Sofoni 2 - Yálá laawoo hɛɓɛ (dc)

Ka ka pulu tɔɔ mɛ̨nį ɲɔ̨n mą

¹ 'Ka ka nwun dɔɔ, ka ka kpɔwɔ mąąninkɛ! Ee kə, kaa ŋɛ̨i nwumɛ̨ hvo kaai.

² Gɛɛ mɛ̨nįi tii hvo pa kulɔ, di ka hutaɠa yɛ dɛ̨ɛ̨ kpalaan, a vóló tɔ̨nɔ̨i tii, gɛɛ Yai-Laa nwɔ liiɲąnwąną hvo yɛɛ a ka nwun, gɛɛ niiɲąnwąną hvólói tii hvo ɓɛla ka mɛ̨i, 'Ka ka nwun dɔɔ, ka ka kɔ́wɔ mąąnikɛ!

³ Kaai kpɔwɔmąą yɛɛ laa kaa ka yəi nɔi, kaa Yai-Laa woo hon, 'ka Yai-Laa ɲɛ̨ilaa kwɛli, gbəli hu kiɛ, gaa pai ka ɲɛ̨imąąwɛli kaai, a Yai-Laa nwɔ liiɲąnwąną hvólói.

Haŋąmąą woo

⁴ Gaza kaa pai lɛɛi a lɔi pun, Askelɔn hu kaa pai kalai, Asdɔdə nuą kaa həɠəi di heei a hvóló ŋą ɉə-ɉə, ɛlɛɛ, diɛ pa Ɛkrɔn nuą pɔ taai.

⁵ Kpalo aa ɓɛla gboloyá kwɛlɛ heeɓo nuą diɛ, diɛi ɓaa Krɛtə lɔi hu nuą, kaa ɓə Yai-Laa kaa haŋąi kaa. Filisti nuą pɔ lɔi Kanaan, gáá ə́ lɛɛi a lɔi pun, nuą di hvo pai heei ə́ hu.

⁶ Gboloyá kwɛlɛ lɔi kaa lɛɛ a taatɛlɛɛɠaa laa mį́i, a ɓɛi taatɛlɛɛ mɛ̨i kaa nuą da kɛ hiɛ-hiɛ kɛi laa, diɛ taatɛlɛɛ gala tɔɔ laa.

⁷ Nuąi pai lɛɛi Ɉuda nwɔ pɛlɛ́i mu, nɔi tii kaa lɛɛi a di wɔɔ, nąą ɓə di kaa pai kɛi lii laa a di wɔɔ taatɛlɛɛɠaai, diɛ di laa mį́i. Yələwulii pɔ, Askelɔn nwɔ pɛlɛ́ɠaai ɓə da di hvįįtɔɔ mu. Hvó gaai, Yai-Laa Ɉuda nwɔ Yálái, gaa pai ɲee pɛlɛi nɔi tii ɓa, di mąą mɛ̨nį ɓa, Ɉuda lɔi hu nuąi luwɔ pələi, ə pa a diɛ.

⁸ Yai-Laa yɛ diɛ: Nalan Moabə ə bili, aa too nwə́lii. Ɛlɛɛ, nwoo ɲɔ̨n Amɔn lonnii di ɉaa nwɔ nu huwui ɓa, a nalan di bili aa nwąną mąą; a lɔi di mo Israɛlə nwɔ lɔi hu.

⁹ Yili ɓə gaa mą, Ɲą́ą́ Yai-Laa Mɛ̨nį Kəlee ŋą Hééɓomun, Israɛlə nwɔ Yálá, nwóó li, yii kpɔ gáá a vúlú, Moabə lɔi kaa kɛi yɛ bələi Sodomə ə kɛ la, ɛlɛɛ, Amɔn lonnii di kɛ yɛ bələi Gomorə ə kɛ la. Nąą ə kɛ a ɲąąlən gbɔlɔ, da kpolo kulɔi, a lɔi pun a yələ kəlee mɛ̨nį. Nwɔ́ nu huwui kpəlii a lɛɛ, a di mąąkpoloon. Nwɔ́ nuąi kulɔ gɔ hu da kwɛlin ɲąąkwɛlɛ.

¹⁰ Mɛ̨nįi di kaa pai ɉɔlɔɓoi, a di wɔ humɛ̨ni kɛnɛ̨ hvɛla, yaa li. Hvó gaai, di Yai-Laa, Mɛ̨nį Kəlee ŋą Hééɓomun nwɔ nu huwui lalan, ɛlɛɛ, diɛ kɛnɛ̨ ɉu.

¹¹ Yai-Laa kaa pai gbɔwɔ lɛi diɛ a vaŋą, ə yɛnɛ̨ɛ̨ haliɠaa kəlee nwun ɲɛɛ. Yɛnɛ̨ɛ̨ lɔiɠaa kəlee, ə mą kɛ, yiiɠaai di kaa kwɛaala, di kaa pai kwɛli hvilɛn ɉii mą, ɓɛɠaai di kaa laa.

Ɉɛɠɛɛ pələ da ɲanwuɔ̨ pələ lɔiɠaa di wɔ haŋą mąą ka

¹² Kaa kpɛli, kaa ɓaa Nubi nuą, nwɔ́ ɓɔwai kaa pai ɓɔi ka hu,

¹³ gaa pai ɲéé haŋąi ɲanwuɔ̨ pələ, ə Asiri nwun napili, ə Ninivə kɛ a taa kpoloon.

¹⁴ Daa kpoloon tii hɛ̨ąi ɓə taatɛlɛɛɠaa kaa pai kɛi di hviitɔɔi laa, da lɔwɔ huwɔ huwui lɔpee, ə mą kɛ, kpəlakpəla, tə́li, di kaa pai kɛi yíi dɔɔ-pɛlɛ́ kpoloonŋaai tii mu, di huluun nwoo kaa pai kɛi tɔɔi bɛlɛ kpoloonŋaa nwolo ɓa, ə həɠə ɉį́i la, pɛlɛ kpoloon nɔ ɓə nu ya gaa, kpitili wului di bɛlɛ kpɛ̨ą la, ya gaa, mąą pɔ̨nɔ̨ɔ̨.

¹⁵ Daa humɛ̨ni kɛnɛ̨i ŋɛ̨i, yaai kɛ heeni tɔɔkpəlin ɉu, nwəli pulu laɠiɛ, yɛ kɛ gbɔwɔ ɓa: «Ɲą́ą́ lɔ ɓə gáá ɓɛ, da kpɛli hvó nąą pulu» bələi gɛ pələ kaa pai kɛi la, bələ ka tii. Lɛɛ ɓə tii aa mo a taa kpoloon, a lɔwɔ huwɔɠaa yíi? Nui lɔpee aa kɛi tɛɛ gwɛlɛ, yɛ kwəlee hvɛɛ, yɛ ɲee pɛlɛ na.