Woolaa 5 - Yálá laawoo hɛɓɛ (dc)

Pənə ə́ pa a kuɔ ə́ pɔ

¹ Yai-Laa mɛ̨nii aa laa kuɔ, ə́ kiliŋąhiɛ mą; Nwumɛ̨i aa tɛ kuɔ, ə́ gaa.

² Ku kwɛlinŋaa daa lɛɛ nu takpɛliɠaa yəi. Nuąi ku wɔ pɛlɛ́ɠaa kaa di yəi, ku hvo di kɔ́lɔn.

³ Kwaa lɛɛ a təlilɛaa, ku nannii hvo kuɔ ku leeni daa lɛɛ a galanin.

⁴ Kwa kɛ ku ku wɔ yálɔwai ta kpələ hvo kɛli kwa ɲá a wali. Hvo kɛli kwa ku kpɔɔ kwɛi yiliɠaa tii yá, hvo tɛɠa lɔ bɛlɛ́n.

⁵ Nuąi ku mɔ̨nɔ̨ ɓoi, di kaa pɛlɛni ku pulu; ku hvįi aa kpɛɛ, ku hvįitɔɔ pələ hvo mą.

⁶ Kwáá ku yee haŋą Eziptə lɔi pɔ pələ, da Asiri lɔi, əgɛ, ku kɔ̨nɔ̨n ɉɔlɔɓo, ku mįi ku pilɛ la.

⁷ Ku nąnnii nɛ̨ŋɛ̨n ɉəɠə, daa haa; kuɔ ɓə kɛa ɉu mɔ̨nɔ̨ mįi.

⁸ Hvó gaai! Luwɔɠaa daa hee ku mɛ̨i. Nu hvo mą, hvo ku kulɔ ɲəi kɛ.

⁹ Ku kɔ̨nɔ̨n ɉɔlɔɓoi kaa kpɔ a haa wolo la. Too-kwɛ́liɠaa yəi mowa ŋą ɓə kwa ku kɔ̨nɔ̨n gwɛli laa nɔi pun ɉu.

¹⁰ Pulu aa ku kɔ́lɔ kələn kuɔ yɛ nwɔ̨n dįnįi pɔ́lɔ.

¹¹ Daa too Siɔn nɛ̨ąą mɛ̨i ə mą kɛ, Ɉuda daa-lee hu nɛ̨ɛ̨lɛaa.

¹² Daa galanɉonŋaa hɛlɛn di hvo kpɛli ɓɛlɛ kɛ li ɉulɔgoloɠaa diɛ.

¹³ Gwənąi hiɠaa aa lɛɛ laŋąą nwuɔ̨ ɉilɛ lɛapɛlɛɛ diɛ too kwɛi yili mu.

¹⁴ Ɉulɔgoloɠaa di hvo kɛa lii nwun dɔɔ hu, hilɛlɛa di hvo kɛa hvɛli kɛi.

¹⁵ Kwəinɛ̨ɛ̨ aa kpɛɛ ku yəi ku wɔ kwəinɛ̨ɛ̨ mąną kəlee aa lɛɛ a haa wɔlɔ.

¹⁶ Ku wɔ tɔɔlaai aa pu. Oo kə! Kpalo aa ɓɛla kuɔ, Mąąhɔlɔɓo, kwaa nɛ̨ŋɛ̨n ɉəɠə.

¹⁷ Yili mąą mɛ̨ni ɓə kwaa kɛ la a ɲɔ̨n gɛ nuą, yili ɓə ku ɲɛ̨i kpįnįi kuɔ.

¹⁸ Siɔn yee mąą a wɛli kɛa; lɔwɔ-yilɛɠaa diɛ gilɛ həɠə mą.

¹⁹ Kɛlaa, ə́ wɛi, Yai-Laa! Ə́ kaa laa a yələ kəlee; ə́ wɔ tɔɔkpəlin gaa a kwɛlan gəlee mɛ̨ni.

²⁰ Lə mɛ̨ni ɓa ku kili a kpɛɛ ə́ ɲą kpɔ tii a ɉukwɛaa-o! Ɛlɛɛ, yɛ́ lənə la kuɔ a yələ kəlee?

²¹ Yai-Laa! Pələ laa ɓo ku tɔwɔ, ku pa ə́ pɔ. Pənə ə́ kuɔ yɛnɛ̨ɛ̨i pu nįnɛ̨ kɔ́lɔi, yɛ bələi ə kɛ la a tɔlɔɔ-tɔlɔɔ yələ.

²² Akɛtii, ku pili kpɔlɔɔ ɓə tii Ə́ moi? Ku túwɔ́ pələ aa ə́ liiholi aa tɛɛ gɛi ɓa? Hvo ku pili kpɔ tɛ̨ɛ̨tɛ̨ɛ̨; pələ laa ɓo kani ku tɔwɔ!