Chan eil an leabhar seo air a bhrosnachadh le Dia agus chan eil e na phàirt den canon Crìosdail no de Thanakh nan Iùdhach. Tha e air a shealltainn a-mhàin airson adhbharan eachdraidheil agus sgrùdaidh. Faic mìneachadh iomlan Tobi 2 - Yálá laawoo hɛɓɛ (dc)Tobi hukoon mɛ̨nį 1 Asaradɔn nwɔ tɔɔlaa yələ, ŋą́ pənə ŋį́ pa bɔ́ɔ́li, di pənə di nɛ̨́ą Ana da nón Tobiasə di tɛɛ bɔ́. A ku wɔ hɛli yələi, a Pantəkotə; ya ɓaa nɔwɔ mąąhəɠɛɛɠaa di wɔ hɛli, di kɔnɔ̨n nɛlɛɛ pɛli mą́ą́; ŋį́ hee gɔnɔn mįi mɛ̨nį ɓa, 2 di daɓali hvilɛn; di pa a kɔnɔ̨n nɛ̨ɛ̨ huwu tamąą; gɛ́ nón Tobiasə ɓa: «'Li tai nón, ə gu kaayɔwɔ, a Ninivə kɔ lúwɔ́ ta kwɛli, yii hɛn da hvə ɲəi, yɛ ni giliŋąhiɛ gwəi tɔnɔ̨ mɛ̨i Nąmu Yálá ɓa; ka yaa ka pa, gu gɔnɔn mįi; gáá ə́ mąąkpɔnɉi ə lɛɛ ɉu ə pənə ə́ pa, nón.» 3 Tobiasə ə li yeehowolomun da kwɛlii; a ku huwu ta, kɛlaa ə yali bulu, ə pa, yɛ mąą: «Ną́n!» Gɛ́ mą: «Lə ɓə kɛ nón?» Yɛ mą́ą́: «Ną́n, daa gu wɔ lɔi hu lon dɔnɔ̨ paa; daa bili gwəi hɛ̨ąi; gaa ni laa, baa yɛli kpulɔn ŋąą gwąną.» 4 Ŋą́ wɛan, nwɔ́ kɔnɔ̨n nɛ̨ɛ̨ tii, ŋį́ nɛɛ a ɲąą pɛliɛ, ŋą́ ɉulɔnui tii həɠə gwəli hɛąi, ŋį́ naa pɛ́lɛ́ ta mu, gɛ́ hvoló toɔ mąąkpɔn, noo mɛ̨nį ɓa. 5 Ŋą́ lɔ ŋį́ nwáá; ŋį́ kɔnɔ̨n mįi, níi ɲąą nwąnąą gwə́i; 6 gɛ́ gíli hvilɛn nwooɠaa Yálá nwɔ kɛla Amɔsə ə mo Betɛlə taa mɛ̨i mą: «Ka wɔ hɛliɠaa mąą aa pənə a haa wɔlɔ ɓoɔ. Ka wɔ wələɠaa, a ka woolaa woo.» Gɛ́ kɛa wɔlɔ. 7 Hvoló laa kɛa kpɔlɔ ɲą, ŋį́ li, ŋą́ kámą tee, ŋį́ noo. 8 Gwəlii nuą diɛ yɛlɛ, diɛ kɛ diɛ: «Hvo kɛa ɲɔwi. Daa ta hvilɛn bulu diɛ kɛ di baa, mɛ̨nį taaləi ŋɛ̨i mɛ̨nį ɓa; ə pu, ya ka nwɔ̨nɔ̨ aa gbala tɔɔ yɛ nu powaɠaa loo!» 9 Mąą kpinįi tii, kpɛɛi ŋą́ mo a nwaa, ŋį́ kulɔ ɲəi gumun ɉu, ŋą́ laa bɛ́lɛ́ nwąną kwɛlɛ, gbówoɲɛ̨i ɓa; həɠə hvo kɛ pɛ́lɛ́ni nwun mɛ̨i wəleen ma. 10 Gíli hvo kɛ ɉu gɛ́ kɛ nwɛ̨niɠaa di kɛ nwún mɛ̨i bɛ́lɛ nwąną mɛ̨i, dɔ̨nɔ̨ kpo ə hvilɛn ɲɛ̨́i a gələnŋąą, ə ten ɓɛla ɲɛ̨́i. Ŋą́ li halikɛnuą pɔɔli, kɛlaa di kɛli lɔ tumɔlaa kɛ mą, yaamun ɲɛ̨́i yɛ kpįnį mą́ą́ a dein tii, ə lɛɛ ɉu ɲɛ̨i ə pu kpɔ tɛ̨ɛ̨ tɛ̨ɛ̨. Ɲɛ̨́i ə lɛɛ tii a buɔ kwɛlan nąąn yeemu; ną́n nonnii kəlee liihɛlɛn ŋąąi kɛ a mą́ą́ mɛ̨nį; Ahikarə yaa kpɛlimąn ə mą́ą́ mɛ̨nį ɲɛ̨i kulɔ kwɛlan veelɛ yeemu, hvo teɠa kɛ li Elimaisə. 11 Nąąlɔwai nɛ̨́ą Ana ə lɔ həɠə-pala kólo hu. 12 Ə bala, ə li la nwun nąmįną pɔ, yiliɠaai diɛ vəla kulɔ. Vinɉilɛ nwɔ hvólo pow hveelɛ kɔw hveelɛ yələ, ə kpɛɛ a həɠə ta palaa, ə li la nąmįną pɔ, di vəla kulɔ ə pɛli ɉu; yili pulu, di ɓolu lon dɛɛ bɔ a mɛ̨inɛ̨ɛ̨. 13 Di həliɛ mą́ą́, molu lon ə wɔlɔ, ŋą́ nɛ̨́ą təli, gɛ́ mą: «Molu lon ŋɛ̨i ə həɠə mį? Akɛ nwuɔ̨ hɛn ni, 'dɛɛ nąmįną pɔ; gu mąą hvo nɛ̨ɛ̨li gu hvo nwuɔ̨ hɛn da lɔpee mįi.» 14 Yɛ mą́ą́: «Guɔ, mɛ̨inɛ̨ɛ̨ ka tii di gɛ mą́ą́, bɛlɛɛ və́la ɓa.» Kɛlaa, və́ kɛli laa na; gbɔ́n ŋąą lɔ mą, gɛ́ kɛ ə pənə ə dɛɛ nąmįną pɔ. Ŋį́ nííholi bɔ molu lon mɛ̨nį hu. Yaa kpɛli yɛ mą́ą́: «Nu kpɔɔlaaɠaai ə́ kɛli di kɛ di kaa mįnɛ̨? Ə́ wɔ tələnmo mɛ̨nįɠaai ə́ kɛli di kɛ di kaa mįnɛ̨? Mɛ̨nįɠaai laa yɛ́ gbaɠala kaa nu kəlee ɓa.» |