Samia Veerɛi 3 - Yálá laawoo hɛɓɛ (dc)1 Gɔ ə lamun ɉu Saulə nwɔ pɛlɛ́i da Davidə nwɔ pɛlɛ́i di lɔwai. Davidə nwɔ pɛlɛ́i hvaŋą ta lɔ ɓə kɛi pɛlɛ ma, Saulə nwɔ pɛlɛ́i nwɛi, vaŋa ta lɔ ɓə kɛi kulɔ ma. Davidə lonnii di di kaa Hebrɔn daai 2 Davidə ə lon ɉinąą tamąą kaa Hebrɔn daai. Non dɔlɔɔ ɓa a: Amnɔn, yai ə gaa Ahinoamə ɓa, yai kɛ a Izreɛlə nɛ̨ɛ̨nu. 3 Veelɛnąą ɓa a: Kileavə, yai ə gaa Karmɛlə hulɔnu Navalə nɛ̨ą Avigailə ɓa. Ɉaaɓa nąą ɓa a: Absalɔn, yai ə gaa Gesurə tɔɔmun lon nɛ̨ɛ̨nu Maaka ɓa. 4 Nąąn ną ɓa a: Adoniasə, yai ə gaa Hagitə ɓa. Nɔɔli na ɓa a: Sefatia, yai ə gaa Avitalə ɓa. 5 Mɛ̨ida nąą ɓa a: Yitreamə, yai ə gaa Ɛgla ɓa, Davidə nɛ̨ą ta li kɛ. Nonŋaai Davidə ə di hɔlɔɓo Hebrɔn daai, diɛ ka tii. Avnɛrə da Isbosɛtə di kala 6 Ɓɛlɔwai gɔ́ ə kɛ la Saulə nwɔ pɛlɛ́i da Davidə nwɔ pɛlɛ́i di lɔwai, Avnɛrə ə kɛi ɉeei kulɔ a nɛlɛɛ Saulə yəi bɛlɛ́n. 7 Toonwəlii nɛ̨ɛ̨nu ta ə ta kɛ Saulə yəi, diɛ kɛ naa ɓa a: Rispa, Aya lon nɛ̨ɛ̨nu li kɛ. Isbosɛtə yɛ Avnɛrə ɓa: «Lə ɓə kɛ yaai ə́ laa a ną́n nɛ̨ą?» 8 Nwoo tii ə Avnɛrə lii hvóló kpɔ kɛnɛ̨, yɛ mą: «Gaa ə́ kwəi gáá mɔ̨ɔ̨ a Ɉuda yilɛ nwun galən da? Háákələi ŋɛ̨i, gáá túwɔ́i a gwə́i kwɛlɛɛ ə́ nąn Saulə nwɔ pɛlɛ́ ɓa, da ə́ nąn nonnii, ə mą kɛ, a ə́ wɛlikɛmąą nuą; və́ ə́ lɛɛ li laa hvo too Davidə yee ŋą. Ya ɓə ya tɔɔ, yɛ́ haŋą mą́ą́ nɛ̨ɛ̨nu mɛ̨nį hu háákələi? 9 Yálá ə Avnɛrə hon a pələi lɔpee, akɛ mɛ̨nįi Yai-Laa ə gwɛla la Davidə ɓa, ŋą́ wala gɛ ma. 10 Yili ɓaa: dɔɔlaai ə gulɔ Saulə yəi bɛlɛ́n, ə Davidə nwɔ tɔɔ kpəlin hvilɛn Israɛlə da Ɉuda di mɛ̨i; ə həɠə Dan, ə həli la Beɛrə-Seva.» 11 Isbosɛtə hvo pɛli hvaai Avnɛrə woo mu, mąąhɔlɔɓo, ə kɛi ɲɔw ma. Avnɛrə ə li Davidə pɔ pələ 12 Avnɛrə ə nuą tɔɔ Davidə pɔɔli, yɛ mą: «Gbɛɛ pɔɔ ɓaa nɔi?» Yɛ nwɔ̨nɔ̨ mą: «Gwa yɛ́ gu mįnɛ̨ həɠə, ŋą́ Israɛlə nuą kəlee hvilɛn ə́ pulu?» 13 Davidə yɛ mą: «Váái ma, gwa yɛ́ gu kaa mįnɛ̨ həɠəi. Mɛ̨nį tɔlɔɔ gáá vɛlii yɛ́, ya ɓaa: Hvo həli gbíni ɓa, yii hvo pa li bɔ́ a Saulə lon nɛ̨ɛ̨nu Mikalə, ɓɛlɔwai ə́ kaa paikɛi pai la bɔ́ɔ́li.» 14 Davidə ə nuą tɔɔ Saulə lon Isbosɛtə pɔɔli, yɛ kɛ mą: «Nɛ́a Mikalə tɛɛ bɔ́, ŋą́ wɔlɔ ɲa a Filisti towo kpuɔ nwun dɔ̨nɔ̨.» 15 Isbosɛtə ə tiɓo kə mun diɛ li ɉəɠəi ɉilɛ Paltiɛlə pɔɔli, yai kɛ a Laisə lon. 16 Mikalə ɉilɛ ə hvilɛn bulu, yɛ wɔlɔ, ə lɛɛ la ɉu di həli Bahurimə daai, Avnɛrə yɛ ɉulɔnui tii ɓa: «Ə́ pulu pənə ə́ li», yaan ə pənə. 17 Avnɛrə da Israɛlə kalanɉonŋaa di kɛi nwun dɔɔ kɛ, ə mo yiliɠaa diɛ, yɛ diɛ: «Ɉu aa kwɛa, kaa Davidə huhvɛli, kaa kɛ ə kɛ a ka wɔɔ tɔɔmun, 18 nąąlɔwai aa həli, mąąhɔlɔɓo, Yai-Laa ə mo Davidə laa mɛ̨i, yɛ kɛ: ‹Nwɔ́ tí mun Davidə yee hu ɓə gáá pai nwɔ́ nu huwui kulɔi la Filisti nuą yəi, da di yowoɠaa kəlee yəi.›» 19 Avnɛrə ə mɛ̨nįi tii bələ too Bɛnɉamɛn nu huwu wəlii. Yili pulu, Avnɛrə ə li Hebrɔn daa, mɛ̨nįiɠaa kpɔ Israɛlə da Bɛnɉamɛn nwɔ pɛlɛ́i mu nuą di hvaa mą a di kwəinɛ̨ɛ̨, ə gəlee hukulɔ Davidə ɓa. 20 Avnɛrə ə nu pow hveelɛ hvilɛn bɔ, ə pa, ə həli Davidə ɓa Hebrɔn daai. Davidə ə Avnɛrə da bɔ nuą di nwea laa kɛ kpɔ a nɛlɛɛ. 21 Avnɛrə yɛ Davidə ɓa: «Gáá tɔɔi a nwą́nąąi, ŋą́ Israɛlə nuą kəlee ŋąąkpɔn nwɔ́ mɛ̨nį nąmu tɔɔmun bulu. Ka diɛni ka káá pai mįnɛ̨ həɠəi, ə́ kaa pai kɛi a tɔɔmun ɓɛi lɔpee naa a nɛɛ yɛ́.» Davidə da Avnɛrə di ɲələwala too, Avnɛrə yɛ li a nwəli pulu laɠiɛ. 22 Kɛlaa, nąąlɔwai Ɉoabə da Davidə nwɔ nuąi di kɛi həɠə gɔ́ ɓa pələ diɛ pa. Daa kɛ hɛn gɔw kɛnɛ̨ hɔlɔɔɓo gɔ́ hu. Avnɛrə hvo kɛa kɛ Davidə kwɛlɛ Hebrɔn, yili aa kɛa kɛ dɔɔ bələi, yɛ li a niilaa gwəi. 23 Pai Ɉoabə da kɔ́kulááɠaa kəlee di mo, nuą di mo Ɉoabə ɓa, diɛ kɛ mą: «Nɛrə lon Avnɛrə ə pa tɔɔmun bɔɔli, yili aa nɛɛ laa yɛ li a nwəli pulu laɠiɛ.» 24 Ɉoabə ə li tɔɔmun bɔɔli yɛ mą: «Lə ɓə tii ə́ gɛi? Avnɛrə ə pa ə́ pɔɔli, lə ɓə kɛ yaai, ə́ nɛɛ laa yɛ li? 25 Ə́ Nɛrə lon Avnɛrə kɔ́lɔn, ə́ ɓowo mɛ̨nį ka tii ə paa la, ə gɛ, ə kɛ a ə́ kpaalə kəlee kɔ́lɔn ŋąą, ə ə́ kɛ mɛ̨nįɠaa kəlee hu kɔ́lɔn.» 26 Kulɔi Ɉoabə ə mo tɔɔmun bɔɔli, ə nuą hvilɛn Avnɛrə pulu, yili aa kɛa kɛ həli Sira bowa ya ɓa; di ɉon naa diɛ paa la. Davidə gili hvo kɛ ɉu. 27 Pənəi Avnɛrə ə mo ə pa, Ɉoabə ə li la ɉįi laa kpulu kpon gwɛlɛ pələ a gbanalaa, yɛ aa kɛi kɛ ə mɛ̨nį ta mo mą a nɛlɛɛ. Ə ɓɔwa pu gwəi, ə baa; Ɉoabə ə nəɠə Asahɛlə nwąną kulɔ. 28 Bələ mɛ̨n Davidə ə mo, ə mo naa pulu, yɛ diɛ: «Nɛrə lon Avnɛrə haa mɛ̨nįi ŋɛ̨i hu, ɲą́ą́ kwa nwɔ́ tɔɔlaai ku yee hvo kpɛli ɉu tiikpə kpɛli, Yai-Laa ɲɛ̨i ɓa. 29 Avnɛrə haa nwulu ə lɛɛ Ɉoabə da nwɔ pɛlɛ́i mu nu kəlee di nwuɔ̨. Ŋama kulɔ maa ɲɔ̨n, hvólóɲɔ̨n, luwɔlaa, mąąwɛli laa, mɛ̨nįɠaa tii maa hva kwɛa Ɉoabə nwɔ pɛlɛ́i ɓa, a wala kɛ tii, kɔ́ kɔ́ ɓɔwa.» 30 Ɉoabə da Avisai di ləɠə Asahɛlə paai di mo kɔ́ mɛ̨i Gabaɔn, yili ɓə gɛ, diɛ Avnɛrə yaa kpɛli mąn baa la. 31 Davidə yɛ Avnɛrə bɔ nuąi kɛ laa diɛ: «'Ka ká mąą həɠəɠaa hu ɓɛla, ka ɓíi haɠaɠaa kpulɔn ka ləŋəi, ka Avnɛrə haa wɔlɔ ɓo.» Tɔɔmun Davidə ə kɛ nu powa kpəɠə nuą pulu. 32 Di Avnɛrə loo Hebrɔn. Tɔɔmun ə tomą a wɔlɔ Avnɛrə kámą mɛ̨i, nuą kəlee di bu ma a wɔlɔ. 33 Yili pulu, tɔɔmun ə haa wələ too Avnɛrə mɛ̨i, yɛ mą: Mąą hvo nɛ̨ɛ̨li kɛ Avnɛrə hvo haa yɛ nuąi di ɓɛlɛ hvo diɛ, 34 Di hvo ə́ yeeɠaa yili li, Di hvo ə́ kɔ́ɔɠaa lɔ li kpɔ̨nɔ̨ hu. Ə́ too, yɛ bələi nu a too la nu paa nuą mu. Nuą kəlee di bu nwɔ̨nɔ̨ mą a wɔlɔ. 35 Nu kəlee di pa ə gɛ, Davidə ə kɔ̨nɔ̨n golo mįi, ɓɛlɔwai tii hvóló ə kɛ nií la yələi. Kɛlaa, Davidə aa kɛ gwɛla, yɛ kɛ diɛ: «Yálá ə mɛ̨nį huwui lɔpee gəlee laa mą́ą́, a kɛ ŋą́ lɛɠɛ hɛn da ɓa, a wala kɛ tii, akɛ ŋą́ hɛn nɔpee ta kɔ́ɔn, akɛ hvóló hvo nii too li.» 36 Nu kəlee ə mɛ̨nįi tii kpaɠala kaa, diɛ kɛ mɛ̨nį haŋąą li. Mɛ̨nį lɔpee tɔɔmun aa kɛi gɛ, di kɛi gaa a mɛ̨nį lɛlɛɛ. 37 Nɔi lonnii kəlee da Israɛlə nu kəlee di gaa kpɔ a mąą yələ, diɛ kɛ, Nɛrə lon Avnɛrə paa mɛ̨nį hvo kɛ a tɔɔmun gɛ mɛ̨nį. 38 Tɔɔmun yɛ nwɔ nuąi diɛ: «Ka hvo gɔlɔn kaa diɛ, nwun nąmu ta ka tii, ə lɛɛ, nu kɛnɛ̨ ta ka tii a haa háákələi Israɛlə lɔi hu? 39 Nwɛ́i, háákələi, hvaŋą hvo ɲə́i, pələi mąn di dɔɔlaa wulɔ hiɛ la mą́ą́, ə lɛɛ, nu huwui tii a Seruya lonnii, di kili walawalaai mą́ą́. Kɛlaa, Yai-Laa ə nu ɲɔ̨nwɔ̨ɔ̨ nwɔ mɛ̨nį ɲɔ̨n gwələ kulɔ ma.» |