Tobi 1 - Yálá laawoo hɛɓɛ (dc)

Kɔ́ luwɔlaa

¹ Tobi nwɔ yɛnɛ̨ɛ̨ hukulɔ hɛɓɛ́ ka: Tobiɛlə lonnii yai a Ananiɛlə lon, Aduɛlə lon, Gabaɛlə lon, Rafaɛlə lon, Raguɛlə lon, Ariɛlə yei bɛ́lɛn mun da, Nɛftali huwu;

² Asiri tɔɔmun Salmanasarə nwɔ yələ, di li la a kɔluwɔ, yɛ kulɔ Tisbe daai, Kidiɔsə Nɛftali ɉɛɠɛɛ pələ, Galile ɲá nwuɔ̨ lɔi hu, Asɛrə nwun mɛbi, da wolo ə ɓo volo tooi bələ, Fogɔrə ɲá nwuɔ̨ pələ.

Tobi ə kɛ Yálá woo mu

³ Ɲą́ą́ Tobi, ŋą́ hvilɛn tɛ̨ą pələ mɛ̨i; ɲéé ə ɓo tələnmo yíi ɓa, nwɔ́ yɛnɛ̨ɛ̨ kəlee yee mu, ŋą́ą́ mɛ̨inɛ̨ɛ̨ tamąą kɛ ną́n nonnii diɛ, da ku wɔ lɔi hu nuą kwa diɛni ku li gɔ luwɔlaa hu Ninivə, Asiri lɔi hu.

⁴ Gɛ́ɛ́ ni ku wɔ lɔi hu, a Israɛlə lɔi, gáláɓɔlɔ Nɛftali huwu ə həɠə Davidə nwɔ pɛlɛ́i pɔ da Ɉerusalɛmə, ɓɛlɔwai ŋį́ kɛ la a muhəɠə nįnɛ̨. Ɛlɛɛ yan Ɉerusalɛmə ɓə di ɉəɠə Israɛlə nu huwu kəlee lɔwai, yɛ kɛ a ɉalaa kulɔ taa, ɓɛi ɉɛli pɛlɛ́i, a Yálá nwɔ pɛlɛ́i tɔɔ laa, diɛ lúwɔ́ too mą, nuą kpɔ kɛa kɛli pai nąą pulu di mąą mɛ̨nį ɓa.

⁵ Ną́n nonnii kəlee da galaɓɔlɔ Nɛftali nwɔ pɛlɛ́i nįŋɛ̨ lon tii Israɛlə tɔɔmun Ɉeroboamə ə bɛli Dan di kɛli gɔ, Galile yeeɠaa kəlee nwuɔ̨.

⁶ Kpɔ kɛlɛ kɛlɛ, ɲą́ą́ dɔnɔ̨ gbən lɔ ɓə kɛli li Ɉerusalɛmə; ɉɛliɠaa pui lɔwai, yɛ bələi mąą tɔn naa la Israɛlə lɔi nwuɔ̨, ɲɛn və laa li. Ŋį́ kɛli li a gilɛ Ɉerusalɛmə; a gɛ́ kóló má dolo toloɠaa, daatɛlɛɛɠaa lon dolo toloɠaa, daatɛlɛɛɠaa da mɛlaa haaɠaa ləɠa puɔ dolo tolo,

⁷ gɛ́ di tɛɛ ɉaláá laahəlinuą pɔ, Aarɔn lonnii, a ɉalaa kulɔi nwɔɔ. Mɔ̨nun, nɔɔ, nwulu ɓáɠaa, ŋį́ kɛli di ɓɛlaɓo ɉu pow, gɛ di heei tɛi tɛi həɠə, gɛ́ dɛɛ Levi lonnii tii ɉalaa laahəli kóló ɓa, Ɉerusalɛmə di pɔ. Yálá kɔ mɛ̨nį veelɛnan, ŋį́ kɛli yili kɛ a wali, gɛ́ li Ɉerusalɛmə, kwɛlan dɛi tɛi yeemu, gɛ́ mįi laa.

⁸ Ŋą́ kɛli ɉaaɓanan dɛɛ təlilɛa pɔ, da kalanəŋaa, da nwɛ̨ąą tii heeni Israɛlə lonnii kɔwɔ mɛ̨i; ŋį́ kɛli li a ɉɛŋąą tii gɛ́ dɛɛ di pɔ kwɛlan ɉaaɓa haaɓa yeemu. Ku kɛli di mįi yɛ bələi di ku tí la Moisə nwɔ tɔn ɉɛɓɛ́i hu da bələi, ku nąn Ananiɛlə nee Debora ə mo la kuɔ, mąąhɔlɔɓo ną́n ə haa; ŋį́ lɛɛ a ną́n nwɛli.

⁹ Kɛnɛ̨i ŋį́ mo, ŋį́ nɛ̨ą həɠə ku nąn ɲəi bɛlɛn; ŋą́ lon gaa ŋį́ naa hee a Tobiasə.

¹⁰ Lii di mo a kuɔ luwɔlaa hu Asiri lɔi hu, ɲąą gbįnįi lee ŋą́ kɛ a gɔ lúwɔ́ ta, ŋį́ li Ninivə ną́n nonnii kəlee da ku huwu kəlee di kɛli halipulu nuą di wɔ kɔ̨nɔ̨n mįi,

¹¹ Nwɛ́i və kɛli tí və́ halipulunuą di wɔ kɔnɔ̨n ta mįi.

¹² Nąmu Yálá kili ə kɛ ɲą́, naai hvə kɛ mą,

¹³ yili ɓə gɛ Hɛn Gəlee Mɛ̨i Mun ə nwɛli too laa Salmanasarə ɓa; ɉɛŋaa kpɔ mąąkpaan ə kɛ mą, ɲą́ą́ ɓə kɛli di yá.

¹⁴ Ŋą́ kɛli hiɛ kulɔ Medi lɔi hu, gɛ hɛŋąą yá ma, ə lɛɛ ɉu ə haa. Bələi, ŋį́ wali kwələ ɓɔlɔ haaɓa laa la gee mɛ̨i, Gabaɛlə pɔɔli, Gabri nan non da, Medi lɔi hu.

¹⁵ Haai Salmanasarə ə mo, dɔɔlaa ə lɛɛ non Senakeribə yei; Medi pələɠaa di kɛ kɛa kɔ ɲą, və́ kɛa pɛli pələ hɔlɔɓoi və li Medi.

¹⁶ Salmanasarə nwɔɔ yələ, ŋį́ kɛli hɛn mɛ̨inɛ̨ kɛ kɛnɛ̨ gaayɔwɔɠaa diɛ,

¹⁷ gɛ́ gɔ̨nɔ̨n dɛɛ nuąi pulu ə kɛ diɛ, di pɔ; gɛ́ həɠə tɛɛ nuąi tɛnɛ toɔ kɛ diɛ di pɔ. Ŋą́ ɉúwu powa ta kaa kɛ, daa bili Ninivə taa mąąkpɛ hįí pulu, ŋą́ kɛli noo.

¹⁸ Ɛlɛɛ, həɠəi Senakeribə ə mo Ɉude lɔi hu, yɛ pu, ɓɛlɔwai yələkɔlɔnɉu tɔɔmun ə ɉutɔɔ la, Yálá lalan wooɠaa kpɔ ə kɛli mo di mąą mɛ̨nį ɓa, nuąi ə di paa, ɲą́ą́ ɓə kɛli di loo, mąąhɔlɔɓo nííholi pələ, ə Israɛlə lonnii tamąą paa; ŋą́ kɛli di powa həɠə, gɛ di loo. Senakeribə ə kɛli di powa kwɛli, kɛlaa, hvo kɛli gaa!

¹⁹ Ninivə daai mun da, ə li ə mo tɔɔmun ma yɛ mą: Tobi ɓə a kɛ di looi; ŋą́ nóó. Gaai ŋį́ mo gɛ kɛ tɔɔmun kili aa pu gɛ́ mɛ̨nįɠaa tii hu, ɛlɛɛ, diɛ gwɛli baa mɛ̨nį ɓa, ŋą́ ɲɔw, ŋį́ pu.

²⁰ Di ɲəi hɛnŋąą kəlee həɠə; hɛn da lɔpee hvo lɛɛ ɲəi, di gəlee həɠə a tɔɔmun nwɔɔ; nɛ̨́ą Ana da non Tobiasə lɔ ɓə di di lɛɛ ɲəi.

²¹ Hvoló pow nąąn hvo kpɛli kulɔ ɉu, tɔɔmun lonnii hveelɛ diɛ di nąn baa; yili pulu, di pu Araratə yeeɠaa hu. Non Asaradɔn ə lɛɛ a bɔɔyɔwɔi dɔɔlaa hu. Ə gááyɔwɔ Anaɛlə lon Ahikarə hee ŋą lɔi hu hɛngɔwɠaa kəlee nwun na, yili ɓə ɉɛŋaa tii kəlee ɲąąwooɓo mɛ̨nį ə kɛ na.

²² Ahikarə ə mą́ą́ nɛ̨ɛ̨mąą hvə; ŋą́ pənə ŋą́ pa Ninivə. Ahikarə tii ɓə lɔ kɛ nɔɔ mɛ̨nįɠaa kəlee nwun na, giti mɛ̨nį kəlee da nɔi kolo mɛ̨nį nwun na, ə kɛ lɔ nwɔ̨nɔ̨ nwali mɛ̨nį nwun na Asiri tɔɔmun Senakeribə nwɔɔ tɔɔlaa yələ, ɛlɛɛ, Asaradɔn ə nɛɛ lɔ goloɠaa tii kəlee hu; ɛlɛɛ yan ə kɛ a mą́nįn, ɉuwu ta.