Sirasidə 50 - Yálá laawoo hɛɓɛ (dc)

Ɉaláá laa həli mun gɛnɛ̨ Simɔn

¹ Simɔn, ɉaláá laa həli mun gɛnɛ̨, Oniasə lon, ŋą yɛnɛ̨ɛ̨ yee mu, ə bɛlɛ́ pu nįnɛ̨ kɔlɔi ŋą yɛnɛ̨ɛ̨ yee mu, ə Yálá kɔ́i tɔɔ a nwala-walaa.

² Gumun ti kɛi ɉɛli pɛlɛ́ mąątínɛ̨n, yɛ doo gee hu, ə vilɛn a ɉuwiaa, ə dɔɔ mɛ̨i ta pɛlɛ mą.

³ A nwɔ yələɠaa di ya pu lɔwaɠaa təɠə nɔwa kɛnɛ̨ yɛ gboloyá.

⁴ Nwɔ nuą mąąkɔ̨nwɔ̨ liihɛlɛn ə kɛ mą, kɛɛ kalaa tɔwɔ, ya ɓə gɛ yɛ daa mąąkpɛ hįi tɔɔ kɔ́ tɔwɔ.

⁵ Mąąɲįnɛ̨n gɛnɛ̨i kɛ ee! Ɓɛlɔwai ə kɛi Yálá kɔ́i mąątínɛ̨n na, ɓɛlɔwai ə kɛi kulɔ la gɛɛnaa mąąhəɠɛɛ nwɔ kɛɛnaa mąąhəɠɛɛ kəlee ɓa!

⁶ Gulaai kɛ yələɓɔi pɛmɛ̨nɛ̨gɔw ɓa tulɔ kpįnin ɉu, yɛ ɲąnin naa a hvɛɛ kɛlɛ-kɛlɛ,

⁷ yɛ hvóló a ɓɛla Hɛn Gəlee Mɛ̨i Mun nwɔ pɛlɛ́i mɛ̨i, gbəimįnįin a kɛi lən tulɔ kpįninŋaa mąąwiaaɠaa mɛ̨i,

⁸ yɛ wulu powai naa a ɓo kpɔlɔɔ ti a nįnɛ̨, yɛ yágbudɛn yánwun gulɔiɠaa kwɛlɛ, yɛ Liban wɛla hu wuluɠaa,

⁹ yɛ lensens a kɛi kələn gbowo lon ɉu, yɛ hɛni hɛnɲąŋą a hɛni tee-tee lɔ mąą puaa a kúwɔ́-kwɛni lɛlɛɛɠaa,

¹⁰ yɛ tow, nwun a kɛli hee a nįnɛ̨, yɛ kpitilii nwun a həli tulɔ kpįnin ma;

¹¹ A ɉəɠə ɲɛ̨i tɔɔ too kɛa kɛ gwąną, yɛ mąąyili hɛnŋąą kəlee kɛ mą, a kɛli kɛa tɛ ɉaláá kulɔi mąąhəɠɛɛ ɓa, ə kɛi ɉɛli pɛlɛ́ laa hvɛɛ a mąąɲįnɛ̨n;

¹² Ɓɛlɔwai ə kɛi ɉaláá hɛnŋąą hon na ɉaláá laa həli nuą yee ɲą, ə ɓo tɔɔni ɉaláá kulɔi nwɔ̨n bui kwɛlɛ, mąątínɛ̨n ŋąąi kɛ a nąn nonnii yɛ tɔɔɓɔlɔ, yɛ kpitili ɓɔnŋąą Liban yee nwuɔ̨, di kɛi mąątínɛ̨n yɛ tow wuluɠaa,

¹³ Aarɔn lonnii kəlee di mąąɲįnɛ̨n ɉu, Yálá kɔ́ hɛnŋąą ə ɓo di yəi, Israɛlə kpɔn gəlee ɲɛ̨i ɓa;

¹⁴ ə kɛi ɉaláá mɛ̨nįɠaa ɲɛ̨i kulɔ ɉaláá kulɔi mɛ̨i, yɛ Hɛn Gəlee Mɛ̨i Mun, yai ɲee a pɛli mɛ̨nį kəlee ɓa kɔ́ hɛnŋąą laa a nɛlɛɛ,

¹⁵ ə kɛli ɲee haŋąn gbələ gəgən mɛ̨i yɛ Yálá kɔ́ lɔɔ pu, yɛ daɠa ɉaláá kulɔi kɔwɔ mu, a Hɛn Gəlee Mɛ̨i Mun ɲɛnɛ̨ɛ̨ kəlee ŋą tɔɔmun liilaa hɛn gun nɛ̨ɛ̨.

¹⁶ Nąąlɔwai Aarɔn lonnii di kɛi tomą a di woo kɛnɛ̨, diɛ tulu hvɛɛ, a kwɛli tuluɠaa, a di tin gɛnɛ̨ mɛ̨nį kili too pələ nuą ɲą Hɛn Gəlee Mɛ̨i Mun niila.

¹⁷ Nąąlɔwai nuą kəlee, a gee, di kɛi nɛɛmą diɛ pɛlɛ di lii ɓa nɔi ɓa, diɛ di Nąmu mąąwiɛ yai a pɛli mɛ̨nį kəlee ɓa, Hɛn Gəlee Mɛ̨i Mun.

¹⁸ Nwələtoo nuą di kɛi dɛ̨nɛ̨ a di wɔ wələɠaa, bɛlɛ́ laa yɛ hvɛɛ a wələwoo nɛ̨ɛ̨ kɛnɛ̨.

¹⁹ Nuą di kɛi Nąmu, Hɛn Gəlee Mɛ̨i Mun mąąnɛ̨ɛ̨, diɛ vɛli, ə lɛɛ ɉu gu Nąmu mąąwiɛ kóló ə kpɛɛ, ɛlɛɛ, Simɔn yɛ ɲee laa kulɔ gɛ-tí ɓa.

²⁰ Yili pulu ə kɛi yɛɛ yɛ ɲee haŋąn Israɛlə lonnii kpulu mɛ̨i, Yálá ŋą́ lúwɔ́i yɛ kulo na, ɲɛ̨i yɛ pono a Yálá laai ə kɛi mo.

²¹ A veelɛnąn, nu kəlee di kɛi nwɔ̨nɔ̨ pɛlɛ di lii ɓa, diɛ Hɛn Gəlee Mɛ̨i Mun ŋą lúwɔ́ too diɛ.

Liɛwoo

²² Yiihu kɛa, 'ka yɛnɛ̨ɛ̨ pilɛɛ gee mɛ̨i nwɔ Yálá laa tɛ, yai a mɛ̨nį ɲɛ̨i kɛnɛ̨ɛ̨ɠaa kɛ kɛɛnąą kəlee ɓa, ə gu lɛɛ gu leeni kwəi ə gu wɔ yɛnɛ̨ɛ̨ mąąɲįnɛ̨n gɛ mą, yɛ gu hon a wɛlikɛmąąlaa.

²³ Ə gu kɔ́ a kwəinɛ̨ɛ̨, gu kili pɔ, ə gɛ liilaa ə pa Israɛlə lɔi mɛ̨i gu wɔ hvólóɠaa yee mu, a yələ kəlee mɛ̨nį.

²⁴ Ə gu hon a wɛlikɛmąąlaa yɛ bələi ə naakwɛlanmo la, nwɔ wɛlikɛmąąlaa ti ə gu hvoloon na ɓo gu wɔ yɛnɛ̨ɛ̨ yee mu.

Nɔiɠaai di ɓɛlɛkpɛɛ diɛ

²⁵ Lɔi hveelɛ kaa laa di wɛlikpɛɛ mą́ą́, ɉaaɓanąn nwɛi hvomąn a lɔi, diɛ ɓaa:

²⁶ Nuąi heeni Seirə yee hu, Filisti nuą, ɛlɛɛ, nu huwu kilikpɛɛgwəi heeni Sisɛmə.

Nwoo laa kulo

²⁷ Mɛ̨nį kɔlɔn nwoo, mɛ̨nį lɛ mɛ̨nį nuą diɛ, wooɠaa ɓə di bɛ̨ɛ̨ ɉɛɓɛ́i ɲɛ̨i hu, Eleazarə lon Sirakə mąnin Ɉesu ɓə di pɛ̨ɛ̨, Ɉerusalɛmə mun ni, mɛ̨nį hukpɛ kilii ti kɛ gwəi, ə daɠa lɔ wuu, yɛ tulɔ.

²⁸ Nui lɔpee pai kɛi gili hvilɛn ɉi nwooɠaa ti diɛ, a yələ kəlee nwun na nɛ̨ɛ̨ ɓə, nui pai di lɛɛ gili pɔ, gaa pai kɛi a mɛ̨nį kɔlɔnmun,

²⁹ mąąhɔlɔɓo, a di bɔ yíi ɓo, ɉu awalawala mɛ̨nį kəlee hu, gu Nąmu ŋą́ ɲɔwmąąlaa ɓə a ɲee lɛɛ tí.