Samia Veerɛi 6 - Yálá laawoo hɛɓɛ (dc)

Davidə ə pa a mįnɛ̨ kəhi Zerusalɛmə

¹ Davidə ə pənə nwɔ̨nɔ̨ ə Israɛlə kɔ́kuláá nu waa pow haaɓa ɲąąkpɔn.

² Davidə ə muhəɠə, ə hvilɛn bələ ɓa yɛ li, da nu kpului tii kɛ bɔi, di li Baale-Yehuda; ə gɛ di Yálá nwɔ mįnɛ̨ kəhii həɠə di paa la, yai Yai-Laa Mɛ̨nį Kəlee ŋą Hééɓomun laa kaa mą, yɛ ɓo heeni mąąkpɛ malakaɠaa nwun mɛ̨i.

³ Di Yálá nwɔ mįnɛ̨ kəhii hee wotolo nįnɛ̨ hu, di həɠə la Avinadavə yəi bɛlɛ́n yaai kɛ ɲee tona, diɛ li la. Avinadavə lonnii: Uza da Ahio, diɛ ɓə kɛi nwotoloi tii hiɛ.

⁴ Di Yálá nwɔ mįnɛ̨ kəhii həɠə Avinadavə yəi bɛlɛ́n ɲee mɛ̨i, Ahio ɓə kɛ hvilɛn ni Yálá nwɔ mįnɛ̨ kəhii tɔwɔ, diɛ pa.

⁵ Davidə da Israɛlə nuą kəlee di kɛi kwəinɛ̨ɛ̨ kulɔ Yai-Laa lííla, a hvɛli kɛ hɛnŋaa di ɉaɠa a siprə wulu: kələn, gwɛnįn, bɛlɛgwəi, damąn, lalo da ɓala.

⁶ Di həliɛ Nakɔn nwɔ mɔ̨nun dan ɉii. Uza ə ɲee haŋą Yálá nwɔ kəhii pɔ pələ, ə ɲee too ɉu, mąąhɔlɔɓo, nįŋɛ̨ɠaa di kɛi gɛ mu takpa-takpa, diɛ kɛ di doo.

⁷ Yai-Laa ə nii ŋąnwąną kpɔ kɛnɛ̨ Uza pɔ, ə nɛ̨ɛ̨ mą ə gɛlɛ, ɉɔn tii mąą mɛ̨nį ɓa. Ə haa kpɔlɔɔ laa Yálá nwɔ kəhii kwɛlɛ.

⁸ Mɛ̨nįi tii ə Davidə kwəi pili mą, gɛ mɛ̨nį Yai-Laa ə Uza hon bələ kɛ tii. Háá ɓaa háá, da kɛ gɛɛnąą tii laa ɓaa «Uza nwun na pilii.»

⁹ Mąą yələi tii, Davidə ə ɲɔw Yai-Laa ɓa; yɛ kɛ diɛ: «Ŋą́ pai tɛɛ pələ kɛi ləi, gɛ́ Yai-Laa ŋą mįnɛ̨ kəhi lɔ ɲə́i bɛlɛn?»

¹⁰ Davidə ə lənə Yai-Laa nwɔ kəhii lɔ mɛ̨nį ɓa bɔɔli, Davidə taa. Ə mo, də li di nɔ Gatə mun Ovɛdə-Edomə yəi bɛlɛ́n.

¹¹ Yai-Laa nwɔ kəhii ə ɲąnin ɉaaɓa kɛ Ovɛdə-Edomə yəi bɛlɛ́n. Yai-Laa ə lúwɔ́ too Gatə mun Ovɛdə-Edomə nwɔ pɛlɛ́i ɓa.

Ɲələi mįnɛ̨ kəhi ə lɔ la Ɉerusalɛmə

¹² Nuą di pa, di mo tɔɔmun Davidə ɓa, diɛ mą: Yai-Laa aa lúwɔ́ too Ovɛdə-Edomə nwɔ pɛlɛ́i ɓa, da ɲəi bɛlɛ́n ɉɛnŋaa kəlee, Yálá nwɔ kəhii mąą mɛ̨nį ɓa. Davidə ə muhəɠə ə li Yálá nwɔ kəhii həɠə mɛ̨nį ɓa Ovɛdə-Edomə yəi bɛlɛ́n, yɛ paa la Davidə taa a kwəinɛ̨ɛ̨.

¹³ Nuąi kɛi Yai-Laa nwɔ kəhii həɠə, da di kɔ́wɔ kpəɠə lɔ mɛ̨ida, Davidə ə nįŋɛ̨ hilɛ tɔ̨nɔ̨ da nįŋɛ̨ gbɔn dɔ̨nɔ̨ kulɔ a haláá.

¹⁴ Davidə ə kɛi mąną yɛ kɔ̨nwɔ̨ kpɔ a neelee Yai-Laa lííla. Kilɛn ɉəɠə lɔ ɓə kɛ gwąną, gbulɔn ŋąą ləŋəi.

¹⁵ Davidə da Israɛlə nuą kəlee di kɛ hvilɛn ni Yai-Laa nwɔ mįnɛ̨ kəhii pulu, diɛ paa la; diɛ wələ too mɛ̨i, diɛ lalo yɔw.

¹⁶ Ɓɛlɔwai Yai-Laa nwɔ mįnɛ̨ kəhii ə kɛi həli la Davidə taa, Saulə lon nɛ̨ɛ̨nu Mikalə ə nwun mąą laŋąn, ə tɔɔmun Davidə kaa, yɛ kɔ̨nwɔ̨, yɛ mąną Yai-Laa lííla mɛlɛ ə kpɛɛ gwəi.

¹⁷ Yii kɛa di pa a Yai-Laa nwɔ mįnɛ̨ kəhii, di ɉee ɓɛi mąąnɛ̨ɛ̨ di ɉee laa, ɉəɠə pɛlɛ́ mu, yai Davidə ə dɔɔ mąą mɛ̨nį ɓa a həɠə ɓɛla. Davidə ə nɛ̨ɛ̨ mą, ə haláá hɛn da gəlee kələn, da nɛ̨ɛ̨yɔwɔ laa haláá kulɔ Yai-Laa ɓa.

¹⁸ Yii kɛa Davidə ə kpɛɛ a ɉalááɠaai tii kulaa, ə lúwɔ́ too nuą kəlee diɛ Yai-Laa Mɛ̨nį Kəlee ŋą Hééɓomun laa hu.

¹⁹ Yili pulu, ə nɛɛ mą ə lɛɠɛ kpuɔ tɛitɛi tɛɛ nu kpului tii kəlee pɔ, ə bɛlɛ nwɔ̨mįi ɓa, nɛ̨ą mąn, hinąą mąn, nu kəlee di ɉɔlɔɓo. Yili pulu, nu kəlee ə li ɲəi bɛlɛ́ laaləi.

²⁰ Davidə ə pənə yɛ li ɲəi bɛlɛ́ laaləi, ə gɛ ə lúwɔ́ too ɲəi bɛlɛ́n nuą diɛ. Saulə lon Mikalə ə kulɔ, yɛ li naakwiɛn ɉii, ə tɔɔ Davidə lííla, yɛ mą: «Israɛlə tɔɔmun aa háákələi ɓaa lɔ gbɔwɔ ɓa-oo! Yɛ gbuwulu ɓo nwɔ luwɔɠaai di wɔ tí nɛ̨ąą yɛi ɓa, yɛ awala kɛ a nu ɓɛlɛ mąą.»

²¹ Davidə yɛ Mikalə ɓa: «Yai-Laa ɲɛ̨i ɓa ɓə ŋą́ kɛi mąną laa, yaai tii ɉə́ɠə ɉu, ə gɛ́ a niiɓa mun, yɛ víɛlaɓo yɛ́ dɛ́ɛ́ ə́ nąn ma da ɲəi bɛlɛ́n nuą kəlee. Yɛ ɉéé a tɔɔmun, nwɔ nu huwui Israɛlə kəlee nwun na.

²² Ɛlɛɛ, gáá nwɔ̨nɔ̨ pai mą́ą́ yɛɛi ə tɛɛ yili ɓa, ŋą́ gbɔ́wɔ́ tiikpə gbɔ́wɔ́ ɲɛ̨i ɓa. Kɛlaa, nuwɔ nɛ̨ąąi tii ə́ kaa di hvaa ɓoi, da mą́ą́wiɛ.»

²³ Gɛɛ tii, Saulə lon Mikalə hvo lon ɉɔlɔɓo ə lɛɛ la ɉu ə haa.