Samia Veerɛi 7 - Yálá laawoo hɛɓɛ (dc)Natan ə Yálá nwɔ wɛlɛɛ ɓo Davidə ɓa 1 Ɓɛlɔwai tɔɔmun ə lɔ la dɔɔ pɛlɛ́ mu, ɛlɛɛ, Yai-Laa ə gɔ́ a lííla yɛnɛ̨ɛ̨, a ɲowoɠaa kəlee mąą kwɛai ə mo mą. 2 Tɔɔmun ə kɛ Yálá kwəi mɛ̨nį hukulɔ mun Natan ɓa: «Ɓɛ kaa ləi! Ɲą́ą́ gá pɛlɛ́n, dɔɔ a kpitili wulu, ɛlɛɛ, Yálá nwɔ mįnɛ̨ kəhii ə ɓo kələ mu, mɛ̨i kɛɛ a həɠə.» 3 Natan yɛ tɔɔmun ma: «Mɛ̨nįi lɔpee gɛ kili kaa yɛ́, yá pɛli ə́ gɛ. Mąąhɔlɔɓo, Yai-Laa kaa ə́ pɔ.» 4 Kɛlaa mąą yələ kpiníi hu, Yai-Laa ə mɛ̨nį ɓo Natan ɓa, yɛ mą: 5 «Lí, yɛ́ nwɔ́ tímun Davidə ɓa: Mɛ̨nii Yai-Laa ə mo, ya ka: Yɛ́ hvəi pai pɛlɛ́ tɔɔi mą́ą́, gɛ́ lɔ mu. 6 Mąąhɔlɔɓo, və́ ta lɔ li pɛlɛ́ kpɔ-kpɔɔ mu, ə həɠə ɲələi ŋą́ Israɛlə lonnii kulɔ la Eziptə, ə həli la háákələi ɓa. Ŋą́ kɛ həɠə pɛlɛ́ mu, gɛ́ gbáán dee laa, di kɛɛ ɉiɛ pələi. 7 Ɲələɠaa kpɔ tii ku gɛ ɉiɛ hu kwa Israɛlə lonnii kəlee, ŋą́ ta tɔ́nwɛ̨nɛ̨ haɠa Israɛlə ɲąąwooɓomun da ɓa, a diɛi tii ŋą́ di hee diɛ nwɔ́ nu huwu Israɛlə ɲąąkɔn, gɛ́ kɛ diɛ: ‹Lə ɓə kɛ yaai ka hvo pɛlɛ́ tɔɔ li mą́ą́ a kpitili wulu?› 8 «Yiihu ŋɛ̨i, mɛ̨nįi ə́ kaa lii moi nwɔ tímun Davidə ɓa, ya ka; yá kɛ mą: Yai-Laa Mɛ̨nį Kəlee ŋą Hééɓomun woo ka, yɛ diɛ: Ɲą́ą́ ɓə ə́ həɠə taatɛlɛɛɠaa pulu lɔwɛi, ŋą́ ə́ hee nwɔ́ nu huwui Israɛlə nwun na. 9 Ŋą́ kɛ a ə́ tɔɔ bulu, ɓɛi lɔpee ə́ kɛi li laa, ŋą́ ə́ yowoɠaa kəlee hutaɠa ə́ ɲɛ̨i tɔwɔ, gáá pai ə́ laa kɛnɛ̨ yɛ yɛnɛ̨ɛ̨ nu kpɛa-kpɛaa di wɛi. 10 Gáá pai lɔi tɛɛi nwɔ́ nu huwu Israɛlə pɔ, gɛ́ di hamu hvilɛn, diɛ hee kpɔ tin-tin, di mąą hvo kɛa pai kpɛlin ɉii, ɛlɛɛ, nwąnąlɔ nuą di hva kɛa pənə di hvo hee di mɛ̨i yɛ bələi di kɛi gɛ la tɔlɔɔ tɔlɔɔ yələ. 11 Ə həɠə kpɔ ɲələi ŋį́ kɛi nuą həɠə la ɉu, gɛ́ di hee Israɛlə nwɔ́ nu huwui nwun na, ə həli la háákələi ɓa, ŋį́ ə́ yowoɠaa pɛlɛ ə́ kɔ́wɔ mu, ɛlɛɛ, ŋį́ mo yɛ́, gɛ́ yɛ́: Yai-Laa ɓə pai pɛlɛ́ tɔɔi yɛ́. 12 Ə́ wɔ yɛnɛ̨ɛ̨ laa a pa kulɔi, yá pa kɛa laai ə́ nąnni kwɛlɛ, gáá pai ə́ huwu mąąwiɛi ə́ pulu, ə́ kwəi lon da ɓə gáá pai heeɓolaa tɛɛi bɔ, ŋą́ nwɔ tɔɔlaai kɔ́wɔ hvilɛn kpɔ gbilin. 13 Ə́ lon tii ɓə pai pɛlɛ tɔɔi mą́ą́, ɲą́ą́n, ŋį́ nwɔ heeɓolaa kɔ́wɔ hvilɛn gbɔ tin-tin a yələ kəlee mɛ̨nį. 14 Gáá pai kɛi a nąn, yɛ ɓo a nón, a ɉɔn gɛ, nuą ɓə ŋą́ di kɛ a gɛlɛ hvaɠa. 15 Kɛlaa, nwóói ŋį́ gwɛlɛ vá ɲali bulu yaa tii mą, yɛ bələi ŋą́ gɛ la a Saulə, yai ŋą́ bili, gɛ́ ɉəɠə ə́ ɲɛ̨i tɔwɔ. 16 Ə́ wɔ pɛlɛ́i da ə́ wɔ tɔɔlaai di kaa pai kɛi ɲɛ̨́i mu a yələ kəlee. Ə́ wɔ tɔɔ kpəlin a kɛ a ɉeɛ kpɔ a gbilin yələ kəlee mɛ̨nį.» 17 Nwooɠaai tii kəlee ɓə Natan ə di ɓo Davidə ɓa, da mɛ̨nįɠaai kpɔ tii ə di kaa hįi pələ. Davidə nwɔ Yálá hvɛli woo 18 Tɔɔmun Davidə ə pa, ə hee Yai-Laa lííla, yɛ mą: «Lə kɛ hɛn mąą a ɲą́ą́ Yai-Laa Mɛ̨nį kəlee ŋą Hééɓomun Yálá! Lə kpɔɔ ɓaa nwɔ́ pɛlɛ́i, yaai, Ə́ li kpɔ giliŋąhiɛ ŋɛ̨i kɛi yɛ́ vilɛn mą? 19 Kɛlaa, nwɔ́ Yálá, yili tikpəi Ə́ ɲɛ̨i mu. Hvó gaai, yáá wɔlɔ Ə́ woo kwɛlɛ, Ə́ nwɔɔ tímun ŋą pɛlɛ́i ɓa a ɉukwɛa. Yai-Laa nwɔ́ Yálá! Yáá ɉón bələ kɛ yɛ ŋą́ kɛ a nui mąą mɛ̨nį nwąnąą nu kəlee ɓa. 20 Lə kpɔ ɓə nwɔ̨nɔ̨ Davidə a pɛli mo yɛ́? Yɛ́i a Ną́mu Yálá, ə́ ə́ wɔ tímun gɔlɔn. 21 Ə́ woo kwɛlɛi ə́ mo, da laai ə mo a ə́ lii, ya ɓə gɛ yɛ́ mɛ̨nį ɲɛ̨i kɛnɛ̨ɛ ŋɛ̨i kəlee kɛ la, yɛ́ nɛ ə́ wɔ tímun ɓa. 22 A tɛ̨ą ə́ kɛnɛ̨i, Ną́mu Yálá. Ə́ ɲɔ̨nwɔ̨mąn və laa, ɛlɛɛ, Yálá takpɛli hvo laa ə kulɔ ə́ pulu; yɛ bələi kpɔlɔ ə too la ku wəlii. 23 Nu huwu ta kaa mɔ̨ɔ̨ ɓɛ yɛnɛ̨ɛ̨ ə ɓo yɛ Ə́ wɔ nu huwui Israɛlə, a nu huwui ŋɛ̨i Yálá ə nwun mąąɓo yɛ gɛ a gwɛlin, yɛ naa hee mą, yɛ mɛ̨nį kɛnɛ̨i ŋɛ̨i kɛ mąą mɛ̨nį ɓa da mɛ̨nį kpɛa-kpɛa mąą ɲɔwɔɠaai, ə́ gɛ di wɔ lɔi mąą mɛ̨nį ɓa. Lɔi ta kaa mɔ̨ɔ̨ laa diɛ pɛli gɔwɔn ɉii ə́ wɔ nu huwui ɓa, yai ə́ nwun mąąɓo Eziptə nuą yəi di wɔ lɔi da wɔ haligaai. 24 Ə́ di tɔɔ, ə́ di kɛ a ə́ wɔ nu huwu a yələ kəlee, ə lɛɛ, yɛ́ Yai-Laa, ə́ kɛ a nwɔ Yálá. 25 A kɛ tii kɛa Yai-Laa nwɔ́ Yálá, nwooi ə́ mo yɛ hvilɛn na ə́ wɔ tímun da nwɔ pɛlɛ́i diɛ, ə́ yee kɛ mą a yələ kəlee. Ə lɛɛ, gɛ́ yɛ bələi ə́ mo la. 26 Ə́ laa maa ə wiɛ a yələ kəlee, diɛ kɛ diɛ: ‹Yai-Laa Mɛ̨nį Kəlee ŋą Hééɓomun kaa a Yálá Israɛlə mɛ̨i.› Ə lɛɛ, ə́ wɔ tímun Davidə nwɔ pɛlɛ́i, ə lɛɛ kpɔ tɔɔni gbilin ə́ lííla. 27 Mąąhɔlɔɓo, yɛ́ kpįnįi Yai-Laa Mɛ̨nį Kəlee ŋą Hééɓomun, Israɛlə nwɔ Yálá, yɛ́ ɓə ə́ wɔ tímun wəli lon doo ɉu, yɛ kɛ mą: ‹Gáá pai pɛlɛ tɔɔi yɛ́.› Yili ɓə ə́ wɔ tímun lii kpələ yɛ ə́ hvɛli. 28 A kɛ tii Yai-Laa nwɔ mɛ̨nį Nąmu, yɛ́ ɓə a Yálá, Ə́ woo kaa a tɛ̨ą, ə lɛɛ yáá nwun na nɛ̨ɛ̨ mɛ̨nįi tii ɓo ə́ wɔ tímun ɓa. 29 Lúwɔ́ kaa kɛa ə́ wɔ tímun nwɔ pɛlɛ́i ɓa, nɛɛ yɛ́, hvaa mą ə lɛɛ ə́ lííla a yələ kəlee. Yɛ pələi ə́ mo la yɛ́ Yai-Laa nwɔ mɛ̨nį Nąmu, ə́ wɔ lúwɔ́ haalai, ə́ wɔ lúwɔ́ kaa pai kɛi ə́ wɔ tímun, nwɔ pɛlɛ́i mɛ̨i a yələ kəlee.» |