Tɛsalonikə veelɛ 1 - Yálá laawoo hɛɓɛ (dc)

Túwɔ́-woo

¹ Polə, Silvain, ɛlɛɛ, da Timote diɛ ɓə ɉɛɓɛ́i ŋɛ̨i tɛɛi Tesalonikə kalan gbɔn ma, diɛi gu Ną́n Yálá da gu Ną́mu Jesus Kristə hu.

² Nąn Yálá da gu Ną́mu Jesus Kristə di mɛ̨inɛ̨ɛ̨ da liilaa tɛɛ ka pɔ.

Laa na laa mɔ̨nɔ̨ hu

³ Ną́n nonnii, mąąnɛ̨ɛ̨ ku Yálá mąmąɓo a yələ kəlee ká mąą mɛ̨nį ɓa, ɛlɛɛ, yili kpɔ ɓə bɛliɛ ɉu, gbala ə tɔɔ, ká wɔɔ laa na laa kaa lɔ yɛ tɛ tɔwɔ, ɛlɛɛ, nwɛlikɛmąą laai ká yəi ka kee mąą mɛ̨nį ɓa, ɉu kaa lɔ mą yɛ kɛnɛ̨ ká kəlee ká yəi;

⁴ yili aa gɛ, káá ɓo a ku wɔɔ kpɔwɔ ɲąąkɛnɛ̨, Yálá ŋą kpɔnŋaai lɔwai, a ká wɔɔ tɔɔ a nwąnąi laa, ɛlɛɛ, ká wɔ laa na laa mɔ̨nɔ̨ɠaa da hukɔɔn mɛ̨nįɠaa hu, diɛi həlii káá.

⁵ Di kaa a Yálá ŋą kiti haŋąąi hu mɛ̨nįɠaa, ɉəli mɛ̨nį káá, nwu maa, di ká kɛ a nuąi di mąąnɛ̨ɛ̨ a Yálá ŋą tɔɔlaa hu nuą, yai ká káá mąą mɔ̨nɔ̨ mįi.

⁶ Gaa a tɛ̨ą, Yálá kaa pai mɔ̨nɔ̨ kwələ kulɔi a mɔ̨nɔ̨, ká mɔ̨nɔ̨ɓo nuą diɛ,

⁷ ɛlɛɛ, káái di heɛ ká mɛ̨i, gaa pai hvįitɔɔ tɛɛi gu pɔ, a ɲələi gu Nąmu Jesus kaa pai pai la, yɛ həɠə yələi pələ, da malakaɠaai ŋą huwalawalalaa hu,

⁸ nwɔ̨n nən gɛnɛ̨ɛ̨ hu, yɛ nwąną kulɔ la nuąi di hvo Yálá kɔlɔn, ɛlɛɛ, da nuąi di hvo lɛɛ li gu Nąmu Jesus ŋą wɛlɛɛ lɛlɛɛi woo mu, diɛ.

⁹ Di hutɔɔ mɛ̨nį kaa pai kɛi a gahoi kpɛɛ hvo mą, di mąąkwɛaa gu Nąmu ɓa, da ŋą mąąwiɛlaai,

¹⁰ a ɓɛlɔwai gaa pai pai la, mąą yələi tii, a mąąwiɛlaa hɔlɔɓo ŋą nu mąąhəɠɛɛɠaa yəi, ɛlɛɛ, ə kɛnɛ̨laa hɔlɔɓo nuąi laa na di yəi; ɛlɛɛ yaan, káán, ká wɛi, káá laa ku wɔ kɛla woo la.

¹¹ Mɛ̨nįi kwa kɛ Yálá hvɛlii la káá a yələ kəlee, yaa li, ə gɛ, kuɔ Yálá ə ká kaa a nuąi di mąą mɛ̨nį pɛliɛ, dəli ɓoi ə naa həli káá, ɉu; ɛlɛɛ, ŋą huwalawalalaa háálai, ká yee ə pɛli niiɓa mɛ̨nį lɛlɛɛɠaa kɛi, ɛlɛɛ, ká wɔɔ laa na laa bɔ túwɔ́ ə kɛ mą

¹² Bələ ɓə gu Ną́mu Jesus laa mąą a wiɛ la ká hu, ɛlɛɛ, káá kpɛlimąn, ká kɛ tii ɉu, yɛ bələi gu wɔɔ Yálá da gu Ną́mu Jesus Kristə nwɔ mɛ̨inɛ̨ɛ̨ kaa la.