Samia Veerɛi 24 - Yálá laawoo hɛɓɛ (dc)

Davidə ə Israɛlə nuą lonon

¹ Yai-Laa lii ə holi Israɛlə nuą pɔ nwɔ̨nɔ̨, ə Davidə lii muhəɠə di pɔ ə gɛ, yili ə Israɛlə nuą da Ɉuda nuą di lonon.

² Tɔɔmun yɛ kɔlaɠa nwun nąmu Ɉoabə ɓa: «'Tɛɛ Israɛlə nuą kəlee mɛ̨i, ə́ həɠə nɔi nwun ma Dan, ə́ yɛɛ la ɉɛɠɛɛ Beɛrə-Seva; ə́ nuą lonon, ə gɛ, ŋą́ kɛ a nu kwɛni kɔ́lɔn ŋąą.»

³ Ɉoabə yɛ tɔɔmun ma: «Gɛ́ Yai-Laa ə́ wɔ Yálá ə nuą kpulu hu kɛnɛ̨ gee mɛ̨i waa tamąą, ɛlɛɛ, nwɔ́ mɛ̨nį nąmu tɔɔmun ə di kaa a gbɔɔ-kpɔɔ ɲɛ̨ikɔw! Kɛlaa, lə mɛ̨nį ɓa nwɔ́ mɛ̨nį nąmu tɔɔmun gaa bɔ yili ə kɛ?»

⁴ Kɛlaa tɔɔmun nwoo ə wiɛ Ɉoabə ɓa, da nwɔ kɔlaɠa nwun nąmįnąi. Ɉoabə ə hvilɛn bələ ɓa da dɔɔ pɛlɛ́ mąąkpɛ kulaaɠaa, diɛ li Israɛlə nuą lonoi.

⁵ Di Ɉurdɛn teen, di li di tɔɔ Aroɛrə daai, yai Gadə ɲá ɓoloon bɔ ɉɛɠɛɛ pələ. Yili pulu, di li Yazerə daai.

⁶ Də li Galaadə lɔi hu, Hodsi nɛ̨ŋɛ̨ lɔi hu Dan-Yaan, di lɛɛ di ɲɛ̨itɔwɔ də li Sidɔn daa.

⁷ Di lɔ Tirə gɔ́ taa hu, da Hivi nuą pɔ taai, ə mą kɛ Kanaan nuą pɔ taai. Yili pulu, də li Ɉuda lɔi ɉɛɠɛɛ pələ, Beɛrə-Seva daai.

⁸ Di nɔi kəlee hu hiɛ, ɲąnin mɛ̨inąąn hvóló pow hveelɛ yee mu; di pənə di pa Ɉerusalɛmə daai.

⁹ Ɉoabə ə nu kwɛni hvaa ɓo tɔɔmun ma. Israɛlə nuą di kɛ a nu waa nwun mɛ̨ihaaɓa, diɛ pɛli ɓɔ́wa yalai daai. Ɉuda nuą di kɛ a nu waa nwun nɔɔli.

Yálá ə Davidə hutɔɔ nɛ̨ŋɛ̨n tii mąą mɛ̨nį ɓa

¹⁰ Ɲąąɓa, Davidə kpɛɛ a nuą lonoɔ, níi ə ɓɛla mą. Davidə yɛ Yai-Laa ɓa: «Nɛ̨ŋɛ̨n gɛnɛ̨ ka tii ŋą́ą́ ɉəɠə; Yai-Laa, gɛ́ ə́ ə́ ɲɛ̨i həɠə ə́ wɔ luwɔ kɛ hɔn ma, mąąhɔlɔɓo, ŋą́ą́ túwɔ́ yɛ ɓowomun.»

¹¹ Mąą yələ laaɓoɔ, Yai-Laa yɛ gwəi mɛ̨nį hukulɔ mun Gadə ɓa, a yai a Davidə nwɔ kwɛlɛɛn gɛɛkaamun, yɛ mą:

¹² «'Li yɛ́ Davidə ɓa: Yai-Laa woo ka, yɛ: Mɛ̨nį haaɓa ɓə gaa naai yɛ́, ə́ ə́ líiɓa həɠə ɉu, ŋą́ naa yɛ́.»

¹³ Gadə ə li Davidə pɔɔli, yɛ mą: «Ə́ hvaa mą kwɛlan ɉaaɓa púlu ə too yɛ́, awala kɛ tii, ə́ yowoɠaa yee ə tɛɛ yɛ́ kɔ́ hu ɲąnįn ɉaaɓa yee mu, hvá pɛli kulɔi di wɔɔ kɔ́ kɔ́ ɓɔwaɠaai yəi; awala kɛ tii, hvóló haaɓa ə́ gɛ Yai-Laa nwɔ kɔ́ kɔ́ ɓɔ́wai yee mu, da Yai-Laa nwɔ kɛɛ kala malaka ə pa, ə hiɛ nɔi nąą kəlee a lɔi kala ɲɔ̨n. Yili ɓa, ə́ kiliŋąhiɛ, nɛlɛ ɓə ə́ hvaa mą, woo ɓo mą́ą́, ŋą́ li, ŋą́ mo nui dɔ́ɔ́ mą.»

¹⁴ Davidə yɛ Gadə ɓa: «Liihɛlɛn gɛnɛ̨ aa too mą́ą́. Ɲą́ą́ mun nɛ́ɛ́ kpɔ Yai-Laa yəi ə ɉútɔɔ, yili hviɛlaɓoɔi ə dɛ́ɛ́ nu takpɛliɠaa pɔ diɛ ɉútɔɔ, mąąhɔlɔɓo, Yai-Laa nwɛi, a nu ɲɛ̨imąąwɛli kaa.»

¹⁵ Yai-Laa ə nɛɛ mą ə kwəi kulɔ ɲɔ̨n bɛlɛ Israɛlə nuą diɛ, ə həɠə ɲələwalai tii ɓa, ə lɛɛ la ɉu, guui di vaaɓo, ə ɉəli. Ə həɠə kpɔ nɔi ɲələi pələ, ə yɛɛ la ɉɛɠɛɛ pələ, nu waa pow mɛ̨ihveelɛ ɓə kwəi kulɔ ɲɔ̨n ə baa.

¹⁶ Malaka ə ɲee haŋą Ɉerusalɛmə taa mɛ̨i pələ, yɛ kɛ ə ɉu nuą nwun na pili. Kɛlaa, Yai-Laa hvo kɛa hvaa mą yili hvo kɛ. Ə mo gɛɛ kala malakai tii ɓa, yɛ mą: «Aa pɛli ɉu! Ə́ yee lɛɠɛ yɛ́.» Yai-Laa nwɔ malaka ə kɛ tɔɔni Ɉebusə mun Arauna nwɔ mɔ̨nun dan ɉii kwɛlɛ.

¹⁷ Malakai ŋɛ̨i gɛɛ kala nɔi, gaai Davidə ə mo, ə mo Yai-Laa ɓa, yɛ mą: «Ɲą́ą́ ɓə nɛ̨ŋɛ̨n ɉəɠə, ɲą́ą́ ɓə túwɔ́ pələ ɲɔ̨n gulɔ; kɛlaa, mąąwɛli nuą ŋɛ̨i, di wɔ nąą ɓaa lə? Ɲą́ą́ kwa nwɔ́ pɛlɛ́i mu nuą ɓə mąąnɛ̨ɛ̨ ə́ ə́ ɲɛ̨i ɲɔ̨nwɔ̨ɔ̨ hee kuɔ.»

Davidə ə haláá kulɔi pɛli Yai-Laa ɓa

¹⁸ Gadə ə li ə həli Davidə ɓa mąą yələ, yɛ mą: «'Li ɲee tona, ɓɛi tii Ɉebusə mun Arauna nwɔ mɔ̨nun dan ɉii, ə́ haláá kulɔi pɛli laa a Yai-Laa nwɔɔ.»

¹⁹ Bələi tii Yai-Laa ə Gadə tí la, Davidə ə gɛ yɛ bələi di mo la mą.

²⁰ Arauna ə ɲɛ̨i tinɛ̨n nɔ, ə tɔɔmun da bɔ nuą kaa diɛ pa bɔ pələ. Arauna ə kpuluun, ə li ə gwɛli hvilɛn tɔɔmun ma, ə pɛlɛ nɔi ɓa,

²¹ yɛ tɔɔmun ma: «Lə ɓə kɛ yaai tɔɔmun gaa pai nwɔ luwɔi pɔ?» Davidə yɛ mą: «Ɲą́ą́ ɓə ə́ wɔ mɔ̨nun dan ɉii ŋɛ̨i yai, ə gɛ, ŋą́ haláá kulɔi pɛli laa Yai-Laa ɓa, yili ɓə a gɛ mɛ̨nį nwąnąą ŋɛ̨i mąą ə kwɛa nɔi lonnii diɛ.»

²² Arauna yɛ tɔɔmun ma: «Yii kpɔ nwɔ́ mɛ̨nį nąmu kaa bɔ ə gəlee həɠə, ɉaláái da gəlee kələn, ə gulɔ la. Ɓɛ kaa, gáá nįnɛ̨ɠaa ŋɛ̨i tɛɛi, ŋą́ bɛlɛ nwuluɠaai kɛ ɲiliɛ diɛ mą a gwəi.

²³ Nwɔ́ tɔɔmun, gáá yili kəlee tɛɛi nwɔ́ mɛ̨nį nąmu pɔ. Gɛ́ Yai-Laa ə́ wɔɔ Yálá, ə ɲɛ̨i lɛlɛɛ hee ə́ wɔ haláá hɛnŋaa diɛ.»

²⁴ Kɛlaa, tɔɔmun yɛ Arauna ɓa: «Kpaa-oo! Yii gáá bɔ, ya ɓaa ŋą́ ɲá. Mąąhɔlɔɓo, və́ bɔ və́ haláá kulɔ Yai-Laa ɓa a hɛn ɉɔ̨nwɔ̨ hvo mą.» Davidə ə mɔ̨nun dan ɉii tii ya da nįŋɛ̨ɠaa a: wali kwələ pow lɔɔli.

²⁵ Davidə ə haláá kulɔi pɛli laa Yai-Laa ɓa. Haláá hɛn da gəlee kələn, da pɔnaa kulɔ haláá, ə gəlee kulɔ laa Yai-Laa ɓa. Yai-Laa ə ɲɛ̨i lɛlɛɛ hee nɔi nuą diɛ, ə ɲɔ̨n ɲɔ̨nwɔ̨ɔ̨ tii mąą kwɛa Israɛlə nuą diɛ.