Bìoball air-loidhne

Chan eil an leabhar seo air a bhrosnachadh le Dia agus chan eil e na phàirt den canon Crìosdail no de Thanakh nan Iùdhach. Tha e air a shealltainn a-mhàin airson adhbharan eachdraidheil agus sgrùdaidh. Faic mìneachadh iomlan

Sirasidə 51 - Yálá laawoo hɛɓɛ (dc)

Nwoo laa kulo ɲeelaa mɛ̨i Ɉesu Sirakə lon ŋą́ hvɛli woo

¹ Ną́mu, yɛ́i a tɔɔmun, gáá ə́ hɛɠɛɛɓoi, gɛ́ ə́ mąątɛ̨nɛ̨, yɛ́i a málo Yálá, gáá ə́ laa hɛɠɛɛɓoi.

² Mąąhɔlɔɓo, yɛ́ ɓə mą́ą́kɔ̨nwɔ̨, yɛ́ ɓə mą́ą́kpɔnmąąɓo, yɛ́ gɔ́lɔ́ kulɔ nwun na pili pələ mɛ̨i da laa kala-nɛ̨n nwɔ ɓaaləi ɲą, da laawulun a kɛ lɛɛ pɛlii. Nuąi kɛi pɛlɛ mą́ą́ a kɔ́,

³ ə́ mą́ą́kɔ̨nwɔ̨ di yəi, ə́ vóloon na ɓo, mąąhɔlɔɓo, yá nu ɲɛ̨imąąwɛli kaa kɛnɛ̨, yɛ bələi lɔ ə́ laa kɛnɛ̨i la; ə́ gúlɔ nuąi kɛi kɛ di ɲįn di yəi, di huyilɛɛ kɛa kɛ ɉú hɛɠɛ mɛ̨nį ɓa da nuąi kɛ di hvilɛnŋąą nwɔ yíi yɛnɛ̨ɛ̨ pulu, di yəi, ə́ gúlɔ mɔ̨nɔ̨ huwu tamąąi laa mą́ą́ di hu;

⁴ Ə́ gúlɔ kpaɠa nwɔ̨n ɲəi, aa mą́ą́tínɛ̨n gɛ aa doo gii hu, yɛ vínnatɔn a nwɔ̨n və́ kɛ dɔɔ li,

⁵ da haa nuą pɔ taai ɓoloon ɉu kwɛaa yəi, da nɛ̨n mąąluɓiɛ da lɛɛ woo di yəi,

⁶ da hvulu-nɛn nwɔ mɛ̨ɛ̨kɔwɠaa yəi. Nį́i lɛɠɛɛ kɛa kɛ haa ɓa, nwɔ́ yíiyɛnɛ̨ɛ̨ yɛ tunwɔ̨n haa nuą pɔ taai ɓa, lɔi mu pələ.

⁷ Mą́ą́tínɛ̨n ŋąąi kɛ bələ kəlee doɔɔ gee hu, ɛlɛɛ, nu hvo kɛ laa yɛ mą́ą́kpɔnmąąɓo, gílitɔɔi kɛ nu kan wɔ kpɔnmąą ɓa, Kɛlaa da hvo hɔlɔɓo.

⁸ Nąąlɔwai ɓə ŋį́ gíli hvilɛn na yɛ́ wɛlikɛmąąlaai ɓa, Nąmu, ɛlɛɛ, bələi yá mɛ̨inɛ̨ɛ̨ kɛ la, ə həɠə wɔlɔ-wɔlɔ ɓa, da bələi nuą di ɲɛ̨i kaa la ə́ tɔwɔ a hvaŋąlɔ yá di hvoloon-naɓo, yɛ́ di kulɔ nu ɲɔ̨nwɔ̨ɔ̨ɠaa yee ɲą.

⁹ Ŋą́ nwɔ́ hvɛli woo ɓo Yálá pɔ pələ, gɛ́ mąąnɛ̨ɛ̨, gɛ́ ə mąąkɔ̨nwɔ̨ haa tɔwɔ.

¹⁰ Ŋą́ Ną́mu hvɛli, nwɔ́ mɛ̨nį nąmu nąn, gɛ́ kɛ hvo ɲee kulɔ mú a mąąwɛli yələɠaa a kpɔwɔ ɲąąkɛnɛ̨ nuą di wɔ yələɠaa, a ɲələɠaa ti nu hvo la mą́ą́.

¹¹ Ŋą́ ə́ laa mąątɛ̨nɛ̨ a yələ kəlee, gɛ́ ə́ hɛɠɛɛɓo wələ too, ɛlɛɛ, nwɔ́ hvɛli woo mu ə hon,

¹² hvo gaai yáá málo nwun na pili mɛ̨nį yəi ɛlɛɛ, yáá gúlɔ mąąwɛli mɛ̨nįi ŋɛ̨i hu, yili mą mɛ̨nį ɓa gáá bɔ ŋą́ ə́ hɛɠɛɛɓo, gɛ́ ə́ tɛ̨nɛ̨, gɛ́ lúwɔ́ kɛ gu Nąmu laa ɓa.

Ka gu kilikɛɲəi kwɛli a hvaŋąlɔ

¹³ Ɓɛlɔwai ŋį́ kɛ la ni a hulɔnon, və́ ni kɛ nwɔ hiɛɠaa kpala tɔɔ li, ŋą́ kilikɛɲəi kwɛli a ɉu haŋąnŋąą nwɔ́ hvɛli woo hu;

¹⁴ Ŋį́ ɉu hvɛli ɉɛli pɛlɛ́ laaləi, ɛlɛɛ, ə lɛɛ ɉu ŋą́ haa, vá kpɛla vɛliɛ ɓa.

¹⁵ Ə kwəinɛ̨ɛ̨ tɛ ɉú lɔ yɛ ɓá wului a ɓá, ɓɛlɔwai ti a powa la. Gɔ́wɔ́ ə kɛi hiɛ pələ haŋąnŋąą hu, ə həɠə nókólo yələ ɓa, vílɛnŋąąi bɔɔ ɲą.

¹⁶ Yaa lɔ ɓaa ŋą́ nwə́li tɔɔ kolo ɓo tiikpə, ŋą́ą́ mąn ɉɔlɔɓo, ɛlɛɛ, ŋą́ mɛ̨nį tamąą kɔlɔn.

¹⁷ Ɉaalai ɓə ŋą́ tɛ la tɔwɔ, nui gɔ́ a kilikɛɲəi, gáá mąąwiɛi.

¹⁸ Gbala ə tɔɔ, ŋą́ naa gwə́i, gɛ́ ŋą́ bɔ mɛ̨nį kɛ. Níí muhəɠɛɛi kɛ kɛnɛ̨ mɛ̨nį lɛlɛɛ pulu vá gíli mąąhvalin yili hu kpɔ hvąą-hvąą;

¹⁹ Ŋą́ kilikɛɲəi mąą kɔ-kɔ kpɔ a nwą́nąi, ɛlɛɛ, dɔn nwoo pɔ yíi ɓo mɛ̨nį hu, ŋą́ hiɛ ɉu yɛlɛ-tɛtɛ, ŋą́ ɲéé haŋąn yələi pələ, ɛlɛɛ, ɉɔ́nŋaai ŋą́ gɛ a yáá, gɛ́ yili mąą wɔlɔ ɓo.

²⁰ Ŋą́ nį́i tənən dɔɔ bɔ pələ, ɛlɛɛ, ŋą́ ɉɔlɔɓo mąąhəɠəlaa hu. Ə həɠə gbala tɔɔ yələ ɓa, ŋą́ váŋąlɔ ɉɔlɔɓo mɛ̨nį ɓa, yili mąą mɛ̨nį ɓa, di hvo pai gúlɔ́i pulu a yələ lɔpee ta.

²¹ Nį́i ə kɛi ɓɛla mą́ą́ gwɛli mɛ̨nį ɓa; hɛn nɛlɛɛ ka ti ŋą́ ɉɔlɔɓo.

²² Gu Nąmu Yálá ə nɛ̨n dɛɠɛ bɔ́ a və́la, ɛlɛɛ, gáá bɔ ŋį́ mąąwiɛ la.

²³ 'Ka pa bɔ́, kaai ka hvo ni mɛ̨nį mąąkwɛli li, 'ka lɔ nwɔ́ mąąkwɛli kɛ kələi mu.

²⁴ Ká lɛɛ a mąą pulu a ɉu kwɛaa lə mɛ̨nį ɓa? Ya pa ka nįiɠaa hu kpalai a kpələ wɛli.

²⁵ Gáá náá tɛi pələ mu; gɛ́ mo a lolo, 'ka ɉon a ká wɔɔ, wali mɛ̨nį hvo ɉu,

²⁶ 'Ka ká nwun ɉee nwɔ ɲąąwooɓolaa mu, ɛlɛɛ, ka kili hɔlɔɓo, nɛɠɛɛi kpɔlɔɔ káá hvɔɔ-lɛɛ kaa pɛli ɉɔlɔɓo.

²⁷ Káá kpįnii lee 'ka nąą kaa və́ mɔ̨nɔ̨ mįi li a dənən, Kɛlaa ŋą́ą́ hvįįtɔɔ kɛnɛ̨ hɔlɔɓo.

²⁸ Ká kili hɔlɔɓo a ɲái ká mo a wali kɛnɛ̨, mɛ̨nį kɔlɔn ŋąą a pa ká pɔ a hɛni kɛnɛ̨;

²⁹ Ká nįį a kɛ kwəinɛ̨ɛ̨ hu, gu Nąmu nwɔ wɛlikɛmąąlaa mąą mɛ̨nį ɓa, ká hvo nwumɛ̨ mąątɛ̨nɛ̨i.

³⁰ Ka ká wɔɔ mąątíi kɛ guu tɔwɔ, ɛlɛɛ, gaa pai ka hvɛla tɛɛi ká pɔ a guu yələ.

« Roimhe

Air adhart »

Bible Society in Guinea-Conakry

Lean sinn:

Ceanglaichean taic

Sanasan