Tɛsalonikə veelɛ 2 - Yálá laawoo hɛɓɛ (dc)

Mɛ̨nįi pai kɛi gu Ną́mu pa yələ tɔwɔ

¹ Yii hvilɛn na gu Nąmu Jesus Kristə ŋą yələi ɓa, da gu ɲąąkpɔn mɛ̨nį gwɛlɛ, ną́n nonnii, yii ku kaa vɛlii káá ya ka:

² 'Ká hvo nɛɛ laa nu ta hvo ká ɓowo, hvo ká mąąɲɔw, yɛ ə kɛ, a Yálá kwəi mɛ̨nį hukulɔ woo ta, yɛ ə kɛ a, nu ta woo, awala kɛ tii, a hɛɓɛ́ ta, diɛ kɛ, ə həɠə ku pɔ, yɛ kɛ ə gɛ tii ká laa na, káá kɛ: Gu Ną́mu ŋą yələi aa həli.

³ Nu ta hvo kɛ gaa ká ɲąahɛn ɉii a pələi lɔpee gəlee; hvo kɛli ni nuą di lənə laa na pələ ɓa, ɛlɛɛ, hvo kɛli Yálá mɛ̨nį Mɛlɛtoomun, ə gbɛa gbɔwɔ lɛ, yai a nwun na pili-lon,

⁴ yai a tɔɔ, hɛn kpɔ da kɛ mą: yálá gəlee la, yɛ kɔ pɛlɛ kwɛli hvilɛn mɛ̨nį kəlee ɓa, yaa kpinįi, yɛ li kpɔ yɛ hee Yálá ŋą pɛlɛ́i mu, yɛ gbɔwɔ kɛ a Yálá.

⁵ Yili nąą kili hvo mɔ̨ɔ̨ ká ɲą, ɓɛlɔwai ŋą́ kɛli mąą mɛ̨nį ɓo la káá, a ɲələi ŋą́ kɛ la ká pɔɔlii?

⁶ Yiihu kɛa, hɛn ɲee kanąnŋąą mą, yɛ nwɔ lɔwai mąąkpɔn na, ká gɔlɔn.

⁷ Mąąhɔlɔɓo, mɛlɛtoomun tii, kaa kɛa gɛ-mɛ̨nį kɛi mįlimu, yaa lɔ ɓaa, nui ɲee kaa mą yiihu, a tɛ pulu,

⁸ nąąlɔwai ɓə mɛlɛtoomun tii a kulɔ la pono ŋą, ɛlɛɛ, gu Ną́mu Jesus ə nwun napili a naa-hvaŋą, ə ɉu kala, a nwɔ kɛɛ ponoi gaa pai la, ɉu.

⁹ Yii ɓaa mɛlɛtoomun ti pa mɛ̨nį, yai ɓilihi kɛ-mɛ̨nį pɔɔ kaa mąi, gaa pai gbɔwɔ lɛi a huwalawalalaa huwu ɲɛ̨i tamąą, a kwɛlɛɛn mɛ̨nįɠaa, da nuą kili ɲą pɛlɛ mɛ̨nįɠaa,

¹⁰ ɛlɛɛ, a ɲąąhɛn mɛ̨nįɠaa, yɛ nwun napili nuą ɓowo la, mąąhɔlɔɓo, wɛlikɛmąą tɛ̨ąi a pɛli di nwun mąąɓoi, di hvo di yee hee li mu.

¹¹ Yili ɓə a gɛ, Yálá ə lɛɛ-hvaŋą lɛɛ laa yɛ di ɓowo, di laa na.

¹² Əgɛ, nuąi di hvo gɛ di hvo laai tɛ̨ą la, kɛlaa diɛ di liiɓa kɛ mɛ̨nį ɲɔ̨n ɉu, di di kiti tee.

Tɔɔa nwąnąi laa laa na laa hu

¹³ Yii ɓaa ku wɛi, ku mąąnɛ̨ɛ̨i kuɔ Yálá hɛɠɛɛɓo a yələ kəlee ká mąą mɛ̨nį ɓa, ną́n nonnii, káái ká wɛlikaa gu Nąmu ɓa. Mąąhɔlɔɓo, Yálá ə gbɛa ká həɠə ɉu, a gɔwɔ tɔɔi lɔwai, ə gɛ, ká nwun mąą ə ɓo Kili-Mąąhəɠɛɛ háálai, yai a nu mąąhəɠə, laai ká mo tɛ̨ą la, ɉáálai.

¹⁴ Yili ɓə ə ká təli mą, nwɛlɛɛ lɛlɛɛ ŋɛ̨i ku naa həli káá, ɉaalai, káá pɛli ká wɔɔ nąą hɔlɔɓoi gu Ną́mu Jesus Kristə nwɔ mąąwiɛlaa hu.

¹⁵ Yili ɓa, ną́n nonnii, ɲíiɓo pələi tii ku ká mąąkwɛli mą, a ku woo da yii ku bɛ̨ɛ̨, 'ká ká yee kanąn mą kpąą.

¹⁶ Gu Ną́mu Jesus Kristə yaa kpinįlee da gu Ną́n Yálá, diɛi gu wɛlila kɛ, ɛlɛɛ, ə gu liilaa, a yii kpɛɛ hvo mą, da kilitɔɔmąą laa lɛlɛɛ,

¹⁷ Ə ká liilaa, ə ká hvaŋąlɔ ká kɛ mɛ̨nįɠaa kəlee hu, da mɛ̨nį lɛlɛɛɠaai ká mo, gəlee hu.