Wɛli 5 - Yálá laawoo hɛɓɛ (dc)Wɛli hulɔnu 1 Gáá pai ɲə́i nɔw yɛa. Oo níiɓa nɛ̨ɛ̨non, nwɔ́ wɛli. Gɛ́ nwɔ́ hąmą kun nɛ̨ɛ̨ da nwɔ́ laakpala kun nɛ̨ɛ̨ɠaa kulɔ, gɛ́ nwɔ́ kwɛin nwulɔ nɛ̨ɛ̨ ta kɔ̨mɔ̨n, gɛ nwɔ́ lɔɔi da nwɔ́ nįŋɛ̨ ɲįnįyái ta kpələ. Mɛ́laa! Ka ka laa mįi. Ka ka kpələ. Wɛlikɛmąąlaa ə ka hon yɛ lɔɔ. Vaamu nuą Ŋą́ kɛi yii, kɛlaa gáá a ɲɛ̨́i 2 Ɲɛ̨́i pɛlɛɛ kɛ mą, Kɛlaa və́ kɛi yíi, ŋą́ nwɛ́likɛmąąmun tin mɛ̨n, yɛ gbon gɛlɛ, yɛ kɛ mą́ą́: Oo níiɓa nɛ̨ɛ̨non! Nwɔ́ wɛli! Nwɔ́ tonwələn gbɔlu! Ɲə́i hɛn gɔw! Nwɔ́ mɛ̨nį laahvɛɛ kəlee; Nwúɔ̨ yɔwɔɔ nii a yələɓɔi bɔ nąnąąn, nɛɲá hɛlɛn ŋąą ni nwún nəɠa ɓa. Nwɛli nɛ̨ɛ̨nu 3 Ŋą́ą́ mą́ą́ hɛnŋaa kulɔ mą́ą́, ŋą́ pənə kpɔ kɛa ləi gɛ́ gɛ mą́ą́! Ŋą́ą́ gɔ́wɔ́ ɓa kələ a nɛlɛɛ, ŋą́ pənə kpɔ kɛa ləi gɛ mąąliɓi! 4 Nwɛ́likɛmąąmun aa ɲee lɔ gbon nwolo ɓa, ŋą́ą́ ɲee kaa, níi aa ɓɛla mą́ą́. 5 Ŋą́ mąn múhəɠə ɉa, gɛ́ li bɛlɛ́ laa ɓoi, nwɔ́ wɛlii tɔwɔ. Ɲéé ŋą yɔwɔ ni a mąątí wulɔ, gun nɛ̨ɛ̨ yɛ hąmą; nwulɔ kun nɛ̨ɛ̨ tii kɛ ɲéé ɓa, ə lɛɛ gbon-gwɛli ɓa. 6 Ŋą́ą́ bɛlɛ́ laa ɓo nwɔ́ wɛlii tɔwɔ, Kɛlaa, nwɔ́ wɛlii ə tɛɛ lɔ ɲɛ̨́i hvili, lii tii aa mo, nwooɠaa di kɛi níi kulɔ mą́ą́; ya hvə, ŋą́ą́ gwɛli! Ŋą́ą́ dəli lɔ kpali-kpali! Hvo hvaa li ɲə́i. 7 Kwa daa mąąkpɛ nuą ku kwiɛn, diɛi da kɛ tinɛ̨n ɉii a daa, di gɛ́lɛ, di mą́ą́ nwąną, di nwɔ́ həɠəi kulɔ mą́ą́; diɛi a daa mąąkpɛ nuą. 8 Ə həli kaa Ɉerusalɛmə nɛ̨ɛ̨lɛa! Nwą́nąi ka ŋɛ̨i gaa moi kaa-o; Ka li ka nwɔ́ wɛlii kaa, ka kɛ mą lə? Ka kɛ mą: Wɛlikɛmąą ka ŋɛ̨i aa ɲɔ̨n bɛlɛ mą́ą́. Ka gaa ka mo tii mą. Nɛ̨ɛ̨lɛa 9 Nɛ̨ɛ̨non nɛlɛɛ! Lə kpɔ ɓə ɉulɔnu tii yəi, lə ɓə ɲəi yɛ tɛɛ la mɛlaa diɛ? Lə kpɔ ɓə ɲəi yɛ tɛɛ la mɛlaa diɛ-o? Yai yá mąą kwɛla ɓo! Nwɛli nɛ̨ɛ̨nu 10 Nwɔ́ wɛlii, nwɔ kɔ́lɔ kwə́lə́ mu kpɔluɔi a nɛlɛɛ, ə mą kɛ mɛlaa hinąą waa pow lɔwai, gɔlɔn naa nɛ̨ɛ̨ ɓə. 11 Nwun galən gaa a hɛni kpuwulu hu waa və-və, nwun nəɠa kwɛa buɔ gɔnbulu, dɛɠiɛ yɛ gwoą-gwoą. 12 Ɲɛ̨i kwɛlɛ laa yɛ yá kwɛlɛ tonwələn, yɛ nwaa a ɲįnįyá. Ɉeɛi ɲąąnɛ̨ɛ̨ hu. 13 Gumɔɠaa kaa yɛ wulu powa mąą kun nɛ̨ɛ̨, gun yɛ tɛ. Naawulun gaa yɛ yagbudɛn powa aa kɛi hvólón; yai gun a kulɔ a nɛ̨ɛ̨. 14 Ɲee miliin gaa yɛ hɛni kwɛli a kɛ nu yee ɓa. Mąą puɔ a yái kwɛni kwɛlɛɛ. Gbini yɛ kpɔlu yɛ hə́lə́ ɲin, daa safirə kwɛni pɛlɛ gɔlɔ ɓa. 15 Gɔwɔ kaa yɛ pɛlɛ́ hɔlɔɔn yii dɔɔ a kawulu, Vilɛn ŋąą hɛni gbono mɛ̨i. Nwun nąn ŋąą mɛlaa mɛ̨i yɛ Liban yee, dɔɔ mɛ̨i kwɛa yɛ kpitili wulu. 16 Ŋą́ kɛi nɛ̨nɛ̨ɓo, gwə́i a nɛ̨ɛ̨. Goloon a nwɛli too mą́ą́ kɛnɛ̨. Bələ ɓə nwɛ́likɛmąąmun gaa la. Ɉerusalɛmə nɛ̨ɛ̨lɛa, bələ ɓə ɉíɛ gee pulu kaa la, bələ nwɔ́ wɛlii kɛ pələ kaa la. |