Wɛli 4 - Yálá laawoo hɛɓɛ (dc)

Nwɛli hulɔnu

¹ Guɔ ə́ lɛlɛɛ ɓə! Nwɛlikɛmąą nɛ̨ɛ̨nu, ə́ lɛlɛɛ ɓə tai! Ə́ ɲɛ̨i kwɛlɛ laai yɛ tonwələn gbɔlun, ə́ wɔ ɓɔlɔi mu. Ə́ nwun nəɠa laa gee mɛ̨i, yɛ ɓolu kpulu a kɛ Galaadə yee ɓa.

² Ə́ ɲin gwɛlɛɛ, yɛ da ɓɛlaa kpulu waa a nįnɛ̨ diɛ li nəɠa mɛ̨i teei. Di ɓo di kee pɔ hveelɛ hveelɛ, da hva mɛlan nɛɛ.

³ Ə́ laa wulun ɉu kaa yɛ həɠə ɓɛla kpɔlu, ə́ nɛn nɛlɛɛi ə́ la. Ə́ kumɔ ə ɓo yɛ gaani kpuwulu hu ɓɛlaa, ə́ wɔ ɓɔlɔi mu.

⁴ Ə́ kɔ́n yɛ ɓo yɛ Davidə nwɔ yələi pɛ́lɛ́i, mąą miliin buɔ a gulááɠaa di wɔ kɔ́ kɔ́ gbalai;

⁵ Ə́ ɲįnį hveelɛi kɛ pələ kaa, yɛ lomą lon veelɛ, diɛ kpɔlu wulu powaɠaa lɔwai di kɔ̨nɔ̨n gwɛlii lɔwai.

⁶ Gɛɛ pɛlɛ́ kɔ́n nįnįn hvo pu gee hu, gɛɛ hvitili hvo kɛ pui, gáá gíliŋąhiɛi bá mɛ̨nį ɓa, gɛ́ diɛ, ní hiɛ ka ɉamą kun nɛ̨ɛ̨ yee ɓa, da lansan yee ɓa.

⁷ Ə́ nąą kəlee lɛlɛɛi tai. Níiɓa nɛ̨ɛ̨nu! Guɔ, ə́ mąą kulɔi hvo yɛ́.

⁸ Oo! Nwɔ́ wɛlii! Pa bɔ́, həɠə Liban yee nwuɔ̨, ə́ pa bɔ́, həɠə Amana yee nwuɔ̨, həɠə Senirə yee nwuɔ̨ da Hɛrmɔn həɠə ɲala woloɠaa tii la, da gwɛli woloɠaa tii la, ə́ pa!

⁹ Nwɛli! Ə́ ɲɛ̨i heei mą́ą́ tanɔ̨n a níi ɓɛla mą́ą́, ŋą́ ɲɛ̨i hee lɔ ə́ kɔ́n mįnįin ma, va gbɔ́wɔ́ hɔlɔɓo.

¹⁰ Ə́ wɔ wɛlikɛmąą a nįilɔ, oo níiɓa nɛ̨ɛ̨non! Nwɔ́ wɛli, ə́ wɔ wɛlikɛmąą nɛ̨ɛ̨i dɛɛ lɔɔ ɓa, ə́ mąą kun nɛ̨ɛ̨ dɛɛ mąątí wulɔ kəlee ɓa.

¹¹ Ə́ woo nɛ̨ɛ̨i ə́ la, yɛ kwɛi gban naa nįnɛ̨. Kwɛin nwulɔ da ɲįnįya di kaa ə́ nɛ̨n mu, ə́ mąą həɠə hu kun nɛ̨ɛ̨ yɛ Liban mąąti wulɔ.

¹² Ə́ Kaa a nɔw yɛa mąąkwənąnŋąą, oo níiɓa nɛ̨ɛ̨nu! Nwɔ́ wɛli! Ə́ kaa a yáton mąąkwənąnŋąą, yá nwun gulɔi nąmu kɔ́lɔn ɉi kaa mą.

¹³ Ə́ wɔ yái, yɛ gaani yɛaɠaa laahɔnmo, diɛi di ɓa nɛ̨ɛ̨; da hɛne powa, ɛlɛɛ, nardə,

¹⁴ nardə da safran, nɔw mąą kun nɛ̨ɛ̨laa, da wulu kɔ́lɔ kun nɛ̨ɛ̨, ɛlɛɛ, hɛn gun nɛ̨ɛ̨ɠaa yɛ bələi hąmą kaa la da hɛ́ɠɛ́lɛ́, mąąti wulɔ huwui lɔpee gəlee.

¹⁵ Gaa a nɔw yɛa yáton, a tɛɛ yá lon nwun gulɔi, yii a həɠə Liban.

Nwɛli nɛ̨ɛ̨nu

¹⁶ Ɲánwuɔ̨ hvaŋą da ɉɛɠɛɛ pələ hvaŋą! Ka ka ɲįnąą ɓo! Ka pa gwəli. Ka pu nwɔ́ nɔw yɛai ɓa, ka mąą kun daɠa. Yɛ́i ɓaa níiɓa nɛ̨ɛ̨nu, Pa! Ə́ yəi nɔw yɛa. Ə́ naa wulu ɓa nɛ̨ɛ̨ɠaa kɔ́ɔn.