Samia Veerɛi 4 - Yálá laawoo hɛɓɛ (dc)

Baana da Rekavə di Isbosɛtə paa

¹ Saulə lon ə bələ mɛ̨n, diɛ mą kɛ Avnɛrə aa haa Hebrɔn. Ya laɠi ə laa gɔlɔi, Israɛlə kəlee kwəi aa pili mą.

² Nu hveelɛ di kɛ Saulə lon bɔɔli, a toomɛ̨i kɛ nuą nwun nąmįną; dɔ̨nɔ̨ ɓa a: Baana, dɔ̨nɔ̨ yan, Rekavə. Rimɔn yai kɛ a Beerotə mun nonnii li kɛ, di kɛ a Bɛnɉamɛn nu huwu taɠaa. Mąąhɔlɔɓo, di kɛi Beerotə kaa yɛ Bɛnɉamɛn lɔi ta.

³ Beerotə nuą di pu, də li Gitaimə di hee laa, di kaa nii laa, ə mą kɛ háákələi hvóló mu.

⁴ Saulə lon Ɉonatan lon ɉulɔnu ta ə kɛ laa, gɔwɔ hveelɛi kpalaa ma, gaa kwɛlan ə kɛ lɔɔli, Ɓɛlɔwai Saulə da Ɉonatan di mɛ̨i woo ə həli la Izreɛlə. Nɛ̨ɛ̨nui ŋɛ̨i kɛi ŋaakɔn, ə ɉəɠə yɛ pu la, mąą kpɛlin bələi tii kɛ bui lɔwai, nokoloi tii ə too, ə lɛɛ tii a gɔwɔ kpalaa ma. Di kɛi kɛ naa ɓa a: Mefibosɛtə.

⁵ Ya ɓə Beerotə mun Rimɔn lonnii, Rekavə da Baana, də li, ə lɛɛ di həli Isbosɛtə yəi bɛlɛ́n, ɓɛlɔwai kpɔ hvóló ɲąąnwąnąą nii kɛ la, Isbosɛtə ə ɓo laani yɛ hvóló ŋą yii kɛ.

⁶ Di lɔ bɛlɛ́n, mɔ̨nun ə ɓo di yəi. Di ɓɔwa pu Isbosɛtə kwəi, yili pulu, Rekavə da nąn non Baana di pu.

⁷ Di lɔ bɛlɛ́n, ɓɛlɔwai Isbosɛtə ə kɛ la laani ɲəi gbin ŋą ɲíi pɛlɛ́ mu, di baa, di nwun dee ŋą, di nwun galən ɉəɠə, di yii kpɔ hiɛi la pili-pili, di tɛɛ Ɉurdɛn ɲa-ɓoloon bɔ pələ.

⁸ Di pa a Isbosɛtə nwun galən Davidə pɔ, Hebrɔn. Diɛ tɔɔmun ma: «Saulə lon Isbosɛtə nwun galən ga, ə́ yowoi kɛi ə́ paa pələ kwɛlii. Yai-Laa aa kuɔ mɛ̨nį Nąmu nwąną kulɔ kpɔ tɛ̨ɛ̨tɛ̨ɛ̨ háákələi Saulə ɓa da ɉuwuhu.»

⁹ Davidə ə Rekavə da nąn non Baana, diɛi kɛ a Beerotə mun Rimɔn lonnii, ə di woo pulu pənə, yɛ diɛ: «Yii kpɔ Yai-Laa kaa a vulú, yaai gúlɔ ɉáá mɛ̨nį kəlee hu,

¹⁰ nui pa kɛi mą́ą́: ‹Saulə aa haa›, ə kɛi gbɔwɔ kaa yaa kpɛli a wɛlɛɛ lɛlɛɛ ɓomun a volói tii, ŋą́ mo di ɉon di baa Siklagə. Nwɛlɛɛ lɛlɛɛ tii ə pa moi, mąą hvɛla li kɛ.

¹¹ Guho mun kɛ, nu paa nuą da tələnmomun ba ɲəi bɛlɛ́n, akɛ tii vá mɔ̨ɔ̨ dəlimo mun tii ŋama mąą mɛ̨nį ɓo kaa, yii gaa ka yee ɓa? Ŋą́ ka həɠə lɔi yɛnɛ̨ɛ̨?»

¹² Davidə ə mo ɉilɛlɛaa diɛ, di di paa, di di yeeɠaa teee diɛ, da di kɔ́ɔɠaa, di di hɛlɛn Hebrɔn daa ɲálɔwa kwɛlɛ. Di Isbosɛtə nwun galən ɉəɠə di noo Avnɛrə kámą hu Hebrɔn daai.