Sofoni 3 - Yálá laawoo hɛɓɛ (dc)Ɉerusalɛmə hvo nwəli tɔɔ Yálá nwɔ təli woo ɓa 1 Kpalo ɓɛlaai gulɔ nwoo mu taa ŋɛ̨i ɓa, a yaa ŋɛ̨i gɔhɔɓoɔ, yɛ nwąnąlɔɔ kulɔ! 2 Hvo gɛli, hvo nwəli tɔɔ dəli woo ɓa, niɛwoo yii di gɛ mą, hvo ɉon ni, hvo gilitɔɔ li Yai-Laa ɓa, hvo gɛli hvo lɛɠɛ nwɔ Yálái ɓa. 3 Nu kpɛa-kpɛai di kaa daa kwəi, di kaa yɛ yalaɠaa, diɛ huluun. Nwɔ kiti tee nuą kaa yɛ hvitili ɓa kwɛ́liɠaa, di hva huwɔ kɔ́w tɔ̨nɔ̨n kpɛli lɛɛ, yii tinąą da di ɲįn vilɛn mą yələwala pɔ. 4 Nuąi laa, diɛ Yálá kwəi mɛ̨nį hukulɔ, di kaa a kpɔwɔ ɲąąkɛnɛ̨ nuą, di kwəi hvo kwələ li. Nwɔ haláá laa həli nuą, daa ɉɛn mąąhəɠɛɛ mɛlɛ kpɛɛ mą, daa dɔ́n mąą kala. 5 Bələi mąn gaa la tii, Yai-Laa kaa daa kwəi, dəlimoɔ, yələwala kəlee, a nwɔ kiti wooi ɓo, yələɓɔi lɔwai, hva ɉəɠə mą. Kɛlaa, nui hvo Yálá kɔ́lɔn, nwumɛ̨ hvo mą. 6 Ŋą́ą́ lɔi taɠaa mąą mɛ̨nį kpɛɛ yɛnɛ̨ɛ̨, di mąąkpɛ pɛlɛ́ɠaa daa pu, ŋą́ą́ bələɠaa mɛ̨i tɔɔ tón-tón, nu hvo mą hvo tɛɛ la. Ŋą́ą́ daaɠaa lɛɛ a taa kpoloon, nu hvo ɉu, nu hvo mą hvo hee laa. 7 Ŋą́ mo gbɔ́wɔ́ ɓa, gɛ́ kɛ diɛ: «Ɉerusalɛmə, ə́ wɛi, ə́ kaa kiɛ pai mą́ą́wiɛi, ə́ ə́ wəli tɔɔ ə́ hutɔɔ woo ɓa.» A gɛ tii, nwɔ pɛlɛ́i hvo pai pui. Kɛlaa, mɛ̨nį ɓo pələ diɛ tɛitɛi, diɛ mun, di wɔ mɛ̨nį ɲɔ̨n gɛ yee ta lɔ ɓə kɛi pɛlɛi mą. 8 Yili ɓa, ka mą́ą́ kpɔn! Ɲələi gáá pai múhəɠəi la, ŋą́ tɔɔ yɛ kɛla, gɛ́ ka hɔn doo, ka nąą mąą kpɔn! Gáá pai lɔiɠaa hukalai, gɛ́ tɔɔɓɛlaa di wɔ lɔiɠaa pu gee mɛ̨i, ŋą́ nwɔ́ liihvoli hee diɛ. Mąąhɔlɔɓo, gáá pai lɔi kəlee pilɛɛ gee mɛ̨i kələn ɉii, a nwɔ́ tolo nwɔ̨n. Yai-Laa wóó li! Nu huwu hɔn mąą pənə mɛ̨nį 9 Nąąlɔwai, gáá pai hį́i takpɛliɠaa laawulun mąą pənəi, a laawulun mąąhəɠɛɛ, ə gɛ, diɛ pɛli Yai-Laa təlii a naa, diɛ vɛli, diɛ tí mą a gee. 10 Nwɔ́ nuąi da kwɛli hvilɛn mą́ą́, diɛi tii ŋį́ di taɠa-taɠa, di kaa pai həɠəi Nubi yalee kpɛa-kpɛa bulu pələ, diɛ pa bɔ́ a gɔ́ hɛnŋąą. Israɛlə nu kpəlii 11 Mąą yələi tii, hvó pai nwumɛ̨i, ə́ kɛ mɛ̨nį ɲɔ̨nwɔ̨ɔ̨ɠaa mąą mɛ̨nį ɓa, yɛ́ kɔ́ pɛlɛ mą́ą́. Gbala ə tɔɔ, nąąlɔwai, gbɔwɔ ɲąą kɛnɛ̨ nuąi tii, da kɛ di nwun dɛi, ŋą́ kɛ kɛa, a di hukalaa ə́ lɔwai, ɛlɛɛ, hvá kɛa humɛ̨ni kɛnɛ̨ kulɔ nwɔ́ yee mąąhəɠɛɛ nwuɔ̨. 12 Gáá pai ɲéé kanąn ɉii nu huwu logolo tiikpə ɓa, ə́ wɔ lɔi hu. A nuąi di kaa a yeehvowolo nuą, di ɓɛlɛɛ, Yai-Laa laa hu ɓə di kaa pai kɛi di mąą kilɛi laa. 13 Israɛlə nu kpəlii a lɛɛ, di hva kɛa tuwɔ pələ ɲɔ̨n gulɔ. Di hvo kɛa pai kɛi lɛɛ hvaaɓoi, nu ɓowo woo hva kɛa kulɔ di la, Kɛlaa, di kaa pai kɛi di laa mį́į́, diɛ di hvįįtɔɔ; ɛlɛɛ, nu ta hva kɛa di mąą ɲɔw. Ɉerusalɛmə tɔɔ mɛ̨nį a nįnɛ̨ 14 Siɔn hɛlakpɛla, 'tómą a kwəinɛ̨ɛ̨! Israɛlə, 'huluun a kwəinɛ̨ɛ̨, Ɉerusalɛmə nɛ̨ɛ̨gbɛla, 'kwəinɛ̨ɛ̨ kulɔ a ə́ lii kəlee. 15 Giti ŋɛ̨i too ə́ mɛ̨i, yɛ wiɛ yɛ́, Yai-Laa aa ɉəɠə ə́ mɛ̨i. Aa ə́ yowo ɲɛ̨i haŋą pələ takpɛli. Israɛlə nwɔ tɔɔmun Yai-Laa yaa kpinįi, gaa ə́ pɔ; hvó kɛa pai kɛi ɲɔwi mɛ̨nį ɲɔ̨n da həli mɛ̨nį ɓa yɛ́. 16 Mąą yələi tii, di kaa pai kɛi Ɉerusalɛmə ɓa: 'Hvó ɲɔw, Siɔn! Ə́ yeekɔ̨nwɔ̨n ɉu hvo haa. 17 Siɔn, Yai-Laa ə́ wɔ Yálái kaa ə́ pɔ, gaa a kɔkulaa kɛnɛ̨i kɔ́ a nɛ̨ɛ̨ mą. Gwəinɛ̨ɛ̨i ə́ mąą mɛ̨nį ɓa, gaa ə́ pui ə́ nįnɛ̨ kɔ́lɔi nwɔ wɛlikɛmąąlaa hu. Gaa ə́ mąą mąną kaai, yɛ pili yələi a kwəinɛ̨ɛ̨, yɛ tómą. 18 Nuąi di hvo kɛ hɛli kɔ́lɔn, di mąą kwɛa yɛ́, ŋį́ di ɲąąkpɔn, nwumɛ̨ ka tii kɛ, ɉeɛ Ɉerusalɛmə ɲɛ̨i. 19 Mąą yələi tii, nuąi kpɔ kɛi ə́ mɔ̨nɔ̨ɓo, ŋą ɲéé pɛlɛ diɛ. Ŋį́ mɛlaa kɔ́wɔ nwąnąąɠaa ɓalo; yiiɠaai daa pili, ŋį́ di ɲąą kpɔn. Ka ɲɛ̨i a pɔ̨nɔ̨, ka laa lɛlɛɛ ə tɛ nɔiɠaa ti ka nwumɛ̨ ɉu di ɲɛ̨i ɓa. 20 Mąą yələi tii, ŋą́ hvilɛn ka ɲɛ̨i tɔwɔ, ŋį́ pa a kaa, ɲələi tii, ŋą́ ka ɲąą kpɔn, ka ɲɛ̨i ə pɔ̨nɔ̨, ɓɛlɛ ə kɛ kaa lɔi mɛ̨i, nu kanŋaa kəlee lɔwai, ɓɛlɔwai gáá pai ka wɔ yɛnɛ̨ɛ̨ ɲɛ̨ilaa lɛlɛɛ heei la mą, kaa gaa. Ɲą́ą́ Yai-Laa, ɲą́ą́ kpɔ ɓə mo! |