Wɛli 3 - Yálá laawoo hɛɓɛ (dc)Gáá nwɛ́likɛmąąmun gwɛlii 1 Kpinii, ŋą́ kɛ laani ɲə́i gbinŋą, ŋą́ ɲéé hiɛ gwɛlɛ, və́ nwɛ̨́likɛmąąmun gaa, ŋą́ gwɛli kpɔ və́ gaa. 2 Hvo kɛli ŋą́ múhəɠə, ŋą́ daa mąątinɛ̨n, ŋą́ bələɠaa mɛ̨i kaa, da gwəli hɛ̨ąiɠaa, nui mąą mɛ̨nį lɔɔ níí mu, gɛ́ gwɛli. Ŋą́ą́ gwɛli, kɛlaa və́ gaa li! 3 Kɛlaa, daa mąąkpɛɛ nuą di gáá, diɛ tinɛ̨n daa ɓa, gɛ́ diɛ: «Nui mąą mɛ̨nį lɔɔ níí mu, ka gaa?» 4 Ŋą́ lɛɛ kpɔlɔ tɛɛi diɛ, nui mąą mɛ̨nį lɔɔ níí mu, gɛ́ gaa; ŋą́ą́ mą wolo mą, ŋą́ą́ ɉon a ɲee. Vá kpɔ ɓo mą, yii kpɔ və́ ni lɔ li la néé yəi bɛlɛ́n, ɓɛi ŋɛ̨i di mą́ą́ kóó həɠə laai. 5 Ka ka gwɛla, Ɉerusalɛmə nɛ̨ɛ̨lɛa, ka ka kwɛla a palai-lomąɠaa, kpɔ a kpalan mɛlaɠaa laa, kaa ka hvo pai yíi tee wɛlikɛmąą ɲɛ̨i, ka hvo wɛlikɛmąą nwun; gwəinɛ̨ɛ̨ mɛ̨nį hvo pa tee mɛ̨i. Nwɛli nɛ̨ɛ̨nu 6 Gbɛɛ ɓə tii həɠəi nɔi pun ɉu pələi, ə ɓo yɛ nwɔ̨n nulu, yɛ hąmą da lansan di wəleen, ə ɓo yɛ mąątí wulɔ kun nɛ̨ɛ̨? 7 Salomɔn laa gbin ga. Mąątinɛ̨n ŋąą a kulaa pow mɛ̨ida, Israɛlə kɔkulaaɠaa li. 8 Gɔ́kulaaɠaa tii kəlee di wɔ ɓɔwaɠaai kaa di kpala ŋą. Gəlee wɛlɛɛ kɔ́ kɛi, ɓɔwa kaa di kəlee di yəi, diɛ pɛli kpəɲan ɉii la kpinį mɛ̨nį ɲɔ̨n gəlee tɔwɔ. 9 Salomɔn ə́ nwɔ gbin bɛli, a Liban wulu. 10 Ə gbəli gɔwɔ kɛ a wali, ə dunwɔ̨n ɉɛn gɛ a hɛni, ə ɉu pɛlɛ a nini kɔ́lɔ həɠə kpɔluɔ mu tɛɠiɛ. Ɉerusalɛmə nɛ̨ąą di ɉu pɛli kpɔ a wɛlikɛmąąlaa. 11 Ɉerusalɛmə nɛ̨ɛ̨lɛa, 'ka pa! 'Ka pa ka tɔɔmun Salomɔn kaa. Vúlulɔ ɓɔlɔi nee ə bɛli mą a nwɔ hvúlulɔ yələ laa, Ka gaa, a gwəinɛ̨ɛ̨ hvólói ŋɛ̨i. |