Woolaa 3 - Yálá laawoo hɛɓɛ (dc)

Mɔ̨nɔ̨ da liilaa

¹ Gáá a nui aa mɔ̨nɔ̨ kɔ́lɔn Yai-Laa nwɔ hvaɠai mu.

² Ɲą́ą́ ka tii gaa bili ɲee ɲɛ̨i tɔwɔ, gɛ́ hiɛ kpįnįi, və́ kɛɛ pono kaai.

³ Ɲą́ą́ dɔ̨nɔ̨ lɔ ɓə a ɲee haŋą mɛ̨́i a yələ kəlee.

⁴ Aa gbála, ə həɠə nwúɔ̨ ə too la gɔ́wɔ́ ɓa aa gɔ́wuɠaa hu yali yali.

⁵ Aa mą́ą́ tinɛ̨n a mɔ̨nɔ̨ da liikələn gwəi.

⁶ Aa dóó kpįnįi yɛ nuą daa haa.

⁷ Aa gala tɔɔ mą́ą́, ə́ gɛ və́ pa kulɔ, aa gɔ́wɔ́ lɔ kpɔ̨nɔ̨ wia hu.

⁸ Ə mą kpɛli kɛ gáá tomąi, gɛ wɔlɔ, a nwɔ́ hvɛli woo kpɛla bələi.

⁹ Aa kwɛni kpuwulu mɛ̨i kwɛa tɔɔ nwɔ́ pələi hu, bələ lonŋaai ŋą́ tɛɛ la a ɉu kpįnį.

¹⁰ Aa nowu dɔ́wɔ yɛ kwɛ́li yɛ Yala aa kɛi huwɔ maahɛɠi.

¹¹ Aa ɲɛ̨nɛ̨ɛ̨ kɛ laa wala ɲə́i aa gbɛ́lɛɠɛlɛn hvaa hvo kpɛli kulɔ li ná.

¹² Aa nwɔ kilɛn ɲala ɉu, aa ɲɛ̨i hee mą́ą́.

¹³ Aa nwɔ taɠai hu mɛ̨ɛ̨kɔwɠaa kpanwo nwóɓəi.

¹⁴ Nwɔ́ nuą kəlee diɛ yɛlɛ mą́ą́ gɛ́ ɓo a di wɔ yɛlɛ kulɔ ɉu hɛn a yələ kəlee.

¹⁵ Aa góó laahvɛɛ a kala nwąną nwąną aa ɉón.

¹⁶ Aa kwɛni hee ɲį́nŋą aa dóó luwu hu.

¹⁷ Aa vɛ́ɠɛ yíi nɛ̨ɛ̨ hu, və́ kɛa nwun na nɛ̨ɛ̨ kɔ́lɔn.

¹⁸ Ya ɓəi gɛ, gɛ́ diɛ: «Nwɔ́ kilitɔɔi a həɠə Yai-Laa pɔ, aa kpɛɛ, nwɔ́ yɛnɛ̨ɛ̨ aa kpɛɛ.»

¹⁹ Ŋą́ kɛi gíliŋąhiɛ nwɔ yɛnɛ̨ɛ̨ ɓa, da nwɔ́ mɔ̨nɔ̨i, gaa yɛ pilimąą da kaalə nwąną.

²⁰ Ŋą́ gílíŋąhiɛ mą! Ŋą́ gíliŋąhiɛ kpɔ mą, yili a níi yali gwə́i:

²¹ Yii kpɔ nį́i laa mɛ̨i, kilitɔɔmąą yɛ hɔlɔɓo ɉu ɲə́i, ya ɓaa:

²² Yai-Laa nwɔ mɛ̨inɛ̨ɛ̨ɠaa di hva kpɛɛ, nwɔ wɛlikɛmąą yee kɔ̨nwɔ̨n ɉu hva haa.

²³ Di gaa lɔ a di nįnɛ̨ yələwala kəlee. Yai-Laa! Ə́ wɔ kulɔ nwoo ɓalaa hu kɛnɛ̨i

²⁴ Gɛ́ diɛ: Yai-Laa ɓə gaa a nwɔ́ hɛn gɔw. Mɛ̨nii gɛi, gilitɔɔ la mą, yaa li.

²⁵ Nui a gilitɔɔ Yai-Laa ɓa, mąą nu a Yai-Laa nwɔ túwɔ́ pələ lɛlɛɛ kɔ́lɔn.

²⁶ Viɛlaɓoɔi nu ə kilitɔɔmąąlaa kɛ laa pilɛ hu, yɛ Yai-Laa nwɔ nwun mąąɓo mąąkpɔn.

²⁷ Nu ə mɔ̨nɔ̨ mįi a ə́ muhəɠə yələ hviɛlaɓoɔi.

²⁸ Ə hee dɔ̨nɔ̨ konɉu ə mɛ̨ihaa ɓɛlɔwai Yai-Laa a yili laa la nwuɔ̨.

²⁹ Ə naa pɛlɛ pɔ́lɔ hu, kiɛ-o! Yai-Laa kaa pai mɛ̨ni ta kɛi ɉu.

³⁰ 'Ə́ nwəli lɛɛ nowa mun ɲəi, ə niikpələ lalan ɲəi.

³¹ Gbalai tɔɔ, Yai-Laa hva gili kulɔ nwɔ nuąi hu a yələ kəlee.

³² A mɔ̨nɔ̨ laa nu mɛ̨i, a tinɛ̨n ə ɲɛ̨i mąąwɛli kaa, nwɔ ɲɛ̨imąąwɛlikaa kɛnɛ̨i.

³³ Yai-Laa kwəinɛ̨ɛ̨ mɛ̨ni hvaa yɛ a nuą nwumɛ̨ɛ̨, ɛlɛɛ, yɛ mɔ̨nɔ̨ laa di mɛ̨i.

³⁴ Daa kɛi nɔi gaho nąmįną kiin a di kɔ́wɔ,

³⁵ Daa kɛi nu kan nwɔ tɛ̨ą mɛ̨ni kpɛlaan Hɛn-Gəlee-Mɛ̨imun ɲɛ̨i ɓa,

³⁶ Diɛ nu lonnii hvulu kiti haɠa ɓa, Hɛn Gəlee Nąmu! Hva mɔ̨ɔ̨ kɛ nąą kaai?

³⁷ Gbɛɛ ɓə a mɛ̨ni ɓo, mąą mɛ̨nii yɛ kɛ? Kɛlɛi Hɛn Gəlee Nąmu ɓə-ee?

³⁸ Kɛlɛi Hɛn-Gəlee-Mɛ̨imun naaləi lɔ ɓə, ɲąąnwąnąą da ɲąąnɛ̨ɛ̨ da kulɔ laa-ee!

³⁹ A kɛ tii, nu a kɛ yɛnɛ̨ɛ̨, lə mɛ̨ni kpɔ ɓə nu a pɛli nwoolaai ɉu? Nu kəlee ə nwoolaa gbɔwɔ kɛ hɔn mąą mɛ̨ni ɓa.

⁴⁰ 'Ká gu gu kpɔwɔ kpįnįi yíi pələ hu kpɛ a nɛlɛɛ, 'ká gu gu pulu tɔɔ ɲɔ̨nwɔ̨ɔ̨ ɓa, gu pa Yai-Laa pɔ.

⁴¹ 'Ká gu gu yee da gu lii kəlee tɛ, yələkɔlɔn ɉu Yálá ɓa.

⁴² Kuɔ ɓə nɛ̨ŋɛ̨n ɉəɠə, kuɔ ɓə nwoo lɛɛ, yaan, hvo ku mąąwɛli kaa li.

⁴³ Yáá lɔ ə́ wɔ liiɲąnwąną hu, yɛ́ ku kpɛ la, yɛ́ ku hukala a nwąnąlɔɔ pələ.

⁴⁴ Yáá ə́ mąą kpįnįn gɛ a tulɔ kpįnįn ə gɛ, ku wɔ hvɛli wooɠaa di hvo pa həli yɛ́.

⁴⁵ Yáá ku kɛ a kala, Yáá ku pili túlún ŋą hį́i takpɛliɠaa lɔwai.

⁴⁶ Ə́ yowoɠaa kəlee daa di laa tinɛ̨n kuɔ, diɛ hvaa pɛlɛ kuɔ.

⁴⁷ Ku wɛi aa lɛɛ a ɲɔw da hulowaɓo, a ku mąą kpoloonŋaa, da kɛɛ kalaa kuɔ.

⁴⁸ Ɲɛ̨́iyá aa gboloon naa nwɔ́ lɔi hu nɛ̨ɛ̨gbɛlaɠaa mąą mɛ̨ni ɓa.

⁴⁹ Ɲɛ̨́iyá hva kpala ɲɛ̨́i, mąąhɔlɔɓo, kpɛla bələi hvo nwɔ́ mɔ̨nɔ̨i ɓa.

⁵⁰ Gáá ɓɛ gɛ́ nąą mąąkpɔn, ə lɛɛ ɉu Yai-Laa ə lɛɛ yələi ə nwun mąąlaŋąn mą́ą́.

⁵¹ Mɛ̨nii ŋɛ̨i a laa nwɔ́ taai hu nɛ̨ɛ̨kpɛlaɠaa diɛ, aa laa diɛ a gbonąą, yɛ ɲɛ̨́iyá too mą́ą́.

⁵² Nuąi di kpanwoɔ mą́ą́, di kaa búlu diɛ gbɛ́ yɛ nwɛ̨nį.

⁵³ Daa nɛ́ɛ́ a vúlú, daa doo lɔwai, daa kwɛni kpuwulu laa nowa la.

⁵⁴ Yá ə kɛi nwún mɛ̨i pu, gɛ́ kɛ diɛ: nwún na aa pili.

⁵⁵ Ŋą́ lɛɛ nowa kpon ɉu, Yai-Laa! Ŋą́ ə́ təli a ə́ laa.

⁵⁶ Ə́ kaa dómą woo ŋɛ̨i mɛ̨n ɉi; hvó kɛ ə́ kaa ə́ wəli laa kpului ɲįŋɛ̨ woo da nwɔ́lɔ woo tɔwɔ.

⁵⁷ Ɲələi ŋą́ ə́ təli la, ə́ pa yɛ́ mą́ą́: «'Hvó kɛ ə́ kaa ɲɔwi.»

⁵⁸ Hɛn gəlee Nąmu! Yáá nį́i mąąkɔ̨nwɔ̨. Yáá nwɔ́ yɛnɛ̨ɛ̨ nwun mąąɓo.

⁵⁹ Yai-Laa! Mɛ̨ni daa naa mą́ą́, yɛ́ kpįnįi gbaɠala kaa yɛ́! Mą́ą́ mɛ̨ni hutɔɔ kani a ɉaŋąą kɛa wɛ!

⁶⁰ Yɛ́ kpįnįi, yáá di wɔ kiliŋąhiɛ ɲɔ̨nwɔ̨ɔ̨ tii kaa yɛ hvilɛn na mą́ą́;

⁶¹ Yai-Laa! Yáá di wɔ lalan bili woo mɛ̨n! Kiliŋąhiɛ ɲɔ̨n gaa di kwəi yɛ hvilɛn mą́ą́, yáá gaa!

⁶² Mɛ̨nii kɛi kulɔ ɲówoɠaa la, a yələ kəlee yɛ hvilɛn na mą́ą́, yɛ́ kpįnįi gaa tai;

⁶³ Di kɛ heeni-o, di həɠə di tɔɔ-oo, náá kaa kpɔlɔɔ di la a wələ.

⁶⁴ Yai-Laa! Di túwɔ́ pələi tii kwələ kulɔ diɛ.

⁶⁵ Di kili walawala di kwəi, Ə́ di nɛ̨ŋɛ̨n naa.

⁶⁶ Ə́ wɔ liiholi ɲąątɔɔ diɛ ə́ di kulɔ ə́ wɔ yələkɔlɔn mu; di həɠə ə́ ɲɛ̨ilaa.