Wɛli 6 - Yálá laawoo hɛɓɛ (dc)

Vaamu

¹ Nɛ̨ɛ̨nu lɛlɛɛ! Ə́ wɛlikɛmąąmun ə li mį? Mįnɛ̨ pələ ɓə ə ɉon na? Ə gɛ gu kəlee gwəli gu gwɛli.

Nwɛli nɛ̨ɛ̨nu

² Nwɛ́likɛmąąmun gaa yɛɛi ɲəi nɔw yɛa, nwulu powa kun nɛ̨ɛ̨ tii hu; Yɛ li nwɔ taatɛlɛɛɠaa kɔ̨nɔ̨n gɛi laa, ɛlɛɛ yɛ ɲagbudɛn bowa ta kulɔ.

³ Nwɛ́likɛmąąmun bɔɔ ɓaa ɲą́ą́, yaan bɔ́ɔ́ ɓaa a yaa. Yai a nwɔ taatɛlɛɛɠaa laa hɔnmo Yagbudɛn ɉu.

Nwɛli hulɔnu

⁴ Nwɛ́li, ə́ lɛlɛɛi yɛ Tirsa taa yɛ Ɉerusalɛmə taa. Ə́ lɛlɛ pələ a nu hupu mą, yɛ kɔlaɠa a kɛ kɔ́ kpąnąn na.

⁵ Ə́ ɲɛ̨i tinɛ̨n ə́ ɉəɠə mą́ą́, gbalai tɔɔ, yái ɲɛ̨i hee mą́ą́, a ɉúpu mą́ą́. Ə́ nwun nəɠa kaa yɛ ɓolu kpulu a kɛ Galaadə yee ɓa.

⁶ Ə́ ɲįn yɛ kwələ yɛ ɓɛlaa kpulu a həɠə nwaai. Gəlee ɲąą pɛliɛ hveelɛ hveelɛ, da hvo pili li ɉu.

⁷ Ə́ kumɔ yɛ kpɔlu yɛ́, gaani kpuwulu huɓɛlaa ə́ wɔ ɓɔlɔi mu,

⁸ Tɔɔmun nɛ̨ąni da pɛli kɛi pow mɛ̨ida, nwɔɔ wɛli nɛ̨ąą di ɓo pow mɛ̨ihaaɓa, lonon hva kɛ nwɔ nɛ̨ɛ̨lɛa kpulu ɓa.

⁹ Nwɛ́i! Yɛ́ lɔ ɓə a nwɔ́ tonwələn gbɔlun, yá ɓə a mɛ̨nį laahvɛɛ kəlee Yaa tanɔ̨n nɔ ɓə nee ə gaa, ɛlɛɛ nwɛli kaa gaa lee ɓa kpɔ kɛnɛ̨. Nɛ̨ąą takpɛliɠaa da gaa, diɛ nwɔ nwun na nɛ̨ɛ̨ mąątɛ̨nɛ̨. Tɔɔmun nɛ̨ąni, da nwɔ wɛliɠaa, diɛ mąątɛ̨nɛ̨.

¹⁰ Yili mąą nɛ̨ɛ̨nui ɓaa gbɛɛ? Mąąhəɠɛɛ yɛ yələɓɔi kɛɛ pɔ̨nɔ̨, nɛlɛɛ yɛ ɲąnin vələ, yɛ lən yɛ hvóló tɛɛ nwun ma. Mąą ɲɔwuɔ yɛ kɔlaɠa a kɛ ɲəi ɉilɛyili mu.

¹¹ Ŋą́ li ɉihɛn ɲɛa, ŋį́ yɛɛ ɉihɛn bɛlɛɛɠaa mɛ̨i kaa moloon ɉu, akɛ viɲəɠaa kaa kpuwun ɉii, akɛ gaani wuluɠaa daa powa.

¹² Gɛɛ və́ mɛ̨nį ta ɲąą kaa; níiɓa mɛ̨nį ə gɛ́ yɛ, nwɔ́ tɔɔ lɔi hu kɔ́ wotoloɠaa.