «'Bili nəɠítɔɔmun bɔ, nwalii tii a nɛ yɛ, və́ di ɲɛ̨i ɓa a hɛn da.» Ŋą́ nwali kwələ pow haaɓai tii həɠə, ŋą́ li la nəɠítɔɔmun bɔ, Yai-Laa yəi bɛlɛ́n. 14 Yili pulu, ŋį́ dunwɔ̨n veelɛnąąi a woolaamąą, ŋą́ ɉu yali, nąnnonnaai tii kɛ Ɉuda da Israɛlə di lɔwai, ŋį́ ɉukala. 15 Yai-Laa yɛ mą́ą́: «Taatɛlɛɛ pulumun ɲəi hɛnŋąą kwɛli, a taatɛlɛɛ pulumun gili kpɛɛ gwəi, yəi hɛnŋąą. 16 Mąąhɔlɔɓo, gáá pai taatɛlɛɛ pulumun da heei nɔi ŋɛ̨i hu, ɓɛlaa ta ə mą pili, yili nii hɛlɛn və pai kɛi mą, da ə mą lan, hvo pai gwɛlii, da mąą ə mą nwąną, hvo pai ɉali kɛi, yiiɠaa di kɔ́lɔi pɔ̨nɔ̨ɔ̨, hvo pai di laa hɔn moi. Yiiɠaai da wulɔ, gaa pai di mįi, yɛ di kɔ́wɔ ɲąnin ɉu ɓɛla.» 17 Kpalo ɓɛlaai taatɛlɛɛ pulumun ɲɔ̨nwɔ̨ɔ̨ ɓa, yai a daatɛlɛɛ kpulu lɛɛ gbɔwɔ ɓa! Mąąnɛ̨ɛ̨ ɓɔwa kwɛaa ə ɲee kɔ́nwɔ̨n ɉu hvala hvala, ə mamįiyee ɲɛ̨i kɔ́w wolo! Ɲee ə kpala mą, ə kpala mą kpɔ a neelee! Mamįiyee ɲɛ̨i kɔ́w ə pɛlɛ mą, ə pɛlɛ mą kpɔ a neelee! |