Samia Veerɛi 23 - Yálá laawoo hɛɓɛ (dc)

Davidə woo kpəli

¹ Ɉɛse lon Davidə woo gbəlan mąą ka: Nui heeni dɔɔ kpəlin ɉu, nwoo li; Nui Ɉakɔbə nwɔ Yálá ə mąątí, Yaai Israɛlə nuą da naa too a wələ,

² Yai-Laa nwɔ Kilii kaa hvaai nááləi, Vaa woo kaa ná.

³ Israɛlə nwɔ Yálá ɓə mo, Israɛlə nwɔ kwɛnii ɓə mo mą́ą́, yɛ mą́ą́: «Nui a tɔɔlaa kɛ nuą nwun mɛ̨i a tələnmolaa, yɛ ŋaawooɓo kɛ a Yálá nwɔ ɲɛ̨i ɲɔw maa laa, gɛ pələ kaa yɛ yələwala pɔ kɛɛ pɔ̨nɔ̨, ɓɛlɔwai hvóló a muhəɠə la,

⁴ yɛ yələwala pɔ, yii tulɔ hvo yələi. Yɛ tulɔ puɔ pulu kɛɛ pɔ̨nɔ̨, kala yɛ tiliin.»

⁵ Kɛlɛi bələ ɓə Yálá ə gɛ la a nwɔ́ pɛlɛ́i! Mąąhɔlɔɓo, mįnɛ̨i kwa yaa ku ɉəɠə, ga ma a yələ kəlee da nwɔɔ, da bɔ liɛwooɠaai a mɛ̨i kaa. Mɛ̨nįi lɔpee gəlee hu, a yee tɛɛ mąą tɛɛ bɔ́, ə mą kɛ nííɓa mɛ̨nį hu, ya ɓə a gəlee hu nɛɛ mą́ą́.

⁶ Kɛlaa, nu kpoloonŋaa kaa yɛ ŋaalən dumɔ̨ yii da bili, mąąhɔlɔɓo, nu hva di hon a ɲee ŋą kpala.

⁷ Nui gaa bɔ ə lɛɠɛ ma, a kwɛli taɠan ɉəɠə, ə gbɔn na gee ɓa, di gələn gbɔlɔɔ ɓɛi tii da kɛ laa.

Davidə nwɔ kɔ́kulááɠaa laa ka

⁸ Davidə nwɔ kɔ́kulááɠaai laa ka: Takemoni mun Yosɛvə-Basɛvɛtə, ə kɛ a kɔ́kuláá nwun nąmu. Ya ɓə, nwɔ kpalai pili ɲee mɛ̨i tanɔ̨n, ə nu nwun mɛ̨ihaaɓa paa.

⁹ Yaa tii a həɠə laa, Ahoa mun Dodo lon Eleazarə. Gɔkuláá haaɓai ŋɛ̨i kɛ Davidə pɔ, ə kɛ a dɔ̨nɔ̨. Ɓɛlɔwai Filisti nuą di di ŋąąkpɔn na diɛ kɔ́ bɛlɛ Davidə ɓa, Israɛlə nuą di pu.

¹⁰ Kɛlaa, yaa tii ɓə tɔɔ Filisti nuą la, ə lɛɛ di paai, ə lɛɛ ɉu ɲee hu ə haa, ɲee ə kanąn nwɔ kɔ́ kɔ́ ɓɔwai nwun ma. Yai-Laa ə gɔ nɛ̨ɛ̨ Israɛlə ɓa mąą yələ kpɔ kɛnɛ̨. Israɛlə nuą di pənə di pa, di hvilɛn bulu lɔ gɔ́ honŋaa həɠə mɛ̨nį lɔ ɓa.

¹¹ Yili a həɠə laa Hararə mun, Age lon Sama. Filisti nuą di di ŋąąkpɔn yɛ nu tɔ̨nɔ̨, ɓɛi di di ŋąąkpɔn naa, tɔwɔ́ pɛlɛɛ yɛɛ ə kɛ gɛɛnąą tii. Israɛlə nuą di pu Filisti nuą tɔwɔ.

¹² Sama ə tɔɔ dɔwɔ́ kpɔlɔ hu, ə kulɔ Filisti nuą tɛɠii, ə di paa; gɔ ə nɛ̨ɛ̨ laa Yai-Laa ɓa kpɔ kɛnɛ̨.

¹³ Yələ ta, a mɔ̨nun deei lɔwai, nu haaɓa ə kulɔ gɔ́kuláá pow haaɓai tii lɔwai, di pa di Davidə kaa Adulamə gwɛni wolo hu, mąąhɔlɔɓo, Filisti nuą daa kɛ di wɔ kɔ́ ɓuwui pɛlɛ Refaitə ɲáɓoloonŋaa pɔ.

¹⁴ Davidə ə kɛ mąąkilɛ pələi, Filisti nuą di wɔ kɔ́ ɓuwui ta ə kɛ Bɛtleɛmə daai.

¹⁵ Davidə ə níiɓa hɛn ɉu hvɛli, yɛ kɛ diɛ: «Ɲálɔwai ŋɛ̨i Bɛtleɛmə daa kpala, gbɛɛ ɓə pai ɉu ya ta tɛɛi bɔ́, ŋą́ gbələ?»

¹⁶ Gɔkuláá haaɓai tii nɛɛ mą, di pili Filisti nuą di wɔ kɔ́ ɓuwui la, də li, ɲálɔwai ŋɛ̨i kɛ Bɛtleɛmə daa kpala, di da haɠa di paa la Davidə pɔ. Kɛlaa, hvo gɛ hvo da kpələ, ə bu nɔi ɓa, ə gulɔ Yai-Laa ɓa a haláá.

¹⁷ Yɛ mo woo ɓa: «Yai-Laa ə gíhíɓo gɛ́ li tɔɔi gɛ́ ɲái ŋɛ̨i kpələi; ɲái ŋɛ̨i hvo mɔ̨ɔ̨ a nuąi li ɉaɠai di ɲąmą, a diɛi niikpələ taa ləi ŋɛ̨i kulɔ?» Hvo gɛ hvo ɲái tii ta kpələ. Mɛ̨nįi gɔ́kuláá haaɓai tii di gɛ, yaa li.

¹⁸ Seruya lon Ɉoabə nəɠə Avisai yaa kpɛli ə kɛ a kulaa nwun nąmu. Ya ɓə nwɔ kpalai pili yələi nu nwun ɉaaɓa mɛ̨i, ə di paa. Yaa kpɛli na ə tɛ nu haaɓai tii laa pɔ.

¹⁹ Tɛ̨ą li, di mąąwiɛ kpɔ kɛnɛ̨ ə tɛɛ la kulaa haaɓai tii diɛ, kɛlaa, nwɔ walawalalaa hvo həli gɔ́kuláá haaɓai tii pɔ.

²⁰ Kulaa ta ə kɛ laa, diɛ kɛ non naa ɓa a: Yehoyada, yili nwɔ lon ma kɛ a Benayahu. Gɛ mɛ̨nį tamąąi kɛ, ə kɛ a Kavseɛlə mun. Yaa tii ɓə Moabə nuą hveelɛ paa, diɛ di laa ɓa a Ariɛlə. Yaa tii ɓə nwɔ̨nɔ̨, yələ ta, a kwɛlɛ pai lɔwai, ə yɛɛ lɔwa ta hu ə yala paa laa.

²¹ Yaa tii lɔ ɓə nwɔ̨nɔ̨ Eziptə mun da paa, yai kɛ a nu yee muhəɠɛɛ ta, kpala ə kɛ Eziptə mun tii yəi; nwɛi gbɔn mə kɛ ɲəi yɛ lɛɠɛ la Eziptə mun tii ɓa. Ə wolo mą, ə baa a gbɔwɔ kpalai tii kɛ ɲəi.

²² Mɛ̨nįi Yehoyada lon Benayahu ə gɛ, yaa lii. Yaa kpɛli naa ə lɛɛ gɔkuláa pow haaɓai tii pɔ.

²³ Yaa kpɛli di mąąwiɛ kpɔ kɛnɛ̨, ə tɛɛ la guláa pow haaɓai ɓa. Kɛlaa nwɔ walawalalaa hvo həli gɔ́kuláá haɓai tii pɔ. Davidə ə gɛ a mąąkpɛ kuláá ta.

²⁴ Ɉoabə nəɠə Asahɛlə ə kɛ nu pow haaɓai tii pɔ, ə mą kɛ Bɛtleɛmə daai mun Dodo lon Ɛlhanan.

²⁵ Harɔdə nuą: Sama da Elika.

²⁶ Palti mun Hɛlɛsə, Tekoa mun Ikɛsə lon Ira

²⁷ Anatotə mun Aviɛzɛrə, Husa mun Mevunai,

²⁸ Ahoa mun Salmɔn, Netofa mun Marai,

²⁹ Netofa mun Baana lon Helɛvə, Bɛnɉamɛn mun kɛ Givea diɛ kɛ mą Rivai, non Itai,

³⁰ Benayahu Pireatɔn mun, Hidai yai həɠə Gaasə ɲaɠaa kwɛlɛ.

³¹ Arava mun Avi-Alvɔn, Barhumə mun Azmawɛtə,

³² Saalvɔn mun Ɛliaba, Yasen lonnii: Yehonatan,

³³ Sama Hararə mun, Ararə mun Sararə lon Ahiamə.

³⁴ Maaka mun non Ahasbai nwɔ lon Elifɛlɛtə, Gilo mun Ahitofɛlə lon Eliamə,

³⁵ Hɛsrai Karmɛlə mun, Paarai, Arba mun,

³⁶ Sova mun Natan lon Yigealə, Bani Gadə mun,

³⁷ Amɔn mun Sɛlɛkə, Narai Beerotə mun yai kɛ Seruya lon Ɉoabə ŋą ɓíitiɛ̨.

³⁸ Ira yai a Yitri mun, Yitri mun Garɛvə,

³⁹ Yili pulu, Hɛtə mun Uri. Gəlee pɛlɛɛ gee ɓa, di kɛ a nu pow haaɓa kɔ́w mɛ̨ihveelɛ.