Wɛli 7 - Yálá laawoo hɛɓɛ (dc)Nɛ̨ąą da nɛ̨ɛ̨lɛa 1 'Pənə ə́ pa! 'Pənə ə́ pa Sulamə Nɛ̨ɛ̨nu! 'Pənə ə́ pa! 'Pənə ə́ pa! Ku ə́ wɔ lɛlɛ mąąkpɛɛ! Ka pɛli Sulamə nɛ̨ɛ̨nui ŋɛ̨i nwɔ lɛlɛ mąąkpɛɛi ləi? Yɛ mąną yɛ, nu a kɛ kpulu heei hveelɛ lɔwai? Nwɛli hulɔnu 2 Tɔɔmun non nɛ̨ɛ̨nu, ə́ kɔ́wɔ lɛlɛɛi ə́ wɔ kɔ́lɔi hu. Ə́ kpilikɔlɔn ɲaliɛ yɛ kwɛɛn a kɛ ə́ ləŋəi, gaa kpɔ a yɛlɛ kɛmun nwɔ yɛlɛ kɛɛ. 3 Ə́ koo kpala miliin ga yɛ ŋąnin naa nįnɛ̨, nowa toɔ yɛ lɔɔ gbama yii lɔɔ hva kpɛɛ ɉu. Ə́ koo kaa yɛ mɔ̨nun gɔn, yɛ Yagbudɛn aa kɛi pa hvólóon ɉii. 4 Ə́ ɲįnį hveelɛi kaa yɛ yonŋaa, di kulaa di kee ɓa yɛ lomą lonnii. 5 Ə́ kɔ́n gbono kaa yɛ hə́lə́ ɲin ə́ ɲɛ̨ikɔw mąąhəɠɛɛ yɛ kwɛni hu yá, aa kɛi kulɔ Batə-Rabimə nwɔ kpon kwɛlɛ. Ə́ hunwɔ ə ɓo yɛ Liban taa mąąkpɛ pɛlɛ́ kɛnɛ̨i ɲɛ̨i heɛ Damasə pələ. 6 Ə́ nwun galən gaa ə́ ɲa yɛ Karmɛlə yee, ə́ nwun nəɠa ə ɓo a dɛɠiɛ mu kpɔluɔ, ɛlɛɛ, tɔɔmun ɲɛ̨i kpɔn ŋąą mą. 7 Ee! Níiɓa nɛ̨ɛ̨nu! Ə́ lɛlɛɛ ɓə! Guɔ, ə́ lɛlɛɛi tai! 8 Ə́ yee muhəɠɛɛ yɛ tow wulu, ə́ ɲįnįɠaa di ɓo yɛ tow nwun ɉiɛ gɔnwɔn ɉu. 9 Gɛ́ diɛ: «Hvo kɛli ŋą́ tɛ dowui ŋɛ̨i hu, ŋą́ ɲéé pɛlɛ nwun ma gɔnwɔn ɉu.» Ə́ ɲįnį ə kɛ ɲə́i yɛ viɲə ɓá. Ə́ nɔ̨ɔ̨ mąą kun nɛ̨ɛ̨ ə pu mą́ą́, yɛ mąątí wulɔ. 10 Ə́ woo ə ɉón yɛ lɔɔ nɛ̨ɛ̨! A tɛ̨ą, gɛ́ nɔɔ nɛ̨ɛ̨ ti ɉəɛ nwɛ́likɛmąąmun dɔwɔ, ə yíi nuą laawulun ɉu yɔwɔ. Nwɛli nɛ̨ɛ̨nu 11 Nwɛ́likɛmąąmun bɔɔ ɓaa ɲą́ą́, ɲą́ą́ lɔ ɓə gili kaa mą́ą́. 12 Nwɛ́likɛmąąmun! 'Pa! 'Pa gwəli ɲagbudɛn nwun ɉu, gu yíi laa. 13 Yələ wala piinɛ̨ɛ̨, gu humo viɲə yɛa, gu gaa, akɛ gaa kpuwun ɉii, akɛ bowa aa hee ɉu. Akɛ gaani wuluɠaa kaa powai, Akɛti ŋą́ nwɔ wɛlikɛmąą hu mɛ̨inɛ̨ɛ̨ kɛ yɛ́. 14 Mandragorə mąą kun gaa tɛi. Wulu ɓa nɛ̨ɛ̨ɠaa kaa kɛa ku yəi bɛlɛ́ laaləi. Nįnɛ̨ɠaa da bɔlɔɠaa, ŋą́ gəlee laa nwɛlikɛmąąmun mąą mɛ̨nį ɓa. |