Samia Veerɛi 8 - Yálá laawoo hɛɓɛ (dc)

Davidə ə gwɛlɛ lɔiɠaa hon a kɔ́

¹ Mɛ̨nįɠaa tii tɛɛ pulu, Davidə ə Filisti nuą hon a kɔ́, ə di nwun nɔ ɲee mu. Davidə ə nɛɛ mą Filisti nuą di wɔ heeɓolaa kulɔ di yəi.

² Davidə ə Moabə nuą hon a kɔ́; ə di pɛlɛ nɔi ɓa, ə di heei kɛ haaɓa, ə ɉeei hveelɛ paa, ə ɉeei tɔ̨nɔ̨ lɛɛ a vulú. Moabə nuą di lɛɛ Davidə yee mu, diɛ nįįhɔ̨nwɔ̨ kulɔ mą.

³ Davidə ə pənə ə Sova tɔɔmun, Rehɔvə lon Hadadɛzɛrə hon a kɔ́; ɓɛlɔwai yili ə kɛ bɔ ə nwɔ ɲąąwooɓolaa hee la Eufratə ɲálee kwɛlɛ pələ.

⁴ Davidə ə kɔ́ kɔ́ wotolo waa tɔ̨nɔ̨ həɠə, ɛlɛɛ, ə hoo mɛ̨i nuą nu waa mɛ̨ihveelɛ da nuąi di kɔ́wɔ ŋą diɛ kɔ́ kɔ́, nu waa pow hveelɛ hon a luwɔ. Davidə ə ɉooɠaa kəlee kɔ́wɔ pulu laną tee, nwun dɔ̨nɔ̨ lɔ ɓə ə nɛɛ.

⁵ Aramə nuą, diɛi kɛ heeni Damasə daai, di pa diɛ kɛ di kpɔmąą tɛɛ Sova tɔɔmun Hadadɛzɛrə pɔ. Kɛlaa Davidə ə nu waa pow hveelɛ kɔ́w hveelɛ paa Aramə nuą lɔwai.

⁶ Davidə ə lɔi ɲą́ą́wooɓo nuą hee Damasə daai Aramə lɔi hu. Aramə nuą di lɛɛ Davidə yee mu, diɛ nįįhɔ̨nwɔ̨ kulɔ mą. Ɓɛi lɔpee Davidə ə kɛi li laa, Yai-Laa ə kɛi gɔ́ nɛ̨ɛ̨ mą.

⁷ Nuą mąąkɔ̨nwɔ̨ kwɛli hɛnŋaai kɛ Hadadɛzɛrə nwɔ kɔ́kulááɠaa nuą yəi, a hɛni, Davidə ə gəlee həɠə ə pa a diɛ Ɉerusalɛmə daai.

⁸ Davidə ə ɓala kwɛli həɠə kpɔ kɛnɛ̨ Bɛta daai da Berotai daai, daaɠaai tii di kɛ a Hadadɛzɛrə nwɔɔ.

⁹ Hamatə tɔɔmun Toi ə bələ mɛ̨n diɛ kɛ Davidə yee a tɛɛ Hadadɛzɛrə nwɔ kɔlaɠaɠaa kəlee diɛ.

¹⁰ Toi ə non Yoramə tɔɔ yɛ li Davidə nwɔ lúwuɲɛ̨n ɉi, gɛ mɛ̨nį ɲee aa tɛɛ Hadadɛzɛrə ɓa a kɔ́. Toi ə gɛ tii, mąąhɔlɔɓo, ɲowo ɓa kɛ a Hadadɛzɛrə. Toi ə Davidə nwɔ lúwuɲɛ̨n ɉɛnŋąą kɛ a hɛnŋaa huwu ɲɛ̨i tamąą, di ɓo a: Hɛni, wali kwɛli, da ɓala kwɛli.

¹¹ Tɔɔmun Davidə ə ɉɛnŋaa tii laakwɛlan mo lɔ nwɔ̨nɔ̨ Yai-Laa ɓa, ə bɛlɛ nwali da ɉɛni, da ɉɛnŋaa kpɔ ə di hon, nɔiɠaa tii hu a kɔ́, ə di laakwɛlanmo Yai-Laa ɓa.

¹² Aramə lɔi, Moabə lɔi, da Amɔn lonnii, Filisti nuą da Amalɛkə, da gɔ́ mɛ̨i hɛn ə ɉəɠə Sova tɔɔmun Rehɔvə lon Hadadɛzɛrə yəi.

¹³ Davidə laa ə tɛ, ɓɛlɔwai ə pənə la yɛ pa, ɲee a tɛɛ Aramə nuą diɛ; diɛi kɛ a gboloyá kwɛlɛ lɔi hu nuą. Aramə nuą di kɛ a nu waa pow kɔ́w mɛ̨ihaaɓa.

¹⁴ Davidə ə lɔi ɲąąwooɓo nuą hee Edɔmə lɔi nwun na, ə nwun nąmįną hee Edɔmə lɔi kəlee nwun na. Edɔmə nuą kəlee di lɛɛ Davidə yee mu. Bələ ɓə Yai-Laa ə kɛi kɔ́ nɛ̨ɛ̨ la Davidə ɓa ɓɛi lɔpee a li laa.

Davidə nwɔ tɔɔɓɛlaai laa ka

¹⁵ Davidə ə heeɓolaa kɛ Israɛlə kəlee nwun na. Ə kɛi nwɔ nuąi hutoo a tələnmolaa, da kwəi kwəlɛlaa.

¹⁶ Seruya lon Ɉoabə ɓə gɔlaɠa nwun na. Yehosafatə Ahiludə lon yɛ ɓo a tɔɔmun naa woo tɛɛmun.

¹⁷ Ahituvə lon Sadɔkə, da Abiatarə lon Ahimelɛkə ɓə kɛ a ɉaláá laa həli nuą, ɛlɛɛ Seraya yɛ ɓo a ɉɛɓɛ́ kɛmun.

¹⁸ Yehoyada lon Benayahu ɓə kɛ Kereti da Peleti nuą nwun na. Davidə lonnii di kɛ a haláá ɉaláá laa həli nuą.