Samia Veerɛi 5 - Yálá laawoo hɛɓɛ (dc)

Di Davidə hee a tɔɔmun Israɛlə lɔi nwun na

¹ Israɛlə nuą kəlee di di ɲąąkpɔn Davidə kwɛlɛ Hebrɔn daai, diɛ mą: «Gu kaa a pɛlɛ́ tɔ̨nɔ̨ mu nuą, gu ɲąmą ə ɓo tanɔ̨n;

² Saulə nwɔ tɔɔlaa yələi, yɛ́ ɓə kɛi tɔɔ Israɛlə ɲɛ̨i tɔwɔ kaa li, kaa pa. Ya ɓə Yai-Laa ə kɛ yɛ́: ‹Yɛ́ ɓə pai Israɛlə nwɔ́ nu huwui ŋaakɔn ɉii, ɛlɛɛ, yɛ́ ɓə pai kɛi Israɛlə nwun na.›»

³ Israɛlə kalanɉonŋaa kəlee di pa di həli tɔɔmun ma Hebrɔn, ɛlɛɛ, da tɔɔmun Davidə ni di mįnɛ̨ həɠə Hebrɔn Yai-Laa lííla. Di dɔɔ wulɔ lɔ Davidə ɓa, di gɛ a Israɛlə tɔɔmun.

⁴ Davidə kaa kwɛlan ə kɛ pow haaɓa, ɓɛlɔwai ə dɔɔlaa hɔlɔɓo la. Ə kwɛlan bow nąąn gɛ dɔɔlaa hu.

⁵ Dɔɔlaa yii ŋɛ̨i ə gɛ Ɉuda lɔi hu Hebrɔn daai ə kɛ a kwɛlan mɛ̨ihveelɛ ɲąnin mɛ̨ida. Davidə ə tɔɔlaa kɛ Israɛlə lɔi da Ɉuda lɔi nwun na a: kwɛlan bow haaɓa kɔ́w haaɓa Ɉerusalɛmə.

Davidə ə Ɉerusalɛmə taa hon a kɔ́

⁶ Tɔɔmun da nwɔ nuą də li Ɉerusalɛmə daai, kɔ́ pɛlɛi Ɉebusə nuą tii kɛ heeni laa nɔi diɛ. Diɛ Davidə ɓa: «Hvá pɛli lɔi ɓɛ, hvo kɛ li yá ɲɛ̨ipu nuą da nuąi da too di kɔ́wɔ mɛ̨i yá di həɠə bələi. Mukulaa ɓaa: Davidə hva pɛli lɔi laa.

⁷ Davidə ə Siɔn gulaa kwəli hon, di naa hee kɛa a Davidə taa.»

⁸ Davidə ə mo a mąą yələi tii, yɛ diɛ: «Nui lɔpee yɛ ə Ɉebusə nuą hon, hvo kɛ li mąą nu ə lɔ ɲá wolo hu. Yii ɓaa kɔ́wɔ nwąną nuą da ɲɛ̨ipu nuą, da ɓaɠi lii tɛ a Davidə.» Yili mąą mɛ̨nį ɓə gɛ da kɛ kɛi la diɛ: «Ɲɛ̨ipumun da nuąi da too di kɔ́wɔ mɛ̨i, di hva pɛli lɔi bɛlɛ́n.»

⁹ Davidə ə hee gulaa kwəlii, ə nąą laa hee a «Davidə taa.» Yili pulu, Davidə ə pɛlɛ́ɠaa tɔɔ kpɔ nąą kwɛlɛ kəlee, ə həɠə gɛɛnąą laa hvɛɛ ɓa, yɛ li la daa kwəi pələ.

¹⁰ Davidə hvaŋą ta lɔ ɓə kɛi pɛlɛ mą, Yai-Laa Mɛ̨nį Kəlee ŋą Hééɓomun Yálá yɛ ɓo bɔ.

¹¹ Hiramə Tirə tɔɔmun, ə nuą tɔɔ Davidə pɔɔli, da kpitili wulu, da pɛlɛ mɛ̨i kɛ nuą, da kwɛni haɠa nuą, pɛlɛ́ tɔɔ mɛ̨nį ɓa. Di pɛlɛ́ tɔɔ Davidə ɓa.

¹² Nąąlɔwai, Davidə kili ə pu ɉu yɛ kɛ Yai-Laa aa kɛ ɉee kpɔ a tɔɔmun Israɛlə nwun na; ɛlɛɛ aa kɛ nwɔ tɔɔlaai hvaŋą kɛnɛ̨ Israɛlə mąą mɛ̨nį ɓa.

Davidə lonnii di di hɔlɔɓo Ɉerusalɛmə

¹³ Həɠəi Davidə ə mo Hebrɔn ə pa ə hee Ɉerusalɛmə, ə nɛ̨ą takpɛliɠaa həɠə a nɛ̨ąni, ɛlɛɛ, ə wɛliɠaa hon. Ə lon ɉinąą da lon nɛ̨ąą kaa nwɔ̨nɔ̨ laa.

¹⁴ Lon ɉinąąi ə di hɔlɔɓo Ɉerusalɛmə diɛ ka: Samua, Sovavə, Natan, da Salomɔn;

¹⁵ Yivharə, Elisua, Nɛfɛgə da Yafia;

¹⁶ Elisama, Ɛliada, da Elifɛlɛtə.

Davidə yee ə tɛɛ Filisti nuą diɛ kɔ́ tamąą hu

¹⁷ Filisti nuą di bələ mɛ̨n diɛ kɛ, daa Davidə kɛ a tɔɔmun Israɛlə lɔi nwun na. Filisti nuą kəlee di hvilɛn diɛ Davidə kwɛli. Davidə ə bələ mɛ̨n, ə yɛɛ gɔ́ pɛlɛ́ kɛɛnąą.

¹⁸ Filisti nuą di pa, di di huhiɛ Refaitə ɲɛɛ kɔ́wɔ hu.

¹⁹ Davidə ə Yai-Laa mąąni kɛ, yɛ mą: «Akɛti mąąnɛ̨ɛ̨ ŋą́ li ŋą́ pɛlɛ Filisti nuą diɛ a kɔ́, ə́ kaa pai di lɔi ɲéé ŋą?» Yai-Laa yɛ Davidə ɓa: «'Li! A tɛ̨ą, gáá pai Filisti nuą lɔi ə́ yee ŋą.»

²⁰ Davidə ə həli Baalə-Perasimə, ɛlɛɛ, Davidə yee ə tɛɛ laa diɛ. Nąąlɔwai, yɛ diɛ: «Yai-Laa aa Yálá aa gɛ, ŋą́ą́ kwɛni kulɔ ɲówo kɔ́wɔ mu, yɛ bələi ya hɛnŋąą mukulɔ la.» Mɛ̨nįi gɛ, di gɛɛnąą tii laa hee a: Baalə-Perasimə yaa li, mukulaa ɓaa: «kwɛni kulɔ ɲówó kɔ́wɔ mu.»

²¹ Di di wɔ haliɠaai lɛɛ laa puuni, Davidə da nwɔ nuą di di di li a diɛ.

²² Filisti nuą di pənə di tɛ di tɔɔ Refaitə nuą di wɔ yee lɔwai yɛɛ kɔ́wɔ hu.

²³ Davidə ə Yai-Laa mąąnin gɛ, yili yɛ mą: «Hvo bələ haŋą yɛ́ li woloi diɛ. Di mąą laa, 'ə́ laa di tɔwɔ, ka diɛni ka kwiɛn nwɛla koo ɓa, nwuluɠaa tii tənən ma.

²⁴ Ɓɛlɔwai ə́ kaa pai nu kɔ́wɔ mu tín mɛ̨n ɉii la nwuluɠaa tonna, nąąlɔwai ɓə, yá kulɔ la, ə́ pɛlɛ diɛ. Mąąhɔlɔɓo, Yai-Laa a kɛ kɛa hvilɛn ni ə́ tɔwɔ, yɛ Filisti nuą di wɔ kɔlaɠai huwolo.»

²⁵ Davidə ə gɛ yɛ bələi Yai-Laa ə dí la, ə lɛɛ, ɲee ə tɛɛ Filisti nuą diɛ, ə di paa kpɔ ə həɠə Gɛva, ə həli Gɛzɛrə daa kpala.