Wɛli 1 - Yálá laawoo hɛɓɛ (dc)1 Salomɔn nwɔ wɛli wələ nɛ̨ɛ̨mun. Nwɛli nɛ̨ɛ̨nu woo 2 Nɛ̨́nɛ̨́ɓo, Nɛ̨́nɛ̨́ɓo kani, ə́ nį́í lɔ ɉu! Ə́ wɔ wɛlikɛmąą aa ɉón ə tɛɛ lɔɔ ɓa. 3 Ə́ mąątí wulɔ a ə́ mąą kun nɛ̨ɛ̨! Guɔi! Yá nu lii hon. Ɉɛn kpɔ a gɛ, ə́ wɛli yɛ too la nɛ̨ɛ̨lɛa diɛ, yaa li. 4 'Ɲéé hon, gwəli! Gu gilɛ həɠə! Yɛ́ ɓə a nwɔ́ tɔɔmun; 'gwəli; ə́ yəi bɛlɛ́ lon mu. Yɛ́ lɔ ɓə a gu wɔ kwəinɛ̨ɛ̨, da gu wɔ ɲąŋą kulaa! Gu ə́ wɔ wɛlikɛmąąlaa mąą ɲąŋą kulɔ, ə tɛɛ lɔɔ ɓa. Tɛ̨ą kaa nɛ̨ɛ̨lɛa pɔ, di ə́ wɛli la kɛ. 5 Gáá kpɛli ŋɛ̨i a hvɛliɓamun, nɛ́lɛɛi, ə həli kaa Ɉerusalɛmə nɛ̨ɛ̨lɛa. Nɛ́lɛɛi yɛ nini kɔ́lɔ həɠə. Yɛ Salomɔn nwɔ gąną-həɠə. 6 Ka hvo gáá lɔ tii gɔ́lɔ ɓa pələ, Néé lonnii ka tii di liiholi bɔ́, di dɔ́ɔ́ nwɛ̨ni ɓa, hvoló ə pɔɔ lɛɛ mą́ą́ yili ɓə gɛ, və́ pɛli li gɔ́lɔ́ laahɔnmoi. 7 Nwɛ́likɛmąąmun! Mįnɛ̨ kpɔ ɓə yá kɛ lii laa a ə́ wɔ taatɛlɛɠaai! Hvóló a haŋą, mįnɛ̨ ɓə yá di pɛlɛ laa, diɛ di hvįitɔɔ? Gílaa pɔ̨nɔ̨! Ə gɛ, və́ pa kɛ lɔ lii nwun ma, gɛ́ lɛa li ə́ ɓɛlaa takpɛliɠaa di wɔ taatɛlɛɛɠaa pulu. Vaamu (Ɓɛlaa pulu nuą takpɛli) 8 Nɛ̨ɛ̨nu lɛlɛɛ, Akɛ hvó gbaɠala kɔ́lɔn, hvilɛn nɔ mɛlaaɠaa pɔɔ ɓa, ə́ lɛɠɛ ɓɛlaa mɛ̨i kaa nuą di wɔ kpuwuluɠaa diɛ, a ə́ wɔ ɓolu haa pɛlɛɛɠaa. Nwɛli hulɔnu 9 Nwɛ́likɛmąą nɛ̨ɛ̨nu guɔ ŋą́ ə́ kaa, yá kpɔn ɉu kulɔ, yɛ Eziptə tɔɔmun nwɔ wotolo yala hooi. 10 Ə́ kumɔ̨ lɛlɛɛi, nwəli kwɛliɠaa lɔwai, gbɛɛgɔw kwɛɛn ŋɛ̨i ə́ kɔ́nma aa ə́ kɔ́n mąą hon. Vaamu (Ɓɛlaa pulu nuą takpɛliɠaa) 11 Ku kaa wəlii kwɛli pɛlii yɛ́ a hɛni, ku wali kwɛli hɛlɛn mą. Nwɛli nɛ̨ɛ̨nu 12 Ɓɛlɔwai nwɔ́ tɔɔmun a kɛ la heeni nwɔ hɛli kɔ̨nɔ̨n ma, nwɔ́ mąąti wulɔi mąąkun nɛ̨ɛ̨ yɛ laa, 13 Nwɛ́likɛmąąmun kaa ɲə́i yɛ hąmą ɓíi mąąkun nɛ̨ɛ̨ naa ɲíni lɔwai yɛ vįitɔɔ. 14 Nwɛ́likɛmąąmun gaa yɛ hɛne powa Ein-Gɛdi viɲə yɛɛ. Nwɛli hulɔnu 15 Ə́ lɛlɛɛ ɓə tai, nwɛ́likɛmąą nɛ̨ɛ̨nu guɔ ə́ lɛlɛɛ ɓə. Ə́ ɲɛ̨i kwɛlɛ laai yɛ tɔ́nwɔ̨nɔ̨n gbɔlun. Nwɛli nɛ̨ɛ̨nu 16 Yɛ́ kpɛli nwɛ́likɛmąąmun, ə́ lɛlɛɛi tai, ə́ lɛlɛ kpɔ-kpɔɔ ɓoɔi gu kaa laani kala tiliin nɔ̨nwɔ̨-nɔ̨nwɔ̨ mɛ̨i. 17 Gu wɔ pɛ́lɛ́i gbaɉaɠa ɓaa a kpitili wulu Gbaan buɔ a hɛan. |