Samia Veerɛi 9 - Yálá laawoo hɛɓɛ (dc)Davidə ə ɲɛ̨i lɛlɛɛ hee Mefibosɛtə ɓa 1 Yələ ta, Davidə ə mo yɛ diɛ: «Akɛ tii, Saulə yəi bɛlɛ́n mun da kaa nii yɛnɛ̨ɛ̨, yii ŋą́ pɛli kpɔnmąą tɛɛi bɔ Ɉonatan mąą mɛ̨nį ɓa?» 2 Saulə yəi bɛlɛ́n góló kɛ mun da ə kɛ laa, diɛ kɛ naa ɓa a: Siva. Di Siva tii təli Davidə pɔɔli, tɔɔmun Davidə yɛ mą: «Yɛ́ ɓə da kɛ yɛ́: Siva?» Yili yɛ mą: «Ɲą́ą́ ɓə, ə́ wɔ tímun ɓaa a ɲą́ą́.» 3 Tɔɔmun Davidə yɛ mą: «Saulə yəi bɛlɛ́n mun da hvo kɛa laa, yii ŋą́ pɛli mą, mɛ̨inɛ̨ɛ̨ yii nwɛli kaa Yai-Laa ɓa, ŋą́ gɛ mąą nu ɓa?» Siva yɛ tɔɔmun ma: «Ɉonatan lon dɔ̨nɔ̨ kaa ni laa, gɔwɔ hveelɛi puɔ mu.» 4 Tɔɔmun yɛ mą: «Gaa mį?» Siva yɛ mą: «Gaa yiihui ŋɛ̨i Amiɛlə lon Makirə yəi bɛlɛ́n Lodevarə.» 5 Tɔɔmun ə nu ta tɔɔ diɛ li tɔɔi dɔwɔ Lodevarə Amiɛlə lon Makirə yəi bɛlɛ́n. 6 Mefibosɛtə yai a Ɉonatan lon, yɛ ɓo a Saulə mąnįn, ə pa ə həli Davidə ɓa, ə pɛlɛ nííla. Davidə yɛ mą: «Yɛ́ ɓə da kɛ yɛ́ Mefibosɛtə?» Yili yɛ mą: «Ee! Ə́ wɔ tímun ka!» 7 Davidə yɛ mą: «Hvo ɲɔw, gáá bɔ ŋą́ kpɔnmąą tɛɛ ə́ pɔ a wɛlikɛmąąlaa, ə́ nąn Ɉonatan mąą mɛ̨nį ɓa. Gáá pai ə́ kalá Saulə nwɔ lɔiɠaai kəlee pənəi ŋą́ dɛɛ ə́ pɔ, ə lɛɛ, yɛ́ kpįnįi ŋɛ̨i, gu kaa kɛi gu yee lɔi kɔ́wɔ tɔ̨nɔ̨ a yələ kəlee.» 8 Mefibosɛtə ə kwɛli hvilɛn Yálá ɓa, yɛ mą: «Lə kpɔ ɓaa ə́ wɔ tímun, yai, ɲą́ą́ ŋɛ̨i yɛ yilɛ powa, yɛ́ li ə ɲɛ̨i lɛlɛɛ heei mą́ą́?» 9 Tɔɔmun Davidə ə Siva yai kɛ a Saulə nwɔ kóló kɛ mun dəli, yɛ mą: «Ɉɛnŋaa kpɔ kɛ a Saulə da ɲəi bɛlɛ́n nuą di wɔɔ, gáá gəlee tɛɛi ə́ wɔɔ mɛ̨nį nąmu lon bɔ. 10 Ə́ kaa pai kɛi tíi kɛi ma, yɛ́ ka ə́ lonnii, da ka wɔɔ luwɔɠaa; kaa pa a ɉɛnŋaa bɔ. Ə gɛ, ə́ wɔɔ mɛ̨nį nąmu lon ə kɔ̨nɔ̨n ɉɔlɔɓo yɛ mįi. Yii ɓaa ə́ wɔɔ mɛ̨nį Nąmu lon Mefibosɛtə nwɛi, kwa yaa ku kaa pai kɛi ku yee lɔi kɔ́wɔ tɔ̨nɔ̨ hu.» Siva lonnii di kɛ a hinąą pow kɔ́w lɔɔli, luwɔ pow hveelɛ ə ɓo ɲəi. 11 Siva yɛ tɔɔmun Davidə ɓa: «Yii kpɔ ə́ mo ə́ wɔ; luwɔ ɓa, gaa pai gəlee kɛi, yɛ bələi nwɔ mɛ̨nį Nąmu ə mo la. Yii ɓaa Mefibosɛtə nwɛi, kwa yaa lɔ ɓə kɛi kɔ̨nɔ̨n mįi gee ɓa, yɛ tɔɔmun non.» 12 Mefibosɛtə lon ɉulɔnu ta ə kɛ laa, diɛ kɛ naa ɓa a: Mika. Nuąi kpɔ kɛ Siva yəi bɛlɛ́n, gəlee di kɛ Mefibosɛtə nwɔ kóló ɓa. 13 Mefibosɛtə ə kɛ heeni Ɉerusalɛmə daai, mąąhɔlɔɓo, da tɔɔmun mə kɛi kɔ̨nɔ̨n mįi gee ɓa, gɔwɔ hveelɛi puɔ mu kɛ. |