Sofoni 1 - Yálá laawoo hɛɓɛ (dc)

¹ Nwooi Yai-Laa ə mo Sofoni ɓa, yaai a Kusi lon, Gedalia lon, Amaria lon, Ezekiasə lon, Ɉuda tɔɔmun Amɔn lon Ɉosiasə nwɔ yələi, ya ka:

Yálá nwɔ kitii

² Yai-Laa woo ka, yɛ diɛ: «Gáá pai nɔ̨ɔ̨-nɔ̨ɔ̨ hɛn gəlee nwun napilii lɔi mɛ̨i.

³ Nu kanŋaa da huwɔɠaa, yələi nwɛ̨niɠaa da gboloyá hu hɔwɔleeɠaa, gáá pai nwąnąlɔɔ nuą nwun napilii, da di yee pɔɔɠaai kpɔ da nuą həɠə pələ ɓa. Gáá nu kanŋaa kpɛɛi lɔi mɛ̨i. Yai-Laa woo li!»

Yálá kaa pai Ɉuda da Ɉerusalɛmə di kiti teei

⁴ Gáá pai ɲéé pɛlɛi Ɉuda nuą, da Ɉerusalɛmə nuą diɛ. Hɛn kpɔ gaa gɛɛnąą tii a Baalə nwɔɔ, ŋą́ gəlee hukala, ə mą kɛ, a nuąi kɛi tí mą, da di wɔɔ haláá laa həli nuą, ŋą́ gəlee laa kpɛɛ.

⁵ Nuąi da tɛ gbɛan ŋą, diɛ kwɛli hvilɛn yələ kwəi hɛnŋąą diɛ, nuąi da kwɛli hvilɛn Yai-Laa ɓa, diɛ di kwɛla a di wɔ hali Melɛkə laa, gáá gəlee nwun napilii.

⁶ Nuąi daa di pulu tɔɔ Yai-Laa ɓa, di hva gɛ di hvo ɲɛ̨ilaa kwɛli mɛ̨nį ta hu, di hva mąąnikɛ, Gáá gəlee nwun napilii.

⁷ 'Ka ka laa pilɛ Ną́mu Yai-Laa lííla! Hvó gaai, Yai-Laa nwɔ hvólói mąą aa kpuwɔ. Yai-Laa aa nwɔ haláá hɛn bɛli, nuąi aa di təli, aa di mąąhəɠə.

⁸ Yaan, ɉaláá kulɔ yələ, gáá pai ɲéé pɛlɛi nɔi nwun nąmįną diɛ, da dɔɔɓɛlaa lonnii, da nuąi nwɛ̨ą mąą yili wɛli kaa diɛ.

⁹ Ɲələi tii, nuąi da tɛɛ bɛlɛ́ laaləi, nuąi da di nąmu nwɔ pɛlɛ́i laa hvɛɛ a nwąnąlɔɔ mɛ̨nį, da nwuɔ̨ mɛ̨nį, ŋą ɲéé pɛlɛ gəlee diɛ.

¹⁰ Yai-Laa woo ka, yɛ diɛ: Mąą yələi tii, wɔlɔ woo kɛnɛ̨ a tɔɔ ɉɔwɔlee pɛlɛ laaləi pələ, woo laa woo yɛ tɔɔ daa nįnɛ̨ hu, tín gɛnɛ̨ yɛ tɔɔ ɲeeɠaa nwuɔ̨.

¹¹ Kaai heeni ɲee lɔwai, ka tómą a wɔlɔ. Hvó gaai, ɲɔw kɛ lɔi hu nuą kəlee daa lɔ gbąi, nuąi kɛi wali kwɛli kɔ́ɔn, di huwu aa pu.

¹² Ɲələi tii, ŋą́ kpalan dɔɔ, gɛ́ Ɉerusalɛmə taa hu pili la. Nuąi di wɔ yɛnɛ̨ɛ̨ nii həɛ, di laa gbin ŋą, diɛ mo di kwəi diɛ kɛ: «Yai-Laa hvo mɛ̨nį ta kɛi.» Ŋą́ ɲéé pɛlɛ diɛ.

¹³ Nuą da too di wɔɔ hɛngɔwɠaai hu, di di wɔɔ pɛlɛ́ɠaai wolo. Di kaa pai pɛlɛ́ɠaa tɔɔi, Kɛlaa, di hva lɔ mu. Da viɲə yɛa laa, Kɛlaa, di hva da ya kpələ.

Yai-Laa nwɔ hvólói

¹⁴ Yai-Laa nwɔ hvóló kɛnɛ̨i mąą aa kpuwɔ, mąą aa kpuwɔ-o, gaa pai kpɔ a gɔwɔ mąąhulaa. Yai-Laa nwɔ hvólói, ɉələ kaa mɛ̨i, kɔkulaa yɛ tómą a wɔlɔ, yɛ mąąkilɛi kwɛli.

¹⁵ Volói tii kaa a liihvoli hvóló, a liiɲąnwąną hvóló, gaa a kɛɛ kala hvóló, a lii too pulu hvóló, gaa a tɛɛhilɛ kpinį, ɉu tɛɠiɛɛ, a hvólói tulɔ aa ɉu kpinį, luwuluwu aa hiɛ ɲələ ɲɛ̨i.

¹⁶ Gaa a hvólói túlu woo a tɔɔ ɉu, da kɔ́ mɛ̨i tómą woo, daaɠaai hįį kaa diɛ di mɛ̨i, da ɉįi mɛ̨i pɛlɛ́ɠaa.

¹⁷ Gáá mɛ̨nį ɲąąnwąnąą laai nu kanŋaa diɛ, diɛ hiɛ yɛ ɲɛ̨ipu nuą. Mąąhɔlɔɓo, daa nɛ̨ŋɛ̨n ɉəɠə Yai-Laa ɓa. Di ɲąmą kpoloon gaa pai laai yɛ, tulɔya kpoloon, di powa puɔ gee mɛ̨i, yɛ luwun yɛ túlún.

¹⁸ Di wɔ waliɠaa, da di wɔ hɛniɠaai, di hvo pai di nwun mąąɓoi, Yai-Laa nwɔ liiɲąnwąną hvólói yəi, a nwɔ tolo nwɔ̨n ɉee hvóló, Gaa pai lɔi nąą kəlee kələn ɉii, hvó gaai, gaa pai lɔi mɛ̨i hɛnŋąą kəlee nwun napilii, vólói tii, gaa a hvóló mąąɲɔwuɔ.